Mbimbiliya kayavuluka likumbi livene asemukile Yesu chipwe kuhanjika ngwayo twatela kulinganga chilika chakwanuka kusemuka chenyiko. Mukanda waMcClintock and Strong’s Cyclopedia wamba ngwawo: “Chilika chaKulisimasi kachafuma kuli Kalungako, kaha nawa kachatwama muTesetamende Yayihyako.”

 Oloze chilika chaKulisimasi chafuma mukwitava chamakuli. Mbimbiliya yamba ngwayo, Kalunga eji kwivwanga kupihya kachi nge natumulemesa mujila yize ketavilako.—Kulovoka 32:5-7.

1.   Kulinga chiwanyino chakwanuka likumbi asemukile Yesu: “Vaka-Kulishitu vakulivanga vamwenenga chilika chakwanuka kusemuka chamutu kupwa hichilika chavatu vakuzeneka kwitava. Vilika kana vyapendaminyine hakwitava chamakuli.”—The World Book Encyclopedia.

2.   December 25: Kakwatwama unjiho wakusolola nge Yesu asemukile halikumbi kanako. Vatwamina vamujiChachi vasakwile likumbi kana mangana lilitombole naviwanyino vize valingilenga mungonde yachishika.

3.   Kulihana mawana, kulya nakunwa, vilika: Mukanda waThe Encyclopedia Americana wamba ngwavo: “Chiwanyino chaSaturnalia vachilingilenga mukakweji waDecember chize chalingishile jino vatu vaputuke kulinga vilika vize vyatalishile kuKulisimasi. Chakutalilaho, hachiwanyino kanechi vatu valilenga kulya chamwaza, nakulihana mawana nakumunyika jikandulu. Mukanda waThe Encyclopædia Britannica wamba ngwavo, “halikumbi valingilenga chiwanyino kana, kakwapwilenga kuzata milimo chipwe kusekasanako.”

4.   Manongo ahaKulisimasi: Kweseka namukanda waThe Encyclopedia of Religion wasolola nge vatu vamuEurope vawahishilenga mujizuvo javo hakuhakamo “manongo navyuma vyaulombo wamafwo amatamba vyavivulu.” Valingilenga ngocho hakulinga chilika chamungonde yachishika mangana vahange vandemone.

5.   utondo waKulisimasi: “Kulemesa mutondo chize chalisalile chikuma kuvatu vamuEurope, vachilingilenga lika nahanyima yakwalumuka chavatu kana nakupwa vaka-Kulishitu.” Jila yimwe valingililengamo ngocho shina hakuhaka mutondo waYule kuvikolo chipwe mukachi kazuvo hakachi kangonde yachishika.”—The Encyclopædia Britannica.