Kushindulula Watachi 28:1-21
28 Kuhiñahu, Davidi wapompesheli ayilolu ejima aIsarela muYerusalema: ayilolu anyichidi, antwamina amazanvu+ amukalakeleleña mwanta, antwamina amakombakaji niantwamina ajinkulakaji,+ antwamina amaheta ejima niyimuna yamwanta+ niyawanyanindi awamayala,+ hamu nawayilolu amuchota niamayala ejima añovu nawa ashikilamu.+
2 Kufumahu, Mwanta Davidi wemeni nakuhosha nindi:
“Enu amanakwami niantu jami ntiyililenu. Muchima wami wafwilileña kutuña itala kulonda diikali iluña mwakunookela chimbañu chachitiyañenu chaYehova nihakudata nyendu yaNzambi yetu,+ nawa naloñesheli yuma kulonda nituñi.+
3 Ilaña Nzambi walala wanlejeli nindi, ‘Eyi hiwakatuñila ijina dami italaku,+ muloña wudi iyala mukamajita nawa wunapwekeshi mashi.’+
4 Hela chochu, Yehova Nzambi yaIsarela wantondeli hadi amwitala datata yami kulonda niikali mwanta waIsarela haya nyaaka,+ muloña watondeli Yuda kwikala nlomboli,+ nawa hadi amwitala daYuda, watondelihu amwitala datata yami,+ nawa hadi anyana katata yami awamayala, yami atiyiliyi kuwaha kuñilisha kwikala mwanta wawaIsarela ejima.+
5 Nawa hadi anyanami awamayala ejima, muloña Yehova nanyinki anyana amavulu awamayala,+ watondelihu mwanami Solomoni+ kulonda ashakami hetanda dachiyuulu chaYehova chakuyuula Isarela.+
6 “Wanlejeli nindi, ‘Mwaneyi Solomoni diyi wakatuña itala dami nimalubanza ami, muloña namutondi ekali mwanami nawa ami nukwikala tata yindi.+
7 Nakakolesha chikupu wanta windi haya nyaaka+ neyi atwalekahu chikupu kuhemba nshimbi jami nimazu ami awunsompeshi,+ neyi chinakwilayi hayinu mpinji.’
8 Dichi inakuhosha hamesu awaIsarela ejima, dikwila nawu chipompelu chaYehova nimumatu aNzambi yetu nami: Muhembeña chikupu nikukeñakeña nshimbi jaYehova Nzambi yenu, kulonda mwakaheti ituña dadiwahi+ nawa mwakadihani kudi anyanenu awamayala akalondela hadi enu kulonda dakekali wuswana wawu haya nyaaka.
9 “Nawa eyi Solomoni mwanami, mwiluki Nzambi yanami tata yeyi nawa wumukalakeleña namuchima wejima*+ ninamuzañalu,* muloña Yehova watalatalaña munyichima yejima+ nawa welukaña yitoñojoka yejima.+ Neyi wakamukeñakeña niyena wakadisolola kudi eyi,+ ilaña neyi wakamushiya niyena wakakukaana haya nyaaka.+
10 Ichi talaña, Yehova nakutondi kulonda wutuñi itala diikali iluña dajila. Ikalaku wahamuka nawa yaku wakazati.”
11 Kuhiñahu, Davidi wamwinkeli mwanindi Solomoni pulani yakutuñilamu+ ikeeki+ dahawiñililu, matala adu, tupeka twadu twakuhembelamu, tupeka twadu twahewulu, tupeka twadu twamukachi niitala dakujiminamu nshidi.*+
12 Wamwinkeli pulani yakutuñilamu yuma yejima yamulejeliwu kuhitila mudi spiritu yaNzambi, pulani yamalubanza+ etala daYehova, yatupeka twejima twakudiilamu kunyeñumuka itala dejima, yayisweku yayuma yalema yamwitala daNzambi walala niyayisweku yayuma yalema mwakuhembela yuma yajilikileñawu;*+
13 wamwinkeli nshimbi jamazanvu awatupristu+ niaLevi, yanyidimu yejima yakukalakala kwitala daYehova niyayuma yakuzatisha kumudimu wakwitala daYehova;
14 wamutoñweleli kulema kwawuru, wuru yejima yayuma yakuzatisha kunyidimu yashiyashana, kulema kwayuma yejima yasiliva niyayuma yejima yakuzatisha kunyidimu yashiyashana;
15 nikulema kwawuru yajakutentekahu manoñu+ nimanoñu aju awuru, kulema kwajakutentekahu manoñu jashiyashana nimanoñu aju nikulema kwajakutentekahu manoñu jasiliva, kwachakutentekahu inoñu chimu-chimu nimanoñu achu kwesekeja namudimu wachu;
16 nikulema kwawuru yajimesa jakutentekahu mankendi akulunjeka,*+ yamesa-himesa kushilahu nisiliva yajimesa jasiliva,
17 niyamafoloku,* yayeña yakunama, yanyilondu yawuru yakadi majilu nikulema kwayeña yanyanya yakunama yawuru,+ yacheña-hicheña chanyanya chakunama nikulema kwayeña yanyanya yakunama yasiliva, yacheña-hicheña chanyanya chakunama.
18 Wamutoñweleli nikulema kwawuru yakweñununa yakameña kainsensi+ niyayuma yemenañaku ikalu,+ dikwila nawu akerubi+ awuru atandumuna mpuula jawu nakubuta chimbañu chachitiyañenu chaYehova.
19 Davidi wahosheli nindi: “Chikasa chaYehova chadiña hadi ami nawa wanyinkeli maana akusoneka+ yuma yejima yapulani.”+
20 Kuhiñahu, Davidi wamwilili mwanindi Solomoni nindi: “Ikalaku wahamuka nawa kolaku nikuya nakuzata. Bayi wutiya woma hela kufwa mutentuku, muloña Yehova Nzambi, Nzambi yami, wudi naneyi.+ Yena hamba kakushiya hela kukuumba chisayikilaku,+ ilaña wakekalaña naneyi sampu mudimu wejima wetala daYehova wunamani.
21 Nawa awa diwu mazanvu awatupristu+ niawaLevi+ akuzata mudimu wejima wakwitala daNzambi walala. Eyi wukweti akanyidimu eluka nyidimu adihana kuzata mudimu wejima,+ kushilahu niayilolu+ niantu ejima akalondelaña nshimbi jeyi jejima.”
Tumazu twaheshina
^ Hela “kudihana chikupu.”
^ Hela “mukudikeñela.”
^ Hela “itala dakubutilamu nshidi.”
^ Hela “yuma yahanineñawu.”
^ Dikwila nawu, mankendi akutenteka kumesu aNzambi.
^ Hela “tutuwa twanyisomu.”