Kasanji Keneni kawaYinsahu jaYehova kanakuzata nañovu kulonda keluki kumaluña kunashiki ichi chikatu chacoronavirus (chiyanakutenawu nawu COVID-19) kulonda atukwashi. Tweluka netu wuprofwetu wamuBayibolu washimunaña nawu yipupu diyi yinjikijilu yamafuku akukuminina. (Luka 21:11) Neyi kuholoka chipupu, chikuwaha neyi twiluka chitunateli kudikiña etu aweni niakwetu.—Yishimu 22:3.

Amakwawu anakwakamena chinakuhandawu amanakwetu niahela adi mumaluña mudi ichi chipupu. Chikatu chaCOVID-19 chinaleteshi tusanji twanyitayi niyipompelu yamuItaly, Japan, South Korea, nimatuña amakwawu kuhimpa chikupu yuma. Mumaluña amakwawu, tusanji twanyitayi tunalekeshi antu kwendela hela kuya nakuhempula habeteli. Cheñi chineli nfulumendi yinalekeshi kupompa mumazanvu amaneni, chinaleteshi tusanji kulekesha kupompa kwañinza kwejima. Kubombelahu, mumaluña amakwawu yipompelu yinahimpi njila jakushimwina nikupompa kwahachipompelu. Hela anakumona iku kukala, amanakwetu anatwalekihu kudituña kuspiritu nikudikolesha wumu namukwawu.—Yuda 20, 21.

Chineli anakuhita muniku kukala, iyi yishina yidi heshina yinayikwashi nankashi amanakwetu. Iyi yikuma yinateli kuyikwasha enu nichisaka chenu neyi mwiluña denu munaholoki ichi chikatu.

• Bayi Musweja Kwakamaku. Hela chakwila chachiwahi kwikala asoñama nayipupu nikuleka kwila yuma yimu kulonda tudikiñi, hitwatela kusweja kwakama hamuloña wakutiya womaku.—Yishimu 14:15; Isaya 30:15.

• Londelenuña Nshimbi Yinakuyinkawu Kudi Nfulumendi. Kakavulu akwawuswa amwiluña detu atulejaña yuma yitwatela kwila kulonda tudikiñi hela kulekesha yuma yimu kulonda antu ejima ekali akiñewa. Chachiwahi kovwahila nshimbi yinakutulejawu kudi nfulumendi.—Aroma 13:1.

• Ikalenu Nawunyonji. Chalema nankashi kwisuka kumakasa nasopu mpinji yejima hela kuzatisha yitumbu yinakutenawu nawu handi sanitiyiza. Cheñi twatela kuwahishaña mpinji yejima hamaluña itwakwatakwataña nankashi kumatala etu nikwitala daWanta. Kubombelahu, andotolu anakukaanisha kudimusha mumakasa, muloña chiteli kutandisha ichi chikatu. Kutalisha kunichi chikatu chacoronavirus mutayi waWorld Health Organization nahani nshimbi jikwawu jatela kulondelañawu antu.

• Mwekeshenuña Nenu Mwakeña Akwenu. Chineli wejima wetu tweluka netu kuya nakupompa nikushimwina kwalema, neyi mwakata, chikuwaha kushakama kwitala kuchina mwakenda kusambwisha akwenu. Ichi chamwekeshaña nawu twayikeña nawa tunakukeña kuyikiña amanakwetu nihela kushilahu niantu abula kwikala aYinsahu.—Matewu 22:39.

• Londelenuña Yuma Yinashimuni Chipompelu. Mumaluña munaholoki ichi chipupu, chikuwaha neyi kasanji kamutayi kakulekesha kupompa kwahachipompelu, kupompa kwamaneni nikupompa kukwawu. Dichineliwu mumaluña amakwawu muchinasweji ichi chikatu chaCOVID-19, chidi neyi maluña amakwawu amuItaly, Japan, niSouth Korea. Kwesekeja nachidi yuma mwiluña denu, akulumpi anateli kwila rekodi kupompa kwejima, kulonda akwakushimwina atalileña kumatalawu. Akwakushimwina anateli kushimwina kuzatishaña mafoni, mameseji, maimelu, hela kusoneka nyikanda.

Heshina hadi nyikanda mudi yishina yinateli kuyikwasha kudikiña kuyikatu.

• “Protect Yourself From Disease” Awake! No. 6 2016, mafu 4-6

• “Ways to Improve Your Health” Awake! June 2015, mafu 2-7

• “You Can Improve Your Health: Key 4—Protect Your Health” Awake! March 2011, ifu 7