Vana vakukola vatwama namulimo waulemu chikuma wakuzakama visemi javo vatushinakaji. Mbimbiliya yahanjika ngwayo vana vakukola vatela “kusolwela muchima wakuzachila Kalunga kuli vaze vakuzuvo yavo, nakuhilwishilanga visemi javo navakaka javo mapundo, mwomwo echi vachitavila kumeso aKalunga.” (WaChimoteu 1, 5:4) Kachi nge vana vakukola vali nakuzakama visemi javo vatushinakaji, kaha vali nakwononoka lushimbi lwamuMbimbiliya lwakuvumbika visemi.—Wavaka-Efwesu 6:2, 3.

 Mbimbiliya kayanjika hatoma omu twatela kuzakaminamo visemi jetu vatushinakajiko. Chipwe ngocho, Mbimbiliya yahanjika havyakutalilaho vyavatu valufwelelo vaze valingilenga ngocho. Kaha nawa yahanjika hajindongi jinahase kukafwa vaze vakwechi mulimo wakuzakama visemi.

•  Uno jitanga jimwe kushikulu jazakaminenga ngachilihi visemi javo vatushinakaji?

•  Jindongi muka jamuMbimbiliya jize jinahase kukafwa vaze vatwama namulimo wakuzakama visemi vatushinakaji?

•  Kutala Mbimbiliya yamba ngwayo visemi vatushinakaji vatela kuvalamina kaha hembo tahi?

 Valingilenga ngocho mujijila jakulisezaseza kweseka nachiyoyelo chavo.

•   Yosefwe atwaminenga kwakusuku nakuze atwaminenga ise Yakova. Yosefwe awahishile vyuma mangana ise ezenga nakutwama kwakamwihi naikiye. Ahanyine ise zuvo, navyakulya nakumukinga.—Kuputuka 45:9-11; 47:11, 12.

•   Lute alukilile kulifuchi kuze kwafumine nayewenu, kaha azachilenga nangolo mangana amuzakame.—Lute 1:16; 2:2, 17, 18, 23.

•   Yesu. Omu apwile kwakamwihi nakufwa, asakwile mutu wakuzakama naye Maliya uze apwile tuliwe.—Yowano 19:26, 27. *

 MuMbimbiliya mwatwama jindongi jize najikafwa vaze vali namulimo wakuzakama visemi javo vahone kuzeya nakuhomba chamokomoko naukalu navamona.

•   Vumbikenunga visemi jenu.

   Vyuma Yahanjika Mbimbiliya: “Vumbikenunga masenu namanenu.”—Kulovoka 20:12.

   Tunahase kuzachisa ngachilihi lundongi kana?: Vumbikenunga visemi jenu hakuvahana lisesa lyakulilingila vyuma vize vanahase kulinga. Kaha vetavisenu nawa valisakwila jila namuvazakaminamo. Vavumbikenunga nawa nakufwila kuvakafwa kweseka navyuma vize muli navyo.

•   Vevwishisenunga kaha nawa pwenunga namuchima wakukonekela.

   Vyuma yahanjika Mbimbiliya: “Kunangakana chamutu cheji kuunjisanga matoto enyi, Kaha chinawahe kuli ikiye kuliula vaka-kuzombwojoka jishimbi.”—Vishimo 19:11.

   Tunahase kuzachisa ngachilihi lundongi kana?: Kachi nge visemi vanahanjika mazu amwe aze anamifutwisa kumuchima chipwe nge kaveshi namuchima wakusakwililako, kaha lihusenu ngwenu: ‘Ngunahase kwivwa ngachilihi nge yami ngwapwanga ngukashinakaji?’ Kachi nge namuvevwishisa nakuvakonekela kaha ukalu kana kaweshi kutohwako.

•   Hulisenuko vakwenu.

   Vyuma yahanjika Mbimbiliya: “Kachi nge vatu kavatwamine pungako, vyuma vanajinyi kulinga vyeji kukuminamo, oloze vyuma vyeji kutesangamo nge vaka-kulweza mangana vanavulu.”—Vishimo 15:22.

   Tunahase kuzachisa ngachilihi lundongi kana?: Hehwojolenu muwane omu munahase kulinga kutalisa kukulikangula chavisemi jenu. Wanenu nawa vyuma vyatwama mungalila yenu vize vinahase kumikafwa muzakame kanawa visemi jenu. Shimutwilenu navatu vaze vazakamaho lyehi visemi javo vatushinakaji. Kachi nge mwasemuka muvavavulu, kaha shimutwilenu havyuma navisakiwa kuli visemi jenu, nomu munahase kuvazakaminamo, nomu nawa munahase kuzachila hamwe hakuvazakama.

•   Pwenuga vakulinyisa.

   Vyuma yahanjika Mbimbiliya: “Vaka-kulikehesa vakwechi mangana.”—Vishimo 11:2.

   Tunahase kuzachisa ngachilihi lundongi kana?: Tachikizenu oho hakumina ngolo jenu. Chakutalilaho, tuvosena lwola nangolo vyeji kutukehelanga. Ukalu kana unahase kumilingisa muhone kuzakama kanawa visemi jenu. Kachi nge chili nakumikaluhwila kuzakama visemi jenu kaha lwezenuko vasoko wenu chipwe vatu vaze vapwa vakuluhwa mumulimo kana mangana vamikafwe.

•   Lizakamenunga nayenu vavene.

   Vyuma yahanjika Mbimbiliya: “Kakweshi mutu ahunga mujimba wenyiko, oloze eji kuulisanga nakuuzakamanga.”—Wavaka-Efwesu 5:29.

   Tunahase kuzachisa ngachilihi lundongi kana?: Numba nge muli namulimo wakuzakama visemi jenu, oloze mwatela kulizakama nawa nayenu vavene nakuzakama vaka-tanga yenu nge mwambata. Mwatela kulyanga kanawa, nakupwanga lwola lwakunoka nakusavalanga chikuma. (Muka-kwambulula 4:6) Shikaho mwatela kupwanga nalwola lwakuhwima nge chinahase. Kulinga vyuma kana, nachimikafwa mangana muhase kuzakama visemi jenu kumujimba, namuvishinganyeka.

 Mbimbiliya kayahanjika hatoma jindongi jakusolola nge vana vaze vanakolo vanahase kuzakama visemi vatushinakaji hamembo kahako. Jitanga jimwe jasakula kulamina visemi vatushinakaji hamembo kweseka nomu vanasakila. Oloze mukuhita chalwola vanahase kushinganyeka kuvatwala nakuvalamina kumembo akulamina tushinakaji. Tanga yinahase kutwama hamwe nakushimutwila mangana vawane omu vosena vanahase kuzachila hamwe.—Wavaka-Ngalesha 6:4, 5.