Kushindulula Watachi 22:1-19
22 Kufumahu, Davidi wahosheli nindi: “Idi didu itala daYehova Nzambi walala, nawa aka dikameña kakulambwilahu aIsarela mulambu wakushita.”+
2 Dichi Davidi wahanini lushimbi nindi apompeshi hamu añiinza+ adiña mwituña daIsarela, nawa wayinkeli mudimu wakuketula malola nikusoña malola akutuña nachu itala daNzambi walala.+
3 Davidi waloñeshili niyikuñu yayivulu nankashi yakuchilamu nyisumali yakuzatisha kuyenzelu yakuyiisu niyakuchilamu makalampa,* niwuneñu wawuvulu nankashi wakukañanya kupima,+
4 nawa waloñesheli ninyitondu yanyisida+ yakukañanya kuchinda, muloña akaSidoni+ niakaTira+ amuleteleli Davidi nyitondu yanyisida yayivulu chikupu.
5 Kufumahu, Davidi wahosheli nindi: “Mwanami Solomoni wuchidi kansi nawa heluka yuma yayivuluku,*+ nawa itala dinakukeñeka kumutuñila Yehova dikwikala deneni chikupu+ chakwila mpuhu yadu nilubanji lwadu+ jakatiyakana kumatuña ejima.+ Dichi nukumuloñeshela chadimu yuma yejima.” Dichi Davidi waloñesheleli chadimu yuma yayivulu nankashi yakuzatisha henohu kanda afwi.
6 Kuhiñahu, wamutambikili mwanindi Solomoni nawa wamulejeli nindi amutuñili Yehova Nzambi yaIsarela itala.
7 Davidi wamulejeli mwanindi Solomoni nindi: “Muchima wami wafwilileña kutuñila ijina daYehova Nzambi yami itala.+
8 Ilaña izu daYehova denjili kudi ami nawu, ‘Eyi wunapwekeshi mashi amavulu nankashi nawa wunazuñi njita jajivulu. Eyi hiwukutuñila ijina dami italaku,+ muloña wunapwekeshi mashi amavulu nankashi hamaseki kumesu ami.
9 Tiyaña! Wakavwala mwana weyala+ wakekala muntu wakuwunda,* nawa ami nakamunookesha kudi ayilumbu jindi ejima akadikumashana nindi,+ muloña akamutuumba ijina nawu Solomoni*+ nawa Isarela nakamwinka kuwunda nikumwena mumafuku indi.+
10 Diyi wakatuñila ijina dami itala.+ Wakekala mwanami nawa ami nakekala tata yindi.+ Nakakolesha chikupu itanda dawanta windi wakuyuula Isarela haya nyaaka.’+
11 “Ichi dinu mwanami, Yehova ekali naneyi kulonda wakatweshi kumutuñila Yehova Nzambi yeyi itala neyi chinahoshiyi hadi eyi.+
12 Yehova akakwinki maana nikashinshi+ hakakwinkayi wuswa wakuyuula aIsarela, kulonda wakahembeña nshimbi jaYehova Nzambi yeyi.+
13 Yuma yakakuwahilaña neyi wakalondelaña nshimbi+ niwunsompeshi jamulejeliwu Mosi kudi Yehova nindi ayinki aIsarela.+ Ikalaku wahamuka nawa kolaku. Bayi wutiya woma hela kufwa mutentuku.+
14 Talaña, ami nakabakani nankashi hakwila niloñesheli itala daYehova ntalenta* jawuru 100,000 nintalenta jasiliva 1,000,000 niwuneñu wawuvulu niyikuñu+ yakukañanya kuchinda. Nawa naloñeshi nyitondu nimalola,+ hela chochu, nineyi wakabombelihu.
15 Wudi nawakanyidimu amavulu, akakuketula malola, akakutuña namalola,+ akakusoña niakanyidimu eluka nyidimu yejima yashiyashana.+
16 Wuru, Siliva, wuneñu niyikuñu, yuma yayivulu nankashi yakukañanya nikupima.+ Nyamukaku wutachiki kuzata, nawa Yehova ekali naneyi.”+
17 Kufumahu, Davidi walejeli ayilolu ejima amuIsarela kulonda amukwashiku mwanindi Solomoni nindi:
18 “Komana Yehova Nzambi yenu hadi nanenuku? Nawa hanayinookeshi kutubadi twejimaku? Muloña wanyinkeli enimbu amudinu ituña nawa ituña anadimiki mushindu kumesu aYehova nihamesu awantu jindi.
19 Dichi fuukulenuhu namuchima wenu wejima ninawumi* wenu wejima kumukeñakeña Yehova Nzambi yenu+ nawa mutachiki kumutuñila Yehova Nzambi walala+ iluña dajila, kulonda mwakaleti chimbañu chachitiyañenu chaYehova niyuma yajila yaNzambi walala+ kwitala dakatuñilawu ijina daYehova.”+
Tumazu twaheshina
^ Iyi hiyikuñu yakukwatisha nachu mapulanga.
^ Hela “wamwovu.”
^ Kufuma kwizu dachiHeberu daya mukwila nawu, “Kuwunda.”
^ MuchiHeberu, “kunooka.”
^ Ntalenta yimu yesekeni na 34.2 kg. Talenu Nsañu Jikwawu B14.
^ Talenu Kulumbulula.
