Etu aYinsahu jaYehova, twazataña nañovu kulonda tukoleshi yisaka yetu, niyawantuñi netu. Hakwikala Nleñi, tweluka netu Nzambi diyi washiliku yisaka. (Kutachika 2:​21-​24; Aefwesesa 3:​14, 15) MuBayibolu, mwekala yishina yinakwashi antu amavulu mukaayi kejima kwikala nayisaka yakola nawa yamuzañalu.

 Twazataña nañovu wejima wetu kwovwahila kufumba kwamuBayibolu, muloña kwatukwashaña kwikala anvwali amawahi. (Yishimu 31:10-​31; Aefwesesa 5:⁠22–​6:4; 1 Timotewu 5:8) Maana ekala muBayibolu anakwashi yisaka yawantu akuhwelela yuma yambuka kwikala yakola. (1 Petulu 3:​1, 2) Talenu chahosheliwu antu abula kwikala aYinsahu chelili enikwawu ekali aYinsahu jaYehova:

•   “Yaaka 6 yahitilihu kufuma hitwadisumbwili twadiña hohu nakudihilila nikubobola. Chelili Ivete yekali Chinsahu chaYehova, wekalili mumbanda wamuwahi nawa wadiwunjika. Chahimpiliyi wulu wetu wakoleli.”​—Clauir, wakuBrazil.

•   “Nfumwami Chansa chatachikiliyi kudiza Bayibolu nawaYinsahu jaYehova, namukaanishileña muloña nelukili nami wena asandaña yisaka. Kufuma hatachikiliyi kudiza, Bayibolu yinatukwashi muwulu wetu.”​—Agness, wamu Zambia.

 Mumudimu wakushimwina, twakwashaña antu kwiluka maana ekala muBayibolu chiyanateli kuyikwasha niwena

•   Kutonda chiwahi muntu wakwiñila nindi muwulu

•   Kwiluka chakumanisha kukala kwekala muwulu chaaka chimunadisumbuli

•   Chakutiyashana nawatuwuku

•   Kwiluka chakuzatisha mali

•   Kubula kubobola

•   Chakudanakena

•   Chakudizisha anyanenu

 Chakadi nikujina, mpinji yikwawu kwaletaña wufwinda. Chakutalilahu, lipoti yamu 1998 yashimwiniwu kudi kampani yawakwakusandujola yaSofres yawanini nawu mawulu amavulu akwila muntu wumu hohu diyi wadiña Chinsahu mwadiña wufwinda hakwila nawu muntu wumu yafumi munsakililu yindi.

 Yesu washimwineñahu dehi nindi antu ejima alondelaña ntañishilu yindi mpinji yikwawu akumonaña kukala muyisaka. (Matewu 10:32-​36) Mukwakushimuna nsañu Will Durant wasonekeli nindi muChiyuulu chawaRoma, “akwaKristu ayinkeleña muloña wakusanda nyikala,” a aYinsahu jaYehova niwena makonu amonaña kukala kwokumu. Komana chinayi mukwila nawu aYinsahu diwu aletaña wufwinda muwulu?

 Chasompeleñawu muloña wayitwambililiwu aYinsahu jaYehova wakusanda yisaka, chota chanyiloña chaEuropean Court of Human Rights chahosheli nawu antu amuchisaka abula kwikala aYinsahu kakavulu diwu aletaña wufwinda muloña “akaanaña kulemesha yuma yakuhwelelawu antaña jawu niwuswa wawu wakwila yuma yakuhwelelawu.” Chota chahosheli cheñi nawu: “Yuma yamuchidiwu yavula kumwekana nankashi neyi antu adisumbula akuhwelela yuma yambuka, kushilahu tuhu niaYinsahu jaYehova.” b Hela chakwila antu alemesha yuma yakuhwelelawu akwawu wanyi, aYinsahu jaYehova azataña nañovu kulondela kufumba kwekala muBayibolu kwakwila nawu: “Bayi mufuntisha katama nakatama kudi muntu hela wumuku. . . . Neyi chinatwesheki, ikalenu awunda nawantu ejima kwesekeja nahanakumini ñovu jenu.”​—Aroma 12:17, 18.

 A Yinsahu ovwahilaña nshimbi jamuBayibolu jahosha hakusumbwila hela kusumbukila “chiña hohu mudi Mwanta,” dikwila nawu kusumbula hela kusumbuka namuntu wakuhwelela yuma yoyimu. (1 Akorinda 7:​39) Ilu lushimbi lwekala muBayibolu nawa lwakwashanaña. Chakutalilahu, chibaaba chamu 2010 chidi mumukanda wahosha hawulu niyisaka chahosheli nawu “adisumbula akuhwelela yuma yoyimu nawa elaña yuma yoyimu” kakavulu ekalaña nawulu wakola. c

 Hela chochu, aYinsahu hiyalejaña akwawu kudiseña nawenikwawu abula kwikala aYinsahuku. Bayibolu yahosha nawu: “Neyi manakwetu wudi namumbanda wabula kwitiya nawa owu mumbanda neteji kushakama hamu nindi, owu manakwetu hatela kumushiya iwu mumbandaku; nawa neyi mumbanda wudi neyala wabula kwitiya nawa owu iyala neteji kushakama hamu nindi, owu mumbanda hatela kumushiya iwu nfumwindiku.” (1 Akorinda 7:​12, 13) A Yinsahu jaYehova ovwahilaña ilu lushimbi.