Yesu kapwile mutu wamwaza kahako. Oloze apwile mutu wakulipwila havatu vosena kufuma vene kushikulu. Talenu vyuma vahanjika vaka-kulinangula vyakushikulu navaka-kusoneka vamwe kutalisa kuli ikiye:

 “Yesu wakuNazaleta . . . himutu umwe wamulemu chikuma putu vene kushikulu.”—H. G. Wells, mutu alinangula vyakushikulu.

 “Vyuma alingile Yesu mukuyoya chenyi vinakafwenga vatu muno mukaye, kaha vichili lika nakutwalaho kukafwa vatu namakumbi ano.”—Kenneth Scott Latourette, mutu alinangula vyakushikulu kaha nawa muka-kusoneka mikanda wakuAmerica.

 Mbimbiliya yahanjika ovyo vyalingishile Yesu apwenga wakulipwila kuhambakana kala mutu wamwaza atwamaho lyehi hano hamavu. Omu Yesu ahulishile vaka-kumukavangiza vamulweze vyuma vashinganyekelenga vatu hali ikiye, umwe akumbulwile mwakwoloka ngwenyi: “Ove yove Kulishitu, MwanaKalunga ou ayoya.”—Mateu 16:16.