Wamuchiyedi kudi AKorinda 1:1-24
1 Ami Pawulu, kapostolu kaKristu Yesu atondeliwu kwesekeja nankeñelu yaNzambi, nidi hamu namanakwetu Timotewu,+ inakusonekela chipompelu chaNzambi chidi muKorinda wunu mukanda, kushilahu niakakujila ejima adi muAkaya nami:+
2 Luwi lwasweja nikuwunda kwafumaña kudi Tata yetu Nzambi nikudi Mwanta Yesu Kristu kwiikali nanenu.
3 Kulema kwiikali kudi Nzambi nawa Tata yaMwanta wetu Yesu Kristu,+ Tata wasweja luwi+ nawa Nzambi wakukundeja kwejima,+
4 owu watukundejaña* mukweseka* kwejima kutwamonaña,+ kulonda ninetu tutweshi kukundeja antu amakwawu+ mukweseka* kwejima kwamonañawu kuhitila mukuyikundeja nakukundeja kutwatambwilaña kudi Nzambi.+
5 Muloña neyi chavula makabi etu kukoola Kristu,+ dichavula nikukundeja kutwatambwilaña kuhitila mudi Kristu.
6 Dichi neyi tumona kweseka,* chumichi chikuyikundeja nikuyaamwina; nawa neyi anakutukundeja, ninenu anakuyikundeja, kukundeja kwayikwashaña kuumika makabi wowamu itunakumona ninetu.
7 Nawa twayikuhwelela chikupu, nanochu chituneluki netu, neyi chimunakumona makabi hamu nanetu, dichakayikundejawu hamu nanetu.+
8 Muloña etu hitunakukeña enu anakwetu mubuli kwiluka lukadi lutwamweni kukabeta kaAsiyaku.+ Hayina mpinji twakabakeni nankashi, hitwatwesheli kuumika nañovu jetu etu aweniku, chakwila twelukili wanyi neyi tukuhanda hela nehi.+
9 Kafwampi, twamweni netu anatusompesheli dehi kukufwa. Chumichi chamwekeni kulonda tubuli kudikuhwelela etu aweni, ilaña tukuhweleli mudi Nzambi+ wasañulaña afu.
10 Watupulwishili muniwu wubanji wakufwa nawa wukutupulwisha, tunamukuhweleli cheñi netu wukutwalekahu nakutupulwisha.+
11 Ninenu nawa munateli kutukwasha mukulomba kwenu kwakulembelela,+ kulonda antu amavulu atulombeleñaku nakulomba kwakusakilila, muloña wakuwaha kwatutiyañayi Nzambi nanochu chakulañayi kulomba kwawantu amavulu.+
12 Muloña chuma chitwadisambilañahu dichenichi, chinleji chetu chamuchima chatulejaña nawu tunamwekeshi kujila nikwikala namuchima wawuwahi wakufuma kudi Nzambi hampinji yitudi nawantu mukaayi, nawa sweje-e neyi tudi hamu nanenu. Hitunashindameni hamaana amukaayiku,+ ilaña tunashindameni haluwi lwaNzambi lwasweja.
13 Muloña hitunakuyisonekela yuma yacheñiku, chiña yuma yimwatela kutaña* nikutiyisha, nawa nakuhweleli nami mukutwalekahu kutiyisha yumiyi chikupu,*
14 neyi chimunatiyishi enu nenu etu yetu tunakuyiletesha kudisamba, neyi chimukatuletesha ninetu kudisamba mwifuku daMwanta wetu Yesu.
15 Dichi, muloña wakukuhwelela mwenimu, nafwilileña nami nisambili kwinza kudi enu, kulonda mwakazañalali kamuchiyedi;*
16 muloña nafwilileña kuyihempula hakuya kuMasidoniya, nikufunta cheñi kudi enu hakufuma kuMasidoniya, kuhiñahu, mukanshinjikijiku hakuya kuYudeya.+
17 Hela chochu, chinafuukwileña mwenimu, komana naleteleña hohu maleñu tahindi? Indi kwiji nafuukulaña yuma kwesekeja nayitoñojoka yawuntu chakwila nakuminaña dakuhosha nami, “Eña, eña,” kuhiñahu cheñi nami, “Inehi, inehi,” tahindi?
18 Ilaña tunateli kumukuhwelela Nzambi, dichi mazu itunakuyileja hiyanateli kwikala “eña,” hampinji yoyimu cheñi netu “inehiku.”
19 Muloña Mwana kaNzambi, Yesu Kristu, ashimwininiwu mukachi kenu kuhitila mudi etu, dikwila nawu kuhitila mudi ami niSilivanusi* niTimotewu,+ hekalili “eña,” hampinji yoyimu cheñi “inehiku,” ilaña yena wekala “eña” mpinji yejima.
20 Muloña hela yikaninu yaNzambi yikuvula ñahi, mpinji yejima yekalaña “eña” muloña wayena.+ Dichi, kuhitila mudi yena cheñi dimutwahoshelaña netu “Ameni” kudi Nzambi,+ nawa chumichi chaleteshaña amulemeshi kuhitila mudi etu.
21 Ilaña owu wunayileji enu ninetu nindi tudi antu jaKristu nawa wunatuwayishi etu, hiNzambi.+
22 Cheñi nawa natulamiki chilamiku chindi+ nawa watwinka chinjikijilu chayuma yakenza, dikwila nawu, spiritu+ munyichima yetu.
23 Ichi inakusanyika* kudi Nzambi ekali chinsahu chami* nami, chuma chinaleteshi nibuli kwinza kuKorinda hayinu mpinji, nalondi nami niyaamwini kuchineñi.
24 Chumichi, hichinatalishi mukwila nawu tudi anyanta achikuhwelelu chenuku,+ ilaña tudi akakukalakala hamu nanenu kulonda muzañalaleña, muloña chikuhwelelu chenu dichinakuyiletesha mwimani chakola.
Tumazu twaheshina
^ Hela “lukadi.”
^ Hela “lukadi.”
^ Hela “watukoleshaña.”
^ Hela “lukadi.”
^ Hela hekwawu, “yuma yimweluka dehi.”
^ MuchiGiriki, “kushika nikunsa.”
^ Hela hekwawu, “kulonda mwakahetelimu kayedi.”
^ Atenañawu cheñi nawu Silasi.
^ Hela “inakudishiña.”
^ Hela “wumi wami.”
