Nzambi wasonekeli Bayibolu Yajila kulonda ahanjekeña nanetu. Twatela kuyidizaña kulonda tumwiluki Nsoneki wayu. (Yowanu 17:3; 2 Timotewu 3:16) Dimwalumbulwilayi Yehova Nzambi chaleñeleliyi antu niiseki hashakamañawu.—Kutachika 3:15; Chimwekeshu 21:3, 4.

Kwosi mukanda wukwawu wunateli kuhimpa chihandilu chawantuku. Bayibolu yatukwashaña kwikala nayilwilu yaYehova yidi neyi kukeña, luwi niwushona. Yatukwashaña kuchiñeja, nikukwasha antu kuumika kukala kwasweja. Nawa yasololaña yuma yamukanu kaayi yaambukaku nankeñelu yaNzambi yawanina.—Masamu 119:105; AHeberu 4:12; 1 Yowanu 2:15-17.

Hatachi Bayibolu ayisonekeli muchiHeberu, muchiAramayiki nimuchiGiriki, anayibalumuni yamukuma hela yachibalu mumadimi kubadika ha 3,000. Kufuma tuhu kunyaaka, kwosi mukanda wunabalumuniwu nakuwuhana mukaayi kejima neyi Bayiboluku. Dichatela kwikala Bayibolu. Wuprofwetu wamuBayibolu wahosha nawu: “Niniyi nsañu yayiwahi yaWanta [nsañu yalema yekala muBayibolu] akayishimwina mwahita iseki dejima mwashakamawu antu kulonda yakekali wunsahu kunyuza yejima, kuhiñahu dinu kukuma kwakenzi.”—Matewu 24:14.

Muloña wakwiluka kulema kwansañu yekala muBayibolu, tunayibalumuni kwesekeja nachadiña nsona yayeni yakusambila nawa iyi Bayibolu yapela kutaña nikutiya. Nyitu yidi muNsañu Jikwawu yidi neyi “Yishina Yakubalumwinamu Bayibolu,” “Yuma Yidi Muyinu Bayibolu,” nawa “Bayibolu Chiyenjili Kudi Etu” yinalumbululi nshimbi yalondeleleñawu hakubalumuna niyuma yikwawu yidi muyinu Bayibolu.

Antu amukeña Yehova Nzambi nawa adifukulaña kudi yena, akeñaña kwikala Nezu daNzambi dabalumunawu choloka nawa dapela kutiya. (1 Timotewu 2:4) Dichi, tunabalumuni yinu Bayibolu muLunda nawa tunakufwila kubalumuna Bayibolu yaNsona jaKaayi Kakaha mumadimi amavulu. Tunakuhweleli nikulomba netu, yinu Bayibolu yaNsona Yajila yikuyikwasha chikupu hampinji yimunakufwila ‘kumukeñakeña Nzambi . . . nakumuwana.’—Yilwilu 17:27.