MALWIHU EHULAÑAWU ATWANSI
Bayibolu Yinateli Kunkwasha Ñahi? —Chibalu 2: Diluñishenuña Kutaña Bayibolu
Kansi wumu wejina daWill wahosheli nindi: “Bayibolu yinateli kutiyakana wuudi hakuyitaña, neyi wuneluki wanyi chakuyitaña.”
Mukukeña kwiluka yuma yinateli kuyikwasha mudiluñisheña kutaña Bayibolu? Chinu chibaaba chikuyikwasha hama.
Tiyishenuña Munatalishi jiNsona
Toñojokenuña chikupu hansañu yimunakutaña. Munatali kuzatisha iyi njila:
Sakulenu nsañu yamuBayibolu yimunakukeña kudiza. Munateli kutonda nsañu yekala munyikanda yaNsañu Yayiwahi, hela munateli kusakula nsañu yidi muyimwenu yamuBayibolu yakutaña ha jw.org.
Yitañenu. Munateli kutaña nkawenu, hela kutañila hamu nebwambu denu indi kwiji nawantaña jenu. Wumu wukutañila hadi mukwakushimuna nsañu amakwawu akutañila hadi antu adimu.
Esekenu kuzatishahu njila yimu hela jajivulu haniji jidi heshina:
Leñenu nyevulu yansañu yimunakutaña. Hela leñenu nyevulu yapela mundonda yinakumwekesha yuma yamwekeneña. Sonekenu tumazu hamwevulu tunakulumbulula yuma yamwekeneña.
Leñenu madayagilamu. Chakutalilahu, neyi munakutaña hadi muntu wadiña washinshika, esekejenu yilwilu yindi niyuma yelileñayi nankisu yatambwililiyi.
Fwikijenu neyi hinsañu yinakumwekana katataka. Ilenu lipoti yuma yinakumwekana munjila yashiyashana nawa “mwihujoli” yomweni oyu nsañu niantu anakumonaku.
Neyi wumu hadowu antu adi munoyu nsañu yimunakutaña wafuukwili mwaluwa, fwikijenu yuma yadi kufumamu neyi wafuukwili chiwahi. Chakutalilahu, toñojokenu Petulu chamukaaniniyi Yesu. (Maku 14:66-72) Petulu wadi kwakula ñahi chiwahi hampinji yadiña muniku kukala?
Neyi munamoni nenu mukutwesha, sonekenu enu aweni chimwenu chinashindameni hansañu yamuBayibolu yimunakutaña. Shimunenumu yuma yimunateli kudizila kunoyu nsañu.—Aroma 15:4.
Munateli kudiluñisha kudiza Bayibolu!
Sandujolenu!
Neyi mushinshika chikupu oyu nsañu, munateli kudizilaku yuma yimwabulili kwiluka. Nawa, mpinji yikwawu munateli kuwanamu izu dimu hela ayedi akuyikwasha.
Chakutalilahu, esekejenu Matewu 28:7 naMaku 16:7.
Muloñadi Maku chabombeleleliku nindi Yesu wukumwekana kudi atumbanji “niPetulu”?
Mazu Akuyikwasha: Maku wadiñahu wanyi hamwekeneña iyi yuma; chakadi nikujina, Petulu diyi wamulejeli iyi nsañu.
Yuma yimwabulili kwiluka: Muloñadi Petulu chadi kubulila kudakamenayi hakutiya nindi Yesu wakeñeleña kudimona nindi cheñi? (Maku 14:66-72) Yesu wamwekesheli ñahi nindi Petulu wadiña ibwambu dindi walala? Munateli kumwimbujola ñahi Yesu hakwila mwikali ibwambu walala?
Neyi mutiyishishaña Nsona nawa musandujolaña, mukudiluñishaña kudiza Bayibolu!