Neyi chashimwiniwu hanyuzi yadiña ha jw.org, hakupompa kweluña kwadiña muKerala, kuIndia, kwamwekeni wubanji wanyitendanzumbu yabalukili hamulungu, haOctober 29, 2023. Chawushona, kubombela hadi ahela ayedi afwili hadodina ifuku, kunafwi cheñi kansi wamumbanda wudi nayaaka 12 akatishiliwu nankashi. Amanakwetu niahela amakwawu 55 ayikatishili nankashi nawa hakachi kawu amakwawu ahili nankashi nakesi.

Chayinu mpinji, ahela asatu niamanakwetu ayedi anayitenteki muchipatela nawa adi hakafwilu. Akawuswa anashimuni nawu nyitendanzumbu yabalukili hampinji yakulomba kwakwenzunwina na 9:40 yadiña yisatu. Muntu anakufwikijawu akapokola nawu diyi wakoñeli ichi chuma chatama anamukwati dehi, nawa achidi kumwihujola.

Tunakuyisakilila akawuswa anyakeli kwinza nakutukwasha niakachipatela akameneni amanakwetu ejima akatishiliwu.

Antu adiña mwizaza azañaleli nawa akolesheweli muloña wakukeña kwayimwekesheleliwu nichayikwashiliwu kudi akwawu akakwitiya. Muhela wadiña mwizaza hampinji yabalukili nyitendanzumbu wahosheli nindi: “Hohenohu nashikeneni kutachika kulomba kudi Yehova. Atulama niamanakwetu amakwawu atwakameneni chachiwahi, nawa anyakeli kutukwasha. Chumichi chamwekesheli nawu Yehova watukeña nawa watwakamenaña wejima wetu.”

Añimenu akasanji kaIndia, ankoñi añinza, niakulumpi muyipompelu anatwalekihu kuyikwasha amanakwetu kuspiritu nimuyuma yinakaankiliwu. Mukulumpi wafumini kukasanji kamutayi wayili nakuyikundeja amanakwetu kuKerala adiña muniku kukala wahosheli nindi: “Hela chakwila amanakwetu ananeñi nsañu yakukala kunayishintakeshi, chikuhwelelu chami chinakoli nankashi chinamona muchima wunakumwekeshawu awa amanakwetu. Amavulu nahosha nawu. Nawa nadimwena namesu kapu chinamushindameniwu Yehova nawa chikuhwelelu chami chinakoleliku nankashi.”

Etu aYinsahu jaYehova mukaayi kejima, tunakulombelaku yisaka yamanakwetu ejima anakabakani naniku kukala muIndia. Bayibolu yatushiika nawu kumbidi kwakela wanyi madombu, kukabakana nikufwa, ichi chikaninu chatukundejaña nawa chatuleteshaña kushakama mukuwunda. Tukutwalekahu kumushindamena nikumukuhwelela Yehova.—Isamu 56:3.