Kushindulula Watachi 10:1-14
-
Kufwa kwaSawulu nianyanindi awamayala (1-14)
10 Dichi aFilisitinu azuñileña nawaIsarela. Nawa aIsarela ayitemukili aFilisitinu nawa amavulu ayijahilili haMpidi yaGilibowa.+
2 AFilisitinu akumpishili Sawulu nianyanindi awamayala nakuyilemamu chikupu, nawa aFilisitinu atapili anyana kaSawulu, Yonatani, Abinadabi niMalikishuwa.+
3 Njita yamukoleleli nankashi Sawulu nawa amuwanini kudi akakwasa mata anyikunji, dichi amukatishili kudi akakwasa namata anyikunji.+
4 Kuhiñahu, Sawulu wamwilili mukakumusendela yitwa yanjita nindi: “Holaku mpoku yeyi yakabali wunhanwishiyu kulonda awa amayala ayidima abuli kwinza nakunkabisha.”*+ Ilaña mukakumusendela yitwa yanjita wakaanini muloña watiyili woma chikupu. Dichi Sawulu wanoneli mpoku yakabali nakudimbukilaku.+
5 Mukakumusendela yitwa yanjita chamweniyi nindi Sawulu nafwi dehi, niyena wadimbukilili kumpoku yindi yakabali nawa wafwili.
6 Dichi, Sawulu nianyanindi asatu afwili, niamwitala dindi ejima afwilili hamu.+
7 Antu jaIsarela ejima adiña muchinekineki chamweniwu nawu antu ejima anatemuki nawa Sawulu nianyanindi awamayala anafwi dehi, atachikili kufuma munyisumba yawu nakutemuka; kufumahu, aFilisitinu enjili nakushakamamu.
8 Ifuku dalondelelihu, aFilisitinu chenjiliwu nakuvuula antu ajahiliwu, awanini Sawulu nianyanindi awamayala anafwili haMpidi yaGilibowa.+
9 Dichi amuvuulili yakuvwala niyitwa yindi yanjita nawa amuketwili mutu, kuhiñahu, atemesheli mazu mwituña dejima dawaFilisitinu nakutaandisha iyi nsañu kudi ankishi jawu+ nikudi antu.
10 Kufumahu, atentekeli yitwa yindi yanjita mwitala* danzambi yawu nikupopela kawekesi kindi kwitala daDagoni.+
11 Antu ejima amuYabeshi+ muGiliyadi chatiyiliwu yuma yejima yamwililiwu Sawulu kudi aFilisitinu,+
12 akakuzuña njita ejima anyamukili nawa asendeli chibimbi chaSawulu niyibimbi yawanyanindi awamayala. Ayileteli kuYabeshi nawa ajiikili mafwaha awu mwishina damutondu weneni muYabeshi+ nawa ashakamini chakadi kuda mafuku 7.
13 Dichi Sawulu wafwili muloña wakubula kwikala washinshika kudi Yehova nanochu chabulili kwovwahilayi izu daYehova+ nihamuloña wakwihula mukakuhoña nawandemoni+
14 chatela ehuli kudi Yehova. Dichi Nzambi wamujahili nawa wahanini wanta kudi Davidi mwana kaYesi.+