“Yelusalema Yayihya” apwa mazu aze asoloka kaha mapapa kavali muMbimbiliya, kwimanyinako nganda yachifwanyisa yize yemanyinako vaka-kukavangiza Yesu, vaze navakaya mwilu nakuyula nenyi muWangana waKalunga. (Kusoloka 3:12; 21:2) Mbimbiliya yasolola nge awa mazu kana vanahase kuwavuluka nawa ngwavo mwenga waKulishitu.

1.   Yelusalema Yayihya yatwama mwilu. HaVisoneka hosena haze vavuluka Yelusalema Yayihya, vamba ngwavo nayikafuma mwilu, kaha vangelo veji kulamanga kuvikolo vyanganda kana. (Kusoloka 3:12; 21:2, 10, 12) Kaha nawa nganda kana yapwa yayinene chikuma, ngocho kayeshi kuhasa kupwa hano hamavuko. Eyi nganda kana yatohwa “namashitandeya 12,000.” * (Kusoloka 21:16) Jimbango jayo jasuhwa kafwe jikilomita 560.

2.   Vaka-kukavangiza Yesu chipwe ngwetu mwenga waKulishitu, vatwama muYelusalema Yayihya. Yelusalema Yayihya vayivuluka ngwavo “mwenga, pwevo lyaMwanamukoko.” (Kusoloka 21:9, 10) Awa mazu achifwanyisa vanavuluka, Mwanamukoko apwa Yesu Kulishitu. (Yowano 1:29; Kusoloka 5:12) “Pwevo lyaMwanamukoko” chipwe ngwetu mwenga waKulishitu apwa vaka-Kulishitu vaze navakayula hamwe naYesu mwilu. Mbimbiliya yafwanyisa usoko waYesu nava vaka-Kulishitu kuusoko watwama mukachi kalunga napwevo vaze valimbata. (Wavaka-Kolinde 2, 11:2; Wavaka-Efwesu 5:23-25) Kaha nawa chihela chamalolwa vatungilaho Yelusalema Yayihya chatwama ‘namajina 12 avaposetolo jaMwanamukoko 12.’ (Kusoloka 21:14) Echi chishina kana chatukafwa tutachikize Yelusalema Yayihya, mwomwo vaka-Kulishitu vaze navakaya nakuyoyela mwilu ‘vanavatungila lyehi hachihela chavaposetolo navapolofweto.’—Wavaka-Efwesu 2:20.

3.   Yelusalema Yayihya yatwama mufulumende. Yelusalema yakushikulu yapwile nganda yayinene yapwile muIsalele, muze Mwangana Ndavichi, namwanenyi Solomone navana vavo vayulilenga “halitanda lyaYehova.” (Mijimbu 1, 29:23) Yelusalema yize vavukuka ngwavo ‘nganda yajila’ yemanyinyineko chiyulo chaKalunga muchisaka chaNdavichi. (Nehemiya 11:1) Yelusalema Yayihya yize yapwa nawa “nganda yajila,” yatwama navatu vaze navakapwa naYesu mwilu, kaha “navakapwanga vamyangana nakuyula mavu.”—Kusoloka 5:9, 10; 21:2.

4.   Yelusalema Yayihya nayikalingisa vatu hano hamavu vakapwe vakuwahilila. Yelusalema Yayihya vayivuluka ngwawo nayikeza “hamavu kufuma mwilu muli Kalunga.” Echi chasolola nge Kalunga eji kuyizachisa hakukafwa vatu hano hamavu. (Kusoloka 21:2) Awa mazu asolola nge Yelusalema Yayihya yatwama muWangana waKalunga, uze Kalunga mwakazachisa hakutesamo kujina chenyi “mwilu, nahamavu nawa.” (Mateu 6:10) Vyuma Kalunga ajina kulingila vatu hano hamavu mwaliweza:

   •   Kufumisako shili. “Kalwiji wameya akuyoya” afuminyina kuYelusalema Yayihya nakutwala meya ‘kumitondo yakuyoya yakukisa vaka-mafuchi.’ (Kusoloka 22:1, 2) Echi kuka vatu kumujimba nakushipilitu nachikafumisako shili nakulingisa vatu vakapwe cheka nakuyoya chakukupuka, ngana muze Kalunga ajinyine hakavanga.—Wavaka-Loma 8:21.

   •   Vatu navakapwa nausoko wamwaza naKalunga. Shili yalingisa vatu vasosoloke kuli Kalunga. (Isaya 59:2) Kufumisako shili nachikalingisa upolofweto uno ukatesemo chikuma wakwamba ngwavo: “Mbalaka yaKalunga yili navatu hamwe, kaha mwakatwamanga navo, vakiko navakapwanga vatu jenyi. Kaha ivene Kalunga mwakapwanga navakiko hamwe.”—Kusoloka 21:3.

   •   Kufumisako kuyanda nakufwa. Kalunga mwakazachisa Wangana wenyi mangana ‘akahunde masoji osena kumeso avo, kufwa kacheshi kukapwako chekako, kaha nawa kakweshi kukapwa cheka kulishona, chipwe miteto, chipwe kukolako. Vyuma vyakulivanga vinafumuko lyehi.’—Kusoloka 21:4.