Kudi AKolosi 3:1-25
3 Hela chochu, neyi ayisañwili hamu naKristu,+ fwilenuña yuma yamwiwulu mwashakamayi Kristu kuchikasa chachidiilu chaNzambi.+
2 Toñojokenuña hayuma yamwiwulu,+ bayi yahamasekiku.+
3 Muloña mwafwili, nawa wumi wenu awusweka hamu naKristu wadikunda naNzambi.
4 Neyi Kristu, wumi wetu,+ anamumwekeshi dehi, dihakayimwekeshawu ninenu hamu nindi mukulema.+
5 Dichi, jahenu yiidi yenu yamujimba+ yidi hamaseki yidi neyi wuvumbi,* wuzondu, mpwila yawuvumbi yakubula kudiyuula,+ kufwila kwatama, nilwisu, dikwila nawu kupesha.
6 Muloña wayumiyi, kuzuwa kwaNzambi kunakwinza.
7 Ninenu dichimwelileña* muchihandilu chenu chakunyima.*+
8 Ilaña ichi mwatela kuleka yuma yejimiyi: kuzuwa, kuhila, kutama,+ nawa nhoshelu yakasawuntu+ ninhoshelu yawuzondu+ bayi yifumaña mukanwa kenuku.
9 Bayi muditwambilaña wumu namukwawuku.+ Vuulenu wuntu wenu wawukulu+ niyilwilu yawu,
10 nawa vwalenu wuntu wawuha,+ wunakwilishawu kwikala wawuha kuhitila mukwiluka kwalala kwesekeja namwaya chifwanisha chaNowu wawuleñeli,+
11 mwabula kaGiriki hela kaYudeya, waalama hela chidima, ñiinza hela kaSikita,* nduñu hela muntu wasubuka; ilaña Kristu diyuma yejima nawa wekala muyuma yejima.+
12 Dichi, chineli mudi antu atondawu kudi Nzambi,+ ajila nawa akeñayi, vwalenu muchima wawushona,+ luwi, kudizoza,+ kwovwaha+ nikudiwunjika.+
13 Ditiyililenuña wumu namukwawu nikudanakena wumu namukwawu chakufuma hamuchima+ hela chakwila kudi muntu wudi namuloña namukwawu.+ Neyi chayanakeneniyi Yehova* chakufuma hamuchima, ninenu dichimwatela kwila.+
14 Ilaña kubombela hayuma yejimiyi, vwalenu kukeña,+ muloña dikwanuñañeshaña chikupu.+
15 Cheñi nawa, itejenu kuwunda kwaKristu kuyuuleña munyichima yenu,*+ muloña kuniku kuwunda, dikwayitambikililiwu mumujimba wumu. Nawa sakililenuña.
16 Itejenu izu daKristu dishakameña mudi enu chikupu kulonda diyikojeji kwikala namaana ejima. Ditañishenuña nikudikolesha* wumu namukwawu namasamu,+ muhamekenuña Nzambi, imbenuña tumina twakuspiritu nakusakilila, mwimbilenuña Yehova* munyichima yenu.+
17 Yuma yejima yimwelaña, chili mumazu hela muyilwilu, yililenuña mwijina daMwanta Yesu nakumusakilila Nzambi Tata kuhitila mudi yena.+
18 Enu ambanda, ovwahilenuña anfumu jenu,+ muloña dichuma chatelela mudi Mwanta.
19 Enu amayala, keñenuña añodi jenu+ nawa bayi muyilendumokelañaku.*+
20 Enu anyana, ovwahilenuña anvwali jenu muyuma yejima,+ muloña chumichi dichamutiyishaña Mwanta kuwaha.
21 Enu atata jawantu, bayi muhilishaña* anyanenuku,+ kulonda abuli kudihomba.*
22 Enu anduñu, ovwahilenuña ankaaka jenu* ayiñija nyidimu muyuma yejima,+ bayi kuzata hohu hampinji yinakuyimonawu kulonda mutiyishi antu kuwahaku, ilaña zatenuña namuchima wejima nakumutiya Yehova* woma.
23 Yuma yejima yimunakwila, yilenuña nawumi wejima,* neyi munakumuzatila Yehova*+ bayi antuku,
24 muloña mweluka nenu kudi Yehova* dikumukatambwila wuswana kwikala isomu.+ Kalakelenuña Mwanta, Kristu.
25 Chalala muntu wejima wakoñaña yuma yatama akamubabesha kwesekeja nayuma yatama yinakoñiyi,+ muloña Nzambi hekala nachaambuku.+
Tumazu twaheshina
^ MuchiGiriki, poneya. Talenu Kulumbulula.
^ Hela “dichimwendeleña.”
^ Hela “chimwahandileña kunyima.”
^ “KaSikita” himuntu wabula kutaña.
^ Talenu Nsañu Jikwawu A5.
^ Hela “kulomboleña nyichima yenu.”
^ Hela “kukonkomwena.”
^ Talenu Nsañu Jikwawu A5.
^ Hela “muyizuwilañaku.”
^ Hela “muvulokaña.”
^ Hela “kuneña.”
^ MuchiGiriki, “kumujimba.”
^ Talenu Nsañu Jikwawu A5.
^ Talenu Kulumbulula, “Wumi.”
^ Talenu Nsañu Jikwawu A5.
^ Talenu Nsañu Jikwawu A5.
