Mukeña 2:1-22
א [Alefu]
2 Yehova ochinabutiliyi mwana kaZiyona wamumbanda mumavu akuzuwa kwindi!
Lubanji lwaIsarela nalunatili hamaseki kufuma mwiwulu.+
Hananuki chitwamu chindi chakudatahu nyendu+ mwifuku dakuzuwa kwindiku.
ב [Beti]
2 Yehova naminyi maluña ejima aYakoba akushakamamu chakadi kutiya wushona.
Muloña wakuzuwa kwindi nabuvoli maluña akiñewa amwana kaYuda wamumbanda.+
Nahumoni nikusawula wanta niatulamba twindi.+
ג [Gimeli]
3 Mukutaata kwakuzuwa kwindi naketuli ñovu jejima* jaIsarela,
Walekesheli chikasa chindi chachidiilu henjili chilumbu,+Nawa mudi Yakoba natwalekihu kubutuka neyi kesi kanoñeshaña yuma yejima yinakinyeñumuki.+
ד [Daleti]
4 Nevuli* wuta windi wamukunji* neyi chilumbu; chikasa chindi chachidiilu chinemani hamu neyi mukankunyi;+Watwalekelihu kujaha ejima alubanji kumesu etu.+
Nawa wahuñunwini ndulu yindi neyi kesi+ mwitenti damwana kaZiyona wamumbanda.+
ה [Hi]
5 Yehova nekali neyi chilumbu;+Naminyi Isarela.
Naminyi tuposhi twindi twejima;Nakisañani maluña indi ejima akiñewa.
Nawa mudi mwana kaYuda wamumbanda wavulishañamu kudila nimukeña.
ו [Wawu]
6 Wanyinkeshaña chikupu chisolu chindi,+ neyi chinsambu chidi mwitempa.
Nalekeshi* dehi chawija chindi.+
Yehova nakojeji chawija nisabata ajijimbali muZiyona,Nawa mukulendumuka kwindi hakamenaña anyanta niatupristuku.+
ז [Zayini]
7 Yehova nakaani kameña kindi;Nakaani iluña dindi dajila.+
Nalekeli mbañu jatuposhi twindi twakola muchikasa chachilumbu.+
Ananyamuni izu dawu kwiwulu mwitala daYehova,+ neyi kwiji hefuku dachawija.
ח [Heti]
8 Yehova nafuukulihu kukisañana mbañu yamwana kaZiyona wamumbanda.+
Natandumuni dehi mwonji windi wakupima nachu.+
Hanalekeshi chikasa chindi kulonda chibuli kuleta kujilumukaku.*
Nawa wakojejaña mpwembu nimbañu kudila.
Ejima wawu anayizeyeshi.
ט [Teti]
9 Yiisu yindi yineñili mumaseki.+
Nakisañani nikukotola yikuñu yindi.
Anyanta niatulamba twindi adi mukachi kanyuza.+
Hikudi nawa nshimbiku; hela tuhu atuprofwetu indi hiyanawani chimwenu kudi Yehovaku.+
י [Yodi]
10 Akulumpi jamwana kaZiyona wamumbanda ashakamaña hamaseki nzo-o.+
Akuwilaña lunkuñu hanyitu yawu nikuvwala yisasa.+
Ajiki* aYerusalema ananoñami nyitu yawu heseki.
כ [Kafu]
11 Mesu ami anazeyi nakuwulumuna madilu.+
Jamukachi kami* jinakuyila.
Muchima wami wachidambanda anawuhuñunwini hamaseki, muloña wakudimbuka kwamwana wamumbanda* wawantu jami,+Muloña wawanyanami nianyikeki anakuhwidijela mumalubanza amutawuni.*+
ל [Lamedi]
12 Atwalekañahu kwihula amama jawu nawu, “Mbutu nivinyu jidi kudihi?”+
Hampinji yahwidijelañawu neyi muntu anakatishiwu mumalubanza amusumba,Hayaña nakukuma wumi wawu mumakasa awamama jawu.
מ [Memu]
13 Chumanyi chinukuzatisha kwikala chinsahu,Hela chumanyi chinnateli kukufwanisha nachu, eyi mwana kaYerusalema wamumbanda?
Nukukwesekeja nachumanyi, hakwila nikukundeji, eyi mwana wamumbanda mujiki* waZiyona?
Muloña kukisika kweyi kwatoha neyi kaluñalwiji.+ Hinyi wunateli kukuuka?+
נ [Nuni]
14 Yimwenu yakumweneniwu atuprofwetu tweyi yadiña yakutwamba nawa yamukunkulwayi,+Nawa hiyasolweli chiluwa cheyi kulonda akufumishi muwunkoliku,+Ilaña atwalekelihu kukumwena yimwenu yakutwamba nikushimuna nsañu yakutwamba.+
ס [Sameki]
15 Ejima ahitaña mumukwakwa yeyi etelañawu makasa awu nakukuseha.+
Azañalalaña nakwimba nyiloji+ nikupukumwina mwana kaZiyona wamumbanda nyitu yawu, nakuhosha nawu:
“Iwu diwu musumba wahosheliwu nawu, ‘Wawuwahi nankashi, muzañalu weseki dejima’?”+
פ [Pi]
16 Ayilumbu jeyi ejima akwasaminaña mukanwa kawu.
Embaña nyiloji nikusumona kumazewu awu nakuhosha nawu: “Tunamuminyi dehi.+
Idi didu ifuku ditwadiña nakutalila!+ Dinashiki dehi, nawa tunadimoni!”+
ע [Ayini]
17 Yehova nakoñi chuma chakeñeleñayi;+ nashikiji mwahosheliyi,+Chuma chahosheliyi kunyaaka oko-o.+
Nahumoni dehi chakadi kutiya wushona.+
Nelishi ayilumbu kuzañalala nachinakumwekeni; natuumbakeshi ñovu* jawakankunyi neyi.
צ [Tisadi]
18 Muchima wawu wamudililaña Yehova, eyi mbañu jamwana kaZiyona wamumbanda.
Lekaku madilu awulumuki mwaana niwufuku neyi mpupa yamenji.
Bayi wunookaku, disu deyi* bayi wudinookeshaku.
ק [Kofu]
19 Nyamukaku! Dilaku nampinji yawufuku, hakutachika kwayilu.
Huñununaku muchima weyi kumesu aYehova.
Nyamunaku makasa eyi kudi yena muloña wamawumi awanyaneyi,Owu anakuhwidijela hejima hakonekela mukwakwa* muloña wanzala yakapwelendendi.+
ר [Reshi]
20 Eyi Yehova, talaña nawa shinshikaku hadi muntu iwunababeshi chikupu.
Komana ambanda atela kutwalekahu kuda anyanawu,* anyanawu akola kumujimba,+Indi kwiji atupristu niatuprofwetu atela kuyijahila mwiluña dajila daYehova?+
ש [Shini]
21 Kansi weyala nikashinakaji weyala anakaami heseki munyikwakwa, anafwi.+
Ajiki* ami nianyikwenzi ami anadimboki nampoku yakabali.+
Wunayijahi mwifuku dakuzuwa kweyi; wunayijahi chakadi kutiya wushona.+
ת [Tawu]
22 Watambikaña kukala kufuma kumbadi jejima neyi kwiji hiifuku dachawija.+
Mwifuku dakuzuwa kwaYehova, kwosi watemukili hela kupulukaku;+Owu inavweli* nikukulisha, ayijilumwini kudi chilumbu chami.+
Tumazu twaheshina
^ MuchiHeberu, “nseñu jejima.”
^ MuchiHeberu, “kudatola.”
^ Hela “wamanana.”
^ Hela “Nakisañani.”
^ MuchiHeberu, “chibuli kuminyaku.”
^ Awa hiyambanda abula kukaamahu dehi nawamayala.
^ Hela “mbaka.”
^ Nkumbu yakufwikija neyi himuntu, hadaha yinakumwekesha luwi hela wushona.
^ MuchiHeberu, “nyijiñwa.”
^ Iwu himumbanda wabula kukaamahu dehi neyala.
^ MuchiHeberu, “nseñu.”
^ MuchiHeberu, “mwana kadisu deyi wamumbanda.”
^ MuchiHeberu, “hamutu wamukwakwa wejima.”
^ Hela “nyikaabu yawu.”
^ Hela “Ayañadima.” Awa ajiki hiyambanda abula kukaamahu dehi neyala.
^ Hela “inavweli akola.”