MuAmerica atwansi amavulu ayihujoleli nawa awanini nawu mapesenti 80 anawa atwansi alombaña, ilaña mapesenti 40 hohu diwu alombaña ifuku dejima. Chakadi nikujina, amakwawu adihulaña nawu: ‘Kulomba kwanwundishaña hohu muchima tahindi kunateli kunkwasha?’

•  Kulomba hichumanyi?

•  Nzambi watiyaña?

•  Yumanyi yinatela kulomba?

•  Yuma yahoshañawu akwenu atwansi

Kulomba hinjila yitwahanjekelañamu naNleñi wayuma yejima. Dikwila nawu kulomba kwalema chikupu! Yehova wayibadika antu muyuma yejima, ilaña “hekala kwakulehi nanetu ejimaku.” (Yilwilu 17:27) Nawa, muBayibolu mwekala iwu mutambi: “Swinenu kwakwihi naNzambi, niyena wukuswina kwakwihi nanenu.”​—Yakoba 4:8.

Munateli kuswina ñahi kwakwihi naNzambi?

• Njila yimu hikulomba​—dimu mutwahanjekelaña naNzambi.

• Njila yikwawu hikudiza Bayibolu​—dimu ‘mwahoshelañayi’ Nzambi nanenu.

Iyi njila yakuhanjekelamu​—kulomba nikudiza Bayibolu​—kukuyikwasha kwikala nawubwambu wakola naNzambi.

“Kuhosha naYehova​—kuhanjeka naMukwakubadika​—hikukooleka kwabadika chikupu kwekala nawantu.”​—Jeremy.

“Kumuleja Yehova yuma yejima yidi kumuchima kuhitila mukulomba kwanleteshaña kuswina kwakwihi nayena.”​—Miranda.

Hela mwakuhwelela mudi Nzambi nawa hela mwalombaña, chinateli kwikala chakala kwiteja nenu watiyaña kulomba kwenu. Ilaña, Bayibolu yamushimuna Yehova nawu “watiyaña mwalombañawu antu.” (Masamu 65:2) Yayilejaña nawu “Muumbilenuña kwakama kwenu kwejima.” Muloñadi? “Muloña yena wayakamenaña.”​—1 Petulu 5:7.

Lwihu lumwatela kutoñojokahu: Mwekala nampinji yakuhanjeka nawamabwambu jenu mpinji yejima? Dichimwatela nikwilaña naNzambi. Hanjekenuña nindi mpinji yejima mukulomba nawa zatishenuña ijina dindi daYehova. (Masamu 86:​5-7; 88:9) Chakadi nikujina, Bayibolu yinakuyileja nawu “lombenuña mpinji yejima.”​—1 Atesalonika 5:​17.

“Nahanjekaña naTata yami wamwiwulu mukulomba, namulejaña yuma yejima yidi kumuchima wami.”​—Moises.

“Namulejaña Yehova yuma yakujinda, neyi chinateli kuhanjeka nawamama hela ibwambu dami inakeña.”​—Karen.

Bayibolu nayu: “Muyuma yejima, mukulomba nimukulomba kwakulembelela nimukusakilila, mulejenuña Nzambi yuma yonsu yimunakukeña.”​—Afwilipi 4:6.

Komana chinayi mukwila nawu chidi hohu chiwahi kukulejamu kukala kumukweti? Eña! Nawa, Bayibolu yahosha nawu: “Umbilaku chiteli cheyi hadi Yehova, yena wukukukwashaku.”​—Masamu 55:22.

Cheñi, neyi munakulomba kudi Nzambi, himwatela kumulejamu hohu kukala kumukwetiku. Kansi wamumbanda wejina daChantelle wahosheli nindi: “Wubwambu wami naYehova wukwikala wawuwahi wanyi neyi nikuminaña dakulomba nami yankwashi. Natiyaña nami natela kumusakilila Nzambi henohu kanda nilombi yuma yejima yinnakukeña.”

Lwihu lumwatela kutoñojokahu: Yumanyi yimukweti muchihandilu chenu yimwasakililaña? Kwila mutoñojokahu yuma yisatu yinayililiyi Yehova hanodu ifuku yimwatela kumusakilila nehi?

“Nihayuma yanyana, chidi neyi kutala nkenu jalubanji, kunateli kuyiletesha kumusakilila Yehova mukulomba.”​—Anita.

“Toñojokenu hanjila yatuñilamu yileñaleña yayizañaleshaña hela vasi yamuBayibolu yayishikaña hamuchima, nkumininaku musakililenu Yehova hanochu chuma.”​—Brian.