Kushindulula Watachi 16:1-43
16 Dichi eñijili Chimbañu chaNzambi walala nawa achishili mukachi ketenti dalemeneniyi Davidi chimbañu;+ nawa alambwili nyilambu yakushita ninyilambu yakuwunda kumesu aNzambi walala.+
2 Davidi chamanishiliyi kulambula nyilambu yakushita+ ninyilambu yakuwunda,+ wakiswilili antu mwijina daYehova.
3 Kuhiñahu, wayinkeli aIsarela ejima, iyala-hiiyala, mumbanda-himumbanda, dinkendi danjiñumuki, dinkendi datowala danyikaabu yanyikoma nidinkendi datowala danyikaabu yanyivinyu yooma.
4 Kufumahu, watondelihu aLevi kulonda akalakeleña kuChimbañu chaYehova,+ kumulemesha,* kumusakilila nikumuhameka Yehova Nzambi yaIsarela.
5 Asafi+ diyi wadiña ntwamina,* walondeleli hadi yena wadiña Zekariya; nawa Yeyeli, Shemiramoti, Yehiyeli, Matitiya, Eliyabi, Benaya, Obedi Edomi niYeyeli+ diwu embileña yisanji yanyonji nitudada;+ nawa Asafi wembileña yifwoyu,+
6 nawa atupristu aBenaya naYahaziyeli atwalekelihu kuvumisha jimpuña kumbidi yachimbañu chachitiyañenu chaNzambi walala.
7 Hanodi ifuku, diyi mpinji yatachi yasonekeliyi Davidi kamina kakumusakilila Yehova kuhitila mudi Asafi+ niamanakwindi nindi:
8 “Musakililenu Yehova,+ tambikenu hejina dindi,Lejenu nyichidi yawantu nyidimu yindi!+
9 Mwimbilenu, imbenu tumina twakumushimeka,+Toñojokenuhu chikupu* hanyidimu yindi yejima yakuhayamisha.+
10 Disambilenu hejina dindi dajila.+
Nyichima yanowu anakumukeñakeña Yehova yizañalali.+
11 Mukeñakeñenu Yehova+ niñovu jindi.
Lombenuña wukwashu windi* mpinji yejima.+
12 Anukenuña nyidimu yindi yakuhayamisha yinakoñiyi,+Yihayamisha yindi niwunsompeshi wunashimuniyi,
13 Enu anyana* kaIsarela kambuñindi,+Enu anyana kaYakoba awamayala, indi atondewa.+
14 Yena diyi Yehova Nzambi yetu.+
Wunsompeshi windi wekala mwahita iseki dejima.+
15 Mwanukeña chitiyañenu chindi haya nyaaka,Chikaninu chakaniniyi* kumakiñu ikombakaji,+
16 Chitiyañenu chatiyañeniyi naAbarahama,+Nikusanyika kwasanyikiliyi kudi Isaka,+
17 Ochu chelishiliyi kwikala lushimbi kudi Yakoba+Nawa chelishiliyi kwikala chitiyañenu chahaya nyaaka kudi Isarela,
18 Nindi, ‘Nakakwinka ituña daKenani+Dakekali wuswana wenu.’+
19 Chumichi chamwekeni himwadiña antesha,Antesha chikupu, nawa himwadiña añiinza mwituña.+
20 Ahitañeni kufuma kumuza wumu nakuya kumuza wukwawu,Kufuma kuwanta wumu nakuya kudi antu amakwawu.+
21 Hetejeli muntu hela wumu kuyikabishaku,+Ilaña hamuloña wawena, wazuwilili anyanta,+
22 Nindi, ‘Bayi mukwata antu jami awayishewaku,Nawa atuprofwetu ami bayi muyikoña chuma chatamaku.’+
23 Mwimbilenu Yehova, enu ejima ashakama hamaseki!
Bidikenu wamwinu windi hefuku-hefuku!+
24 Shimunenu kulema kwindi hakachi kanyuza,Nyidimu yindi yayiwahi hakachi kawantu ejima.
25 Muloña Yehova himuneni nawa watela kushimekewa chikupu.
Yena wakutiyisha woma chikupu kubadika anzambi ejima amakwawu.+
26 Anzambi ejima awantu hiyanzambi amukunkulwayi,+Ilaña Yehova diyi waleñeli mawulu.+
27 Wukeleñi* nilubanji jidi kumesu indi;+Ñovu nimuzañalu jidi mwiluña dindi mwashakamañayi.+
28 Enu yisaka yawantu, mulemeshenu Yehova,Mwinkenu Yehova kalemesha kamutelela muloña wakulema niñovu jindi.+
29 Mwinkenu Yehova kalemesha katelela ijina dindi;+Letenu chawaana nawa inzenu kumesu indi.+
Dibukenu* kudi Yehova iku munavwali yakuvwala yajila yalubanji.*+
30 Zaalenu kumesu indi, enu ejima ashakama hamaseki!
Iseki* adishimatisha chikupu; hiyanateli kudiswijaku.*+
31 Mawulu azañalali, nawa iseki dizañalali nankashi;+Shimunenu hakachi kanyuza nenu: ‘Yehova nekali Mwanta!’+
32 Kaluñalwiji kadidimi niyuma yejima yakinzesha;Mpata niyuma yejima yidimu jizañalali.
33 Hampinji yoyimu nyitondu yamwivunda yidikuwi namuzañalu kumesu aYehova,Muloña yena nakwinza* nakusompesha iseki.
34 Musakililenu Yehova, muloña himuwahi;+Kukeña kwindi kwakashinshi kwahaya nyaaka.+
35 Nawa hoshenu nenu, ‘Twamwini, eyi Nzambi yawamwinu wetu,+Tupompeshi nawa tupulwishi kudi akanyuza,Kulonda tusakilileña ijina deyi dajila+Nikuzañalala nakukushimeka.+
36 Yehova, Nzambi yaIsarela, ashimekewiHaya nyaaka nanyaaka.’”*
Nawa antu ejima ahosheli nawu, “Ameni!”* nawa amushimekeli Yehova.
37 Kufumahu, Davidi wamushiyili Asafi+ niamanakwindi kwenoku kumbidi yachimbañu chachitiyañenu chaYehova kulonda akalakeleña mpinji yejima kuChimbañu,+ kwesekeja namudimu wahefuku-hefuku.+
38 Obedi Edomi niamanakwindi adiña 68, nawa Obedi Edomi, mwana kaYedutuni niHosa adiña akakuhemba kuchiisu;
39 nawa kapristu Zadoki+ niakwawu atupristu adiña kumbidi yatabanaka yaYehova hachinañanaña kuGibeyoni+
40 kulonda alambuleña nyilambu yakushita kudi Yehova mpinji yejima hakameña kamulambu wakushita, ntetemena nimelela nikuzata yuma yejima yasonekawu muNshimbi jaYehova jalejeliyi aIsarela.+
41 Adiña hamu naHemani niYedutuni+ niamayala ejima anashali asakwiliwu, owu atondeliwu hamajina kulonda amusakilileña Yehova,+ muloña “kukeña kwindi kwakashinshi kwahaya nyaaka”;+
42 nawa adiña hamu naHemani+ niYedutuni kulonda avumisheña jimpuña, yifwoyu niyisanji yakuzatisha hakumushimeka Nzambi walala; nawa anyana kaYedutuni+ awamayala adiña kuchiisu.
43 Kufumahu, antu ejima ayili kunyikala yawu nawa Davidi wayili nakuyikiswila amwitala dindi.
Tumazu twaheshina
^ MuchiHeberu, “kwanuka.”
^ MuchiHeberu, “mutu.”
^ Hela hekwawu, “Hoshenuña.”
^ MuchiHeberu, “Keñakeñenu kumesu indi.”
^ Hela “amuchisaka.” MuchiHeberu, “mbutu.”
^ MuchiHeberu, “Izu dashimwiniyi.”
^ Hela “Kulema.”
^ Hela hekwawu, “muloña walubanji lwakujila kwindi.”
^ Hela “Difukulenu.”
^ Hela “iseki dawushi.”
^ Hela “kudinyenkeshaku; kuditedañeshaku.”
^ Hela “nenzi.”
^ Hela “Kufuma kunyaaka nakuya kunyaaka.”
^ Hela “Chiikali mwomwenomu!”
