Kushindulula Watachi 17:1-27
17 Davidi chashakaminiyi tuhu mwitala* dindi, wamulejeli kaprofwetu Natani+ nindi: “Talaña, ami inakushakama mwitala danyitondu yanyisida+ ilaña chimbañu chachitiyañenu chaYehova chidi mwitenti.”+
2 Natani wamwilili Davidi nindi: “Ilaku yuma yejima yidi kumuchima weyi, muloña Nzambi walala wudi naneyi.”
3 Hawowenowu wufuku, izu daNzambi denjili kudi Natani nawu:
4 “Yaña wumuleji kambuñami Davidi neyi, ‘Yehova nahoshi nindi: “Eyi yeyi wukuntuñila itala dakushakamamu wanyi.+
5 Muloña ami kanda nishakameñahu dehi mwitala kufuma tuhu hefuku dinayidishili aIsarela kushika nikwifuku dalelu, ilaña natwalekelihu kuhitañana kufuma kwitenti dimu nakuya kwitenti dikwawu nikufuma kutabanaka yimu nakuya kuyikwawu.*+
6 Mpinji yejima yinendeleña nawaIsarela ejima, komana nahoshahu dehi izu hela dimu kudi nsompeshi wumu hadi ansompeshi aIsarela inatondeli kulonda abiñeña antu jami aIsarela nami, ‘Muloñadi chimunabulili kuntuñila itala danyitondu yanyisida?’”’
7 “Dichi dinu wumuleji kambuñami Davidi neyi, ‘Yehova wamazaza nahoshi nindi: “Ami nakufumishili kuwudiilu wayimuna, kumudimu wakulondela mukanka wanyikoku kulonda wiikali nlomboli yawantu jami aIsarela.+
8 Nukwikalaña naneyi kwejima kuwukuyaña+ nawa nakakufumishila* ayilumbu jeyi ejima kumesu eyi;+ nawa nakatuumbakesha ijina deyi neyi chatuumbakana majina awantu alema ahamaseki.+
9 Antu jami aIsarela nakayitondela iluña dakushakamahu nawa akashakama henohu, nawa kwosi wakayiluwañesha cheñiku. Hiyakayikabisha cheñi kudi antu atama neyi cheliliwu kunyima,+
10 kufuma hefuku dinatondeli ansompeshi akusompesha antu jami aIsarelaku.+ Nawa nakemika mushindu ayilumbu jeyi ejima.+ Kubombelahu, inakukuleja nami, ‘Yehova wakakutuñila itala.’*
11 “‘“Neyi mafuku eyi anamani dehi nawa wunayi kwekala ankakulula jeyi, hadi eyi nakasinsishahu mwaneyi,* wumu hakachi kawanyaneyi awamayala,+ nawa nakamukoleshela chikupu wanta windi.+
12 Yena diyi wakantuñila itala+ nawa nakamukoleshela chikupu itanda dindi haya nyaaka.+
13 Ami nakekala tata yindi nawa yena wakekala mwanami.+ Kukeña kwami kwakashinshi hinakakufumisha hadi yena+ neyi chinakufumishili hadi owu iwalondeleli hanyimaku.+
14 Nakamutonda kwikala mwanta mwitala dami nimuwanta wami haya nyaaka,+ nawa itanda dindi dakashakama haya nyaaka.”’”+
15 Natani wamulejeli Davidi awa mazu ejima ninichi chimwenu chejima.
16 Hohenohu Mwanta Davidi weñilili mukachi nawa washakamini kumesu aYehova nakuhosha nindi: “Eyi Yehova Nzambi, ami yaminyi? Nawa itala dami dalemena hanka mwaka wuñilili yuma yamuchidiwu?+
17 Eyi Nzambi, hiwunakumini dakwila iyi yuma hohuku, wunahoshi nihetala danami kambuñeyi neyi dakatwalekahu kushika nikuyaaka yakumbidi kwakweni,+ nawa eyi Yehova Nzambi, wunammoni neyi nidi muntu atela kutuumbakeshawu cheñi.*
18 Yumanyi yinnateli kukuleja ami kambuñeyi Davidi hakulema kuwunanlemeshi henohu wañiluka chiwahi ami kambuñeyi?+
19 Eyi Yehova, muloña wanami kambuñeyi nichiwunafuukuli mumuchima weyi,* wuneli iyi yuma yejima yabadika nanochu chiwunammwekesheli kutoha kweyi kwasweja.+
20 Eyi Yehova, kwosi wudi neyi eyiku,+ nawa kwosi Nzambi mukwawu chiña eyi hohu;+ yuma yejima yitunatiyi namatu etu yinamwekeshi chumichi nawu chalala.
21 Nawa muzanyi wukwawu heseki wudi neyi antu jeyi aIsarela?+ Eyi Nzambi walala wayili nakuyikuula kulonda ekali antu jeyi.+ Wadituñilili eyi aweni ijina nanochu chiwelili yuma yabadika niyakutiyisha woma chikupu,+ nakupalañesha nyuza kudi antu+ jeyi iwakuulili muEjipitu.
22 Wayibalumwini antu jeyi aIsarela kwikala antu jeyi haya nyaaka;+ nawa eyi Yehova wekalili Nzambi yawu.+
23 Ichi dinu, eyi Yehova, chikaninu chiwunankani ami kambuñeyi niamwitala dami wuchihembeña mpinji yejima, nawa ilaku kwesekeja nachiwunakani.+
24 Ijina deyi ditwalekihu* nawa dituumbakani+ haya nyaaka kulonda antu ahoshi nawu, ‘Yehova wamazaza, Nzambi yaIsarela, hiNzambi kudi Isarela,’ nawa itala danami kambuñeyi Davidi diikali dakola chikupu kumesu eyi.+
25 Muloña eyi Nzambi yami, wunammwekesheli ami kambuñeyi nkeñelu yiwunakuntuñila itala.* Dihanafumi ami kambuñeyi nitweshi kulomba kudi eyi muniyi njila.
26 Dichi, eyi Yehova, yeyi Nzambi walala nawa wunankani ami kambuñeyi iyi yuma yayiwahi.
27 Dichi, tiyaku kuwaha kukiswila itala danami kambuñeyi nawa ditwalekihu haya nyaaka kumesu eyi, muloña eyi Yehova, wunadikiswili nawa dinakiswilewi haya nyaaka.”
Tumazu twaheshina
^ Hela “chipañu.”
^ Hadaha chinayi mukwila nawu, “kufuma kukabadi ketenti dimu nakuya kudikwawu nikufuma kwiluña dimu dakushakama nakuya kudikwawu.”
^ MuchiHeberu, “nakakuketwila.”
^ Hela “wanta.”
^ MuchiHeberu, “mbutu.”
^ Hela “muntu atela kwinkawu chifulu cheneni.”
^ Hela “kwesekeja nankeñelu yeyi.”
^ Hela “diikali dashinshika.”
^ Hela “wanta.”
