Kushindulula Watachi 15:1-29
15 Nawa watwalekelihu kutuña matala indi muMusumba waDavidi nawa waloñesheli iluña dakushamu Chimbañu chaNzambi walala nikuchilemena itenti.+
2 Haniyi mpinji dihahosheliyi Davidi nindi: “Kwosi muntu wacheñi watela kusenda Chimbañu chaNzambi walalaku, chiña aLevi hohu, muloña Yehova nayitondi kulonda asendeña Chimbañu chaYehova nikumukalakela mpinji yejima.”+
3 Kufumahu, Davidi wapompesheli hamu aIsarela ejima kuYerusalema kulonda ayi nakuleta Chimbañu chaYehova nakuchitwala kwiluña dachiloñesheleliyi.+
4 Davidi wapompesheli hamu amuchisaka chaAroni+ niaLevi:+
5 mudi aKohati, mwafumini Uriyeli wadiña ntwamina niamanakwindi 120;
6 mudi aMerari, mwafumini Asaya+ wadiña ntwamina niamanakwindi 220;
7 mudi aGeshomu, mwafumini Yoweli+ wadiña ntwamina niamanakwindi 130;
8 mudi akachisaka chaElizafani,+ mwafumini Shemaya wadiña ntwamina niamanakwindi 200;
9 mudi akachisaka chaHebironi, mwafumini Eliyeli wadiña ntwamina niamanakwindi 80;
10 mudi akachisaka chaUziyeli,+ mwafumini Aminadabi wadiña ntwamina niamanakwindi 112.
11 Kubombelahu, Davidi watambikili atupristu, aZadoki+ naAbiyatari+ niaLevi, aUriyeli, Asaya, Yoweli, Shemaya, Eliyeli niAminadabi,
12 nawa wayilejeli nindi: “Yenu anlomboli janyitaña yawaLevi. Dijilikenu, enu niamanakwenu kulonda muyi nakuleta Chimbañu chaYehova Nzambi yaIsarela muchitwali kwiluña dinnachiloñesheli.
13 Chineli himwachisendeli hakusambilaku,+ Yehova Nzambi yetu watuzuwilili,+ muloña hitwalondeleli mwashimwiniyiku.”+
14 Dichi atupristu niaLevi adijilikili kulonda ayi nakuleta Chimbañu chaYehova Nzambi yaIsarela.
15 Kuhiñahu, aLevi asendeli Chimbañu chaNzambi walala hamafwiji awu nanyalachi+ neyi chayilejeliyi Mosi kwesekeja namazu amulejeliwu kudi Yehova.
16 Kufumahu, Davidi walejeli akulumpi jawaLevi kutonda amanakwawu añimbi kulonda embi namuzañalu, iku anakuvumisha yisanji: yisanji yanyonji, tudada+ niyifwoyu.+
17 Dichi aLevi atondeli Hemani+ mwana kaYoweli, mudi amanakwindi atondelimu Asafi+ mwana kaBerekiya nawa mudi amanakwawu aMerari, atondelimu Etani+ mwana kaKushaya.
18 Amanakwawu amwizanvu damuchiyedi adiñawu nawu,+ adiña Zekariya, Beni, Yayaziyeli, Shemiramoti, Yehiyeli, Uni, Eliyabi, Benaya, Mayaseya, Matitiya, Elifelehu niMikineya nawa aObedi Edomi naYeyeli adiña akakuhemba kuchiisu.
19 Añimbi aHemani,+ Asafi+ niEtani diwu embileña yifwoyu yawuneñu;+
20 nawa Zekariya, Aziyeli, Shemiramoti, Yehiyeli, Uni, Eliyabi, Mayaseya niBenaya diwu embileña yisanji yanyonji nakwimbila muAlamoti;*+
21 nawa Matitiya,+ Elifelehu, Mikineya, Obed Edomi, Yeyeli niAzaziya embileña tudada nakwimbila muSheminiti,*+ diwu adiña akulumpi awakakwimba.
22 Kenaniya+ mukulumpi wawaLevi diyi watalileña mudimu wakusenda chimbañu, muloña wadiña wawilukisha chikupu,
23 nawa aBerekiya naElikana adiña akakuhemba Chimbañu.
24 Atupristu aShebaniya, Yoshafati, Netaneli, Amasayi, Zekariya, Benaya niEliyezeri diwu avumishileña jimpuña nachivumina chatiyakana nankashi kumbidi yaChimbañu chaNzambi walala,+ nawa aObedi Edomi naYehiya niwena adiña akakuhemba Chimbañu.
25 Dichi Davidi, akulumpi jawaIsarela niantwamina amakombakaji endeleleña hamu nakuleta chimbañu chachitiyañenu chaYehova kufuma kwitala daObedi Edomi+ namuzañalu.+
26 Nzambi walala chayikwashiliyi aLevi asendeli chimbañu chachitiyañenu chaYehova, alambwili anyana kañombi 7 ayizamba nianyana kanyikoku 7 ayizamba.+
27 Davidi wavwalili chakuvwala chakadi makasa chehina dadiwahi, kushilahu niaLevi ejima asendeli Chimbañu, añimbi niKenaniya mukulumpi watalileña mudimu wakusenda chimbañu niañimbi; Davidi wavwalili niifwodi* yehina.+
28 AIsarela ejima aleteleña chimbañu chachitiyañenu chaYehova iku anakubula nyiñula,+ nikuvumisha nseñu, jimpuña,+ yifwoyu nikuvumisha yivumina yatiyakana nankashi hayisanji yanyonji nihatudada.+
29 Ilaña chimbañu chachitiyañenu chaYehova chichenjili kuMusumba waDavidi,+ mwana kaSawulu wamumbanda Mikali+ wasumbilileña hawindu* nakutala mwishina nawa wamweni Mwanta Davidi nakukiloka nikuzañalala; nawa watachikili kumudiwula Davidi mumuchima windi.+
Tumazu twaheshina
^ Talenu Kulumbulula.
^ Talenu Kulumbulula.
^ Ichi hichakuvwala chakadi makasa chafwana apuloni.
^ Hela “njanina.”
