Spiritu yajila hiñovu yaNzambi yamwekenaña muyuma yelañayi, hiñovu yindi. (Mika 3:8; Luka 1:​35) Nzambi watemeshaña spiritu yindi yajila kulonda yahani ñovu hakwila eli nkeñelu yindi.​—Masamu 104:30; 139:7.

MuBayibolu izu ‘daspiritu,’ adibalumuna kufuma kwizu dachiHeberu daruʹach niizu dachiGriki dapneuʹma. Kakavulu, awa mazu atalisha kuñovu yaNzambi, hela spiritu yajila. (Kutachika 1:2) Hela chochu, Bayibolu cheñi yazatisha awa mazu munjila yikwawu:

• Muuya.​—Habakuki 2:​19; Chimwekeshu 13:15.

• Mpepela.​—Kutachika 8:1; Yowanu 3:8.

• Muuya hela ñovu yekala muyileñaleña yonaña.​—Yoba 34:14, 15.

• Yilwilu yekala namuntu hela chekalayi.​—Kuchinda 14:24.

• Antu akuspiritu, kushilahu niNzambi niañelu.​—1 Anyanta 22:21; Yowanu 4:​24.

Iyi hiyuma yabulaña kumonawu antu namesu ilaña yakwashanaña. Munjila yoyimu, spiritu yaNzambi, “kufwana mpepela, hiyamwekanañaku, ilaña hiñovu.”​—An Expository Dictionary of New Testament Words, by W. E. Vine.

Bayibolu yashimuna cheñi spiritu yajila yaNzambi nawu ‘himakasa’ hela ‘nyinu’ yindi. (Masamu 8:3; 19:1; Luka 11:20; esekejenu Matewu 12:28.) Neyi chazatishañayi mukwawukalawenu makasa ninyinu yindi hakwila yazati mudimu windi, Nzambi wazatishili spiritu yindi hakwila yuma yamuchidiwu:

• Mawulu niiseki.​—Masamu 33:6; Isaya 66:​1, 2.

• Bayibolu.​—2 Petulu 1:​20, 21.

• Yihayamisha yakoñeliwu ambuñindi akunyima nimudimu wakushimwina wazatiliwu.​—Luka 4:​18; Yilwilu 1:8; 1 Akorinda 12:​4-​11.

• Yilwilu yayiwahi yamwekesheli antu amwovwahilileña.​—Añalija 5:​22, 23.

Spiritu yajila himuntu wanyi

Bayibolu chiyesekeja spiritu yaNzambi ‘namakasa,’ ‘nyinu’ yindi hela ‘muuya,’ yamwekesha nawu spiritu yajila himuntu wanyi. (Kwidika 15:​8, 10) Makasa amukawukalawenu hiyanateli kuzata nkawawu chakadi yitoñojoka nimujimba windiku; munjila yoyimu, spiritu yaNzambi yinateli kuzata hohu chiña neyi ayilombola. (Luka 11:13) Bayibolu yesekeja cheñi spiritu yajila yaNzambi namenji nawa ayifwanisha nachikuhwelelu nimaana. Yuma yejimiyi yinakumwekesha nawu spiritu yajila himuntu wanyi.​—Isaya 44:3; Yilwilu 6:5; 2 Akorinda 6:6.

Bayibolu yashimuna ijina daYehova Nzambi nimwanindi, Yesu Kristu; ilaña hosi hiyashimuna ijina daspiritu yajila. (Isaya 42:8; Luka 1:​31) Chelili mukwaKristu Stefwanu yamoni chimwenu chakuhayamisha chamumawulu, wamweni antu ayedi hohu, bayi asatuku. Bayibolu yahosha nawu Stefwanu chenzeliyi “naspiritu yajila, watalili mwiwulu nawa wamweni kulema kwaNzambi nikulema kwaYesu iku nemani kuchikasa chaNzambi chachidiilu.” (Yilwilu 7:​55) Spiritu yajila hiñovu yaNzambi, yamukwashili Stefwanu kumona chimwenu.

Nsañu yakutwamba: “Spiritu Wajila” hela spiritu yajila, hintañishilu yakwila nawu Nzambi wekala musatu, neyi chashimunawu haMatewu 28:​19, 20.

Nsañu yalala: HaMatewu 28:​19, 20 hekala mazu akwila nawu, Tata, Mwana, niSpiritu yajila: Muloña anawa mazu antu amakwawu ahoshaña nawu Nzambi wekala musatu. Ilaña ditañilenu awa mavasi enu aweni. Hadihu mazu anakumwekesha nawu hadi Nzambi asatu akweti ñovu yoyimu, chifulu nimaana wowamu?.’ Inehi mwani hosi. Dichidi nimavasi amakwawu atena awa mazu asatu hamu.

Nsañu yakutwamba: Bayibolu yesekejaña spiritu yajila namuntu, chinakumwekesha nawu spiritu yajila himuntu.

Nsañu yalala: Mpinji yikwawu Nsona yesekejaña spiritu yajila nayuma yelañawu antu. Yesu wesekejeli spiritu yajila “nankwashi” (paraclete) washimunaña wunsahu, walombolaña, kuhosha, kutiya, kushimuna, kujilika, nikutambwila. (Yowanu 16:​7-​15) Ilaña hichinayi mukwila nawu spiritu yajila himuntuku. Bayibolu yesekeja cheñi maana, kufwa ninshidi nayuma yelañawu antu. (Yishimu 1:​20; Aroma 5:​17, 21) Chakutalilahu, maana ayishimuna nawu akweti “nyidimu” nawa akweti “nyana,” nawa nshidi ayesekeja nakudimbana, kujahana nilwisu.​—Matewu 11:19; Luka 7:​35; Aroma 7:​8, 11.

Nsañu yakutwamba: Kupapatisha mwijina daspiritu yajila kwamwekeshaña nawu spiritu yajila himuntu.

Nsañu yalala: Mpinji yikwawu Bayibolu yazatisha izu dakwila nawu “ijina” kwimenaku ñovu. (Kuhituluka 18:​5, 19-​22; Esita 8:​10) Iyi nsañu yinadifwaniku nachayizatishawu mumazu akwila nawu “mwijina danshimbi,” abula kutalisha mukwila nawu nshimbi himuntu. Muntu apapatishañawu ‘mwijina’ daspiritu yajila welukaña ñovu nimudimu wazataña spiritu yajila wakushikija nkeñelu yaNzambi.​—Matewu 28:19.

Nsañu yakutwamba: Atumbanji twaYesu niapostolu amakwawu akunyima akuhweleleli nawu spiritu yajila himuntu.

Nsañu yalala: Bayibolu ninsañu yakunyima dichiyahosha wanyi. Encyclopædia Britannica yahosheli nawu: “Nsañu yakutwamba yakwila nawu Spiritu Yajila himuntu . . . atachikili kuyihosha muchota chaConstantinople mu ad 381.” Ichi chuma chamwekeni chimwahitili yaaka kubadika ha 250 kufuma hafwiluwu apostolu.