Mbimbiliya yahanjika hajichato kamwe kaha hali VyavaLevi 19:28 ngwayo: “Kanda . . . kulisona hamijimba yenuko.” Lushimbi kana, Kalunga aluhanyine vaIsalele, mangana valihandunune kuvatu valihachile navo vaze valisonekelenga majina chipwe vinjikizo vyatulunga hamijimba yavo. (Lushimbi lwamuchivali 14:2) Numba tuhu elu lushimbi valuhanyine vaIsalele keshi vaka-Kulishituko, oloze chapwa chachilemu vaka-Kulishitu kulukavangiza.

Uno muka-Kulishitu atela kulisona chipwe kulichata hamujimba tahi?

 Visoneka vinakavangizaho navimikafwa mushinganyeke hachihande kana:

•   “Mapwevo valiwahisenga vavene . . . mukavumbi.” (WaChimoteu 1, 2:9) Lushimbi kana lwazata kumalunga nakumapwevo. Shikaho twatela kuvumbika vakwetu nakuhona kuhaka vyuma twasaka etu vavene kulutwe.

•   Vatu vamwe veji kulisonanga chipwe kulichata mangana vasolole nge vakwechi lisesa lyakulinga kala mweshomwo vanasake kulinga mijimba yavo. Shikaho, Mbimbiliya yakolezeza vaka-Kulishitu ngwayo: “Hanenu mijimba yenu kupwa chimuna wakuvatula wamutonyi, wajila, wakwitavila kuli Kalunga, ou wapwa mulimo wajila wakuzata nauhashi wenu wakushinganyeka.” (Wavaka-Loma 12:1) Shikaho zachisenunga “uhashi wenu wakushinganyeka” mangana mutachikize ovyo muli nakusaka kulichachila. Kachi nge munakusaka kulichata chipwe kulisona mwomwo yakukavangiza vatu chipwe kutunga lijina, kaha tachikizenu ngwenu namukaliveya kulutwe omu namukatachikiza muchano wakupandama kujichato. Shikaho kukekesa vyuma munakusaka kulinga nachimikafwa musakule kanawa vyakulinga.—Vishimo 4:7.

•   “Vyuma veji kujinanga vaka-mangana vyeji kufukilanga, oloze vaka-kulusuka kulinga vyuma veji kuhutwanga.” (Vishimo 21:5) Vatu veji kulusukanga kulichata, oloze jichato jinahase kulinga mutu vahone kumufwelela kuli vakwavo nakumulingisa chimukaluhwile kuwana milimo. Kuchata mutu chipwe kumusona chapwa chandando chikuma kaha nawa kujima jichato cheji kukolanga chikuma. Vaka-kuhehwojola navaka-kujima jichato, vawana nge vatu vavavulu vaze veji kulichatanga veji kuliveyanga mukuhita chalwola.