Eña, Bayibolu yashimuna yuma yamwekeshaña nawu Nzambi wekala kwoku. Yatulejaña kumukuhwelela Nzambi, bayi kuhitila mukukuhwelela yuma yahoshaña nsakililuku, ilaña kuzatisha “wuswa [wetu] wakutoñojoka” ‘nimaana.’ (Aroma 12:1; 1 Yowanu 5:​20, tumazu twaheshina) Talenu yuma yashiyashana yahoshañawu antu haBayibolu:

• Yuma yejima yekala nawumi yamwekeshaña nawu kwekala Nleñi. Bayibolu yahosha nawu: “Kafwampi, itala dejima kudi muntu wadituñaña, ilaña waleñeli yuma yejima, hiNzambi.” (Aheberu 3:4) Hela chakwila iyi nsañu yapela, antu amavulu ataña aneteji nawu yalala. *

• Etu antu twakeñaña kwiluka kutwafuma nichatuleñeleluwu, iyi hinzala yabulaña kumana hela chakwila tukwila nayuma yakumujimba yitwakeñaña. MuBayibolu ayitenaña nawu ‘nzala yakuspiritu,’ mwabombela kufwila kumwiluka Nzambi nikudifukula kudi yena. (Matewu 5:3; Chimwekeshu 4:​11) Iyi nzala yakuspiritu yatukwashaña kwiluka nawu Nzambi wekala kwoku nawa yamwekeshaña nawu hiNleñi yetu wukweti kukeña watwinkaña yakuda yakuspiritu.​—Matewu 4:4.

• Wuprofwetu washimwineñahu dehi muBayibolu awusonekeli kunyima nawa washikijeweli neyi chashimwineñahu dehi. Iyi nsañu yoloka niyuma yaprofweteluwu yamwekeshaña chikupu nawu yafumini kunsulu yabadika.​—2 Petulu 1:​21.

• Ansoneki aBayibolu adiña namaana asweja chikupu hakwila nawu asoneki. Chakutalilahu, kunyima antu akuhweleleli nawu iseki adikwata kudi kanyama chidi neyi nzovu, chombu, hela ñombi wampata. Kwambukaku, Bayibolu yahosha nawu Nzambi “wakudika iseki hamukunkulwayi.” (Yoba 26:7) Munjila yoyimu Bayibolu, yalumbulula chiwahi nawu iseki dekala neyi “chikelubula.” (Isaya 40:22) Antu amavulu eluka nawu Nzambi diyi wayilejeli ansoneki aBayibolu yuma yakusoneka hakwila nawu ashimuni nsañu yakunama.

• Bayibolu yakula malwihu amavulu akala, malwihu akwila neyi kuyakula chiwahi nehi anateli kuletesha muntu kukuhwelela nindi Nzambi wekalaku wanyi. Chakutalilahu: Neyi Nzambi hikukeña nawa wukweti ñovu, muloñadi chitwakabakenaña nawa muloñadi mukaayi chimunenzeli kutama? Muloñadi nsakililu chiyelilaña yuma yatama chatela akoñeña yuma yayiwahi?​—Titusa 1:​16.