Mbimbiliya kayakanyisa lunga kulisavala napwevoko, oloze yasolola ngwayo kulisavala chapwa hiwana wakufuma kuli Kalunga uze wapwa wavaze valimbata. Atengele “lunga napwevo,” kaha amwene vyuma vyosena atengele ngwenyi “vinawahe.” (Kuputuka 1:27, 31) Omu Kalunga ahakile valunga napwevo vatete muulo, ambile ngwenyi, “navakapwanga mujimba umwe.” (Kuputuka 2:24) Echi chalumbununa kulisolwela zangi yamuulo nakulikata chikuma.

 Mbimbiliya yalumbununa vyuma veji kulivwisanga kuwaha malunga muulo, hakwamba ngwayo: “Wahilila napwevo wahaukweze wove . . . Mavele enyi akusuulwisenga shimbu yosena. Zangi yenyi yikwivwisenga kuwaha makumbi osena.” (Vishimo 5:18, 19) Kalunga nawa asaka mapwevo valivwisenga kuwaha kulisavala. Mbimbiliya yahanjika ngwayo: “Lunga ahanenga pwevo lyenyi ovyo vyatela kumuhana, kaha napwevo nawa alingenga mwomumwe kuli lunga lyenyi.”—Wavaka-Kolinde 1, 7:3.

Kulisavala chalunga napwevo chize vakanyisa

 Kalunga ahanjika ngwenyi vaze valimbata vakiko kaha vatela kulisavala. Mbimbiliya yahanjika hali WavaHepeleu 13:4 ngwayo: “Ulo vauvumbikenga kuli vosena, kaha kahela kaulo kanda vakakapihisako, mwomwo Kalunga mwakasopesa vaka-ujila navaka-ukoji.” Shikaho vaze valimbata vatela kupwa vakushishika kuli vaka-zuvo yavo. Kavapwa vakuwahilila hakufwila kulisuulwisa vaveneko oloze veji kupwanga vakuwahilila hakukavangiza lushimbi lwamuMbimbiliya lwakwamba ngwavo: “Kuhana cheji kunehanga kuwahilila chikuma kuhambakana kutambula.”—Vilinga 20:35.