Mbimbiliya kayahanjika hatoma kutalisa kuchihande chakutala mivwimbimbi yavatu vali uselesele, nakulitumina mijimbu yauvumbi kuzachisa internet, navilinga vyeka vyauvumbiko. Oloze Mbimbiliya yahanjika hatoma omu Kalunga amona vilinga vize vyeji kulingisanga mutu alinge ukoji chipwe kumona kulisavala mujila yakuhenga. Tala jivesi jino jamuMbimbiliya:

•   “Shikaho jihenu vilyo vyenu vyamujimba vize vili hamavu vyakufwila ujila, namajilo, napeha yayipi yakusaka kulisavala.” (Wavaka-Kolose 3:5) Muchishishisa chakujiha kaha vilinga vyavipi, mutu atela kulitwamina kutala mivwimbimbi yavatu vali uselesele yize yinahase kulingisa vilinga kana vikinduluke cheka. Vilinga kana vyeji kulingisanga mutu apwenga waunyengwe kumeso aYehova.

•   “Weshowo mwatala lika pwevo nakumwivwila peha, nalingi lyehi nenyi ukoji mumuchima wenyi.” (Mateu 5:28) Kutala mivwimbimbi yize yeji kusololanga vilinga vyauvumbi, yeji kulingisa mutu apwenga navishinganyeka vyakulinga vyuma vyavipi.

•   “Ujila, namajilo osena, nachipululu, kanda vavivulukila muli enuko.” (Wavaka-Efwesu 5:3) Katwatela kushimutwilanga hamivwimbimbi yize yakundwiza ujila chipwe kuyitangako.

•   “Vilinga vyakumujimba vinasoloka hatoma, vikiko ujila, majilo, . . . navyuma vyakufwana ngana. Nguli nakumihuhumuna kuvyuma kanevi nge muze ngwamihuhumwine chimweza ngwami, vaze veji kulinganga vyuma kanevi kaveshi kukaswana Wangana waKalungako.” (Wavaka-Ngalesha 5:19-21) Kalunga amona vatu vaze veji kutuminanga vakwavo mivwimbimbi yavatu vali uselesele hashinga, chipwe kulituminanga mijimbu yauvumbi hainternet, kupwa vaunyengwe. Shikaho, kachi nge natwazananga muvilinga kanevi, kaha Kalunga keshi kutwivwila uselewako.