LWIHU 6
Bayibolu Yashimwineñahu Dehi Nawudi Kutalisha Hadi Mesiya?
WUPROFWETU
“Eyi, eyi Betelemi Efurata, . . . mudi eyi dimwakafuma wami wakekala nyuuli muIsarela.”
KUSHIKIJEWA
“Chelili Yesu navwaliki dehi muBetelemi yamuYudeya mumafuku ayuulileñayi mwanta Herodi, akakuhoña natutumbwa enjili kuYerusalema kufuma kuMusela.”
WUPROFWETU
“Adanzañenaña mulwawu yakuvwala yami, nawa asakulaña yakuvwala yami nachinjikijilu.”
KUSHIKIJEWA
“Dichi mashidika chamupopeleliwu Yesu hamutondu, anoneli yakuvwala yindi yahewulu nakuyanzañana hawana . . . Ilaña chakuvwala chamukachi hichadiña namuchiminuku, muloña chadiña chakupikula kufuma kwiwulu kushika kwishina. Adilejeli mulwawu nawu: ‘Bayi tuchitabulaku, ilaña tusakulenu nachinjikijilu kulonda twiluki wukuchisenda.’”
WUPROFWETU
“Nakuhemba mafwaha indi ejima; kwosi nidimu dinakotokiku.”
KUSHIKIJEWA
“Chashikiliwu hadi Yesu, amuwanini nafwi dehi, dichi hiyakotweli nyendu yindiku.”
WUPROFWETU
“Amupwikili hamuloña wakwila twafumpili nshimbi.”
KUSHIKIJEWA
“Mushidika wumu wamupwikili iyoña kukabavu, hohenohu mashi nimenji edikili.”
WUPROFWETU
“Anfweteli wufwetu wami, yikunku yasiliva 30.”
KUSHIKIJEWA
“Henohu wumu hakachi kawapostolu 12, atenañawu nawu Yudasi Isakaroti, wayili kudi akulumpi jawatupristu nawa wayihwili nindi: “Chumanyi chimukunyinka hakwila niyifukejeliyi?” Wena amulejeli nawu tukukwinka yikunku yasiliva 30.”
