Kushindulula Watachi 21:1-30
21 Kufumahu, Satana* wayinyamukilili aIsarela nawa wamusañumwini Davidi kulonda achindi aIsarela.+
2 Dichi Davidi wamulejeli Yowabi+ niakulumpi jawantu nindi: “Yenu mwakachindi aIsarela kutachikila kuBeyerisheba nakushika kuDani;+ kuhiñahu mwinzi nakunleja kulonda niiluki kuvula kwawu.”
3 Ilaña Yowabi wahosheli nindi: “Yehova avulishi antu jindi mapampa 100! Eyi nkaaka yami mwanta, komana awa antu ejima hiyadi dehi ambuña aneyi nkaaka yamiku? Hanu dinu, muloñadi eyi nkaaka yami chiwunakukeña kukoñela chumichi? Muloñadi chiwukuleteshela aIsarela kuvulumuna?”
4 Ilaña mazu amwanta abadikili ñovu mazu aYowabi. Dichi Yowabi wafumini kwenoku nakuya nakuhitañana muIsarela, kuhiñahu, wenjili kuYerusalema.+
5 Kufumahu, Yowabi wamwinkeli Davidi kuvula kwawantu asonekeliwu. Amayala ejima akakuzuña njita aIsarela adimanyekeli mpoku jatubali adiña 1,100,000 nawa amayala akumuchidi waYuda adimanyekeli mpoku jatubali adiña 470,000.+
6 Ilaña muchidi wawaLevi niwawaBenjamini hiyayisonekeli hakachi kanawa antuku,+ muloña mazu ahosheliyi mwanta amutiyishili Yowabi kutama.+
7 Chumichi chamutiyishili Nzambi kutama nankashi, dichi wayibabesheli aIsarela.
8 Kuhiñahu, Davidi wamulejeli Nzambi walala nindi: “Navulumuni+ chikupu hakukoña chumichi. Dichi dinu, mwani ñanakeni ami kambuñeyi hachiluwa chami,+ muloña neli mwawusupi nankashi.”+
9 Kufumahu, Yehova wamulejeli Gadi,+ mukakumumwena Davidi yimwenu nindi:
10 “Yaña wakamuleji Davidi neyi, ‘Yehova nahoshi nindi: “Inakukwinka yuma yisatu wutondihu. Wutondihu chuma chiwukukeña nukwili.”’”
11 Dichi Gadi wayili kudi Davidi nakumwila nindi: “Yehova nahoshi nindi, ‘Tondakuhu chiwukukeña,
12 wukukeña yaaka yisatu yanzala yakapwelendendi,+ tahindi akwimikeña mushindu kudi akankunyi neyi hadi tukweji tusatu iku mpoku yakabali yawakankunyi neyi yinakukutapa,+ tahindi wukukeña akubabeshi kudi Yehova nampoku yakabali hadi mafuku asatu, hanawa mafuku asatu mwituña mukwikala chipupu+ nawa kañelu kaYehova wukujilumuna+ mumaluña ejima amuIsarela.’ Dichi toñojokakuhu kulonda wunleji chinatela kuya nakumuleja Owu wantemesha.”
13 Dichi Davidi wamulejeli Gadi nindi: “Chinankalili nankashi. Mwani niholokeli muchikasa chaYehova, muloña luwi lwindi lwabadika chikupu;+ ilaña bayi niholokela muchikasa chamuntuku.”+
14 Kufumahu Yehova wayitemesheleli aIsarela chipupu,+ chakwila antu 70,000 hadi aIsarela afwili.+
15 Kubombelahu, Nzambi walala watemesheli kañelu kuYerusalema kulonda amujilumuni; ilaña hadiñayi kwakwihi nakumujilumuna, Yehova wamweni chumichi nawa waditoñesheli* muloña wanochu chipupu chaleteliyi,+ dichi wamulejeli kañelu wajilumwineña antu nindi: “Kunahu!+ Ichi dinu hololaku chikasa cheyi.” Kañelu kaYehova wadiña wemana kwakwihi nawuhulilu waOrinani+ mwini Yebusi.+
16 Davidi chafumbwiliyi mesu, wamweni kañelu kaYehova nemani hakachi keseki newulu iku nakwati mpoku yakabali+ muchikasa chindi yakuhola dehi nawa nayolweli kukabadi kaYerusalema. Davidi niakulumpi avwalili yisasa,+ hohenohu wejima wawu adinatili chamesu heseki.+
17 Davidi wamwilili Nzambi walala nindi: “Komana ami hiyami nashimwini nami antu ayichindiku? Yami inavulumuni nawa yami nakoña chuma chatama,+ hakwila awa anyikoku, chumanyi chinakoñiwu? Eyi Yehova Nzambi yami, mwani chikasa cheyi chimbabeshi niamwitala datata yami; ilaña bayi wuleta ichi chipupu hadi antu jeyiku.”+
18 Kufumahu, kañelu kaYehova wamulejeli Gadi+ nindi ayi nakumuleja Davidi kulonda akanduki nakuya nakumutuñila Yehova kameña hawuhulilu waOrinani mwini Yebusi.+
19 Dichi Davidi wakandukili nakuya kwesekeja namazu aGadi, ahosheleliyi mwijina daYehova.
20 Haniyi mpinji, Orinani wabalumukili nawa wamweni kañelu, anyanindi awamayala awana adiñayi nawu aswamini. Hampinji yeniyi, Orinani wahulileña tidiku.
21 Davidi chayiliyi kudi yena, Orinani chelili nindi atali wamumweni Davidi, hohenohu wedikili kufuma kuwuhulilu nakunoñama chamesu heseki kudi Davidi.
22 Davidi wamwilili Orinani nindi: “Nlandishi* iluña dawuhulilu kulonda nimutuñilihu Yehova kameña. Wunlandishi nawuseya washikilamu chikupu, kulonda chipupu chinenzi hadi antu chihiti.”+
23 Ilaña Orinani wamulejeli Davidi nindi: “Wusendi wiikali weyi, nawa eyi nkaaka yami mwanta ilaku chejima chiwunamoni neyi chachiwahi.* Tambulaku awa añombi innakukwinka akulambula nyilambu yakushita, chuma chakuhula nachu+ kulonda chiikali nchawa nitidiku yakulambula mulambu wambutu. Yuma yejima nakwinki.”
24 Hela chochu, Mwanta Davidi wamulejeli Orinani nindi: “Inehi, nukuwulanda nawuseya washikilamu chikupu, muloña hinukutambula chuma cheyi nakumwinka Yehova hela kulambula nyilambu yakushita yakadi kufwetelaku.”+
25 Dichi Davidi wamwinkeli Orinani wuru yalemeni mashekeli* 600 kulonda alandi odu iluña.
26 Nawa Davidi wamutuñilili Yehova kameña+ henohu nawa walambwililihu nyilambu yakushita ninyilambu yakuwunda. Kuhiñahu, wamutambikili Yehova nawa yena wamwakwili nakesi+ kafumini mumawulu nakwinza hakameña kamulambu wakushita.
27 Kufumahu, Yehova wamulejeli kañelu+ nindi afuntishi mpoku yindi yakabali muchindalu chayu.
28 Hayina mpinji, Davidi chamweniyi nindi Yehova namwakwili kuwuhulilu waOrinani mwini Yebusi, watwalekelihu kulambula kwenoku.
29 Hela chochu, tabanaka yaYehova yatuñiliyi Mosi mwisaña nikameña kakulambwilahu mulambu wakushita hayina mpinji jadiña hachinañanaña kuGibeyoni.+
30 Ilaña Davidi hatwesheli kuya kwenoku nakumwihula Nzambiku, muloña watiyili woma wampoku yakabali yakañelu kaYehova.
Tumazu twaheshina
^ Hela hekwawu, “mukakukañesha.”
^ Hela “waneñeli.”
^ MuchiHeberu, “Nyinki.”
^ MuchiHeberu, “chachiwahi mumesu eyi.”
^ Lushekeli lumu lwesekeni namagiramu 11.4. Talenu Nsañu Jikwawu B14.
