Ansompeshi 1:1-36
1 Yoshuwa chafwiliyi,+ aIsarela* amwihwili Yehova+ nawu: “Hinyi hakachi ketu wukusambila kuya nakuzuña nawaKenani?”
2 Yehova waakwili nindi: “Yuda diyi wukuya.+ Tiyenu! Ami inakumwinka* ituña muchikasa chindi.”
3 Dichi Yuda wamwilili manakwindi Simiyoni nindi: “Twaya wuntwaliku kwiluña dinanyinkiwu*+ kulonda twakazuñi nawaKenani. Kufumahu, ninami nakakutwalaku kwiluña dinakwinkiwu.” Dichi Simiyoni wayili hamu nindi.
4 AYuda chakandukiliwu, Yehova wahanini aKenani niaPerizi mumakasa awu+ nawa ashindili amayala 10,000 muBezeki.
5 Amuwanini Adoni Bezeki muBezeki, dichi azuñili nindi kwenoku nawa ayimikili mushindu aKenani+ niaPerizi.+
6 Adoni Bezeki chatemukiliyi, amukumpishili nakumukwata nawa amuketwili madimbanu akumakasa niakunyendu.
7 Kuhiñahu, Adoni Bezeki wahosheli nindi: “Kudi anyanta 70 aketulawu madimbanu akumakasa niakunyendu nawa anonojolaña yakuda mwishina damesa yami. Dichi Nzambi nanfweti kwesekeja nachinelaña.” Kufumahu, amutwalili kuYerusalema+ nawa wafwilili kwenoku.
8 Kubombelahu, amayala akumuchidi waYuda azuñili naYerusalema+ nawa awutambwili; awutapili nampoku yakabali nawa awocheli nakesi.
9 Kuhiñahu, amayala akumuchidi waYuda akunkumukili nakuya nakuzuña nawaKenani ashakamineña mwiluña damapidi, muNegebi nimuShefela.+
10 Dichi aYuda ayili nakuzuña nawaKenani ashakamineña muHebironi (kunyima, ijina daHebironi aditeneneña nawu Kiriyati Ariba), nawa atapili Sheshayi, Ahimani niTalimayi.+
11 Afumini kwenoku nakuya nakuzuña nawantu ashakamineña muDebiri.+ (Kunyima, ijina daDebiri aditeneneña nawu Kiriyati Sefweri.)+
12 Kufumahu, Kalebu+ wahosheli nindi: “Yowu iyala wakatapa musumba waKiriyati Sefweri nakuwimika mushindu, nakamwinka mwanami wamumbanda Akisa kulonda akekali ñodindi.”+
13 Nawa Otiniyeli+ mwana kaKenazi+ mana kwaKalebu, diyi wawimikili mushindu. Dichi wamwinkeli mwanindi wamumbanda Akisa ekali ñodindi.
14 Akisa chayileñayi kwitala danfumwindi, wamulejeli nfumwindi nindi alombi mpata kudi tata yindi. Kuhiñahu, Akisa wasulukili hachimbuulu chindi.* Kalebu wamwihwili nindi: “Wunakukeñadi?”
15 Yena wamwakwili nindi: “Mwani nkiswili, muloña wunanyinki chibalu champata yakukabeta kakuchidiilu;* nyinki niGuloti Mayimi.”* Dichi wamwinkeli Guloti yakuMukandu niGuloti yakuChikulu.
16 Nawa anyana kamwini Keni,+ muku waMosi,+ afumini kumusumba wanyitondu yanyikoma+ hamu nawantu amuYuda nakuya mwisaña daYuda kukabeta kakuchidiilu kaAradi.+ Ayili kwenoku nawa ashakamini hakachi kawantu.+
17 Ilaña Yuda wayili hamu namanakwindi Simiyoni nakulukuka aKenani ashakamineña muZefati nawa awujilumwini.+ Dichi iwu musumba awutuumbili nawu Horima.*+
18 Kufumahu, Yuda walukukili Gaza+ niiluña dawu, Ashikeloni+ niiluña dawu niEkironi+ niiluña dawu.
19 Yehova wadiña nawaYuda nawa atambwili iluña damapidi kwikala iheta dawu, ilaña hiyatemwini antu ashakamineña muchanaku, muloña adiña namakalu anjita adiña nampoku jajilehi jayikuñu kutufumbu.*+
20 Kalebu amwinkeli Hebironi neyi chakaniniyi+ Mosi, nawa watemwinimu anyana kaAnaki asatu awamayala.+
21 Ilaña aBenjamini hiyayitemwini aYebusi ashakamineña muYerusalemaku, dichi aYebusi atwalekahu kushakama nawaBenjamini muYerusalema kushika nikulelu.+
22 Haniyi mpinji, amwitala daYosefu+ akandukili nakuya kuBeteli nawa Yehova wadiña nawena.+
23 Amwitala daYosefu atemesheli antu kuya nakwendesha Beteli (dichi, kunyima ijina damusumba aditeneneña nawu Luzi),+
24 nawa owu ayili nakwendesha amweni iyala wafumineña mumusumba. Dichi amwilili nawu: “Mwani, tuleji njila yaya mumusumba, ninetu twakakwilila chuma chachiwahi.”*
25 Dichi iwu iyala wayilejeli njila yaya mumusumba nawa atapili musumba nampoku yakabali, ilaña iwu iyala nichisaka chindi chejima ayilekeli kulonda ayi mukuwunda.+
26 Iwu iyala wayili mwituña dawaHiti nawa watuñili musumba nakuwutuumba nindi Luzi. Idi didu ijina daniwu musumba kushika nikulelu.
27 Manasi hatwesheli kutambula Betisheyani nimatawuni* anyeñumukilikuku, Tayanaki+ nimatawuni anyeñumukiliku, antu ashakamineña muDori nimumatawuni anyeñumukiliku, antu ashakamineña muIbileyami nimumatawuni anyeñumukiliku+ niantu ashakamineña muMegido nimumatawuni anyeñumukiliku. Eni Kenani adikañili nakutwalekahu kushakama munidi ituña.
28 AIsarela chekaliliwu nañovu, ayizatishili aKenani nyidimu yawuduñu,+ ilaña hiyayitemwinimu ejimaku.+
29 Efuremu niyena hayitemwini aKenani ashakamineña muGezeriku. Eni Kenani atwalekelihu kushakama mukachi kawu muGezeri.+
30 Zebuluni hatemwini antu ashakamineña muKitiriyoni niantu ashakamineña muNahaloliku.+ Eni Kenani atwalekelihu kushakama hakachi kawu nawa ayizatishileña nyidimu yawuduñu.+
31 Asheri hatemwini antu ashakamineña muAko niantu ashakamineña muSidoni,+ muAhilabi, muAkizibi,+ muHeliba, muAfiki+ nimuRehobiku.+
32 Dichi aAsheri atwalekelihu kushakama hakachi kawaKenani ashakamineña munodu ituña, muloña hiyayitemwinimuku.
33 Nafitali hatemwini antu ashakamineña muBetishemeshi niantu ashakamineña muBetanatiku,+ ilaña atwalekelihu kushakama mukachi kawaKenani ashakamineña munodu ituña.+ Eni Betishemeshi niaBetanati ekalili akakuyizatila nyidimu yawuduñu.
34 Eni Amori ashinkilili aDani kwiluña damapidi, muloña hiyayitejeli kukunkumukila muchanaku.+
35 Dichi aAmori adikañili nakutwalekahu kushakama kuMpidi yaHeresi, kuAyiyaloni+ nikuShayalibimi.+ Ilaña chaswejeli ñovu yawantu amwitala daYosefu, ayikanjikijili aAmori kuzata nyidimu yawuduñu.
36 Iluña dawaAmori dafumini kumukandu waAkirabimi,+ kufuma kuSela nakukanduka.
Tumazu twaheshina
^ MuchiHeberu, “anyana kaIsarela awamayala.”
^ Hela “namwinki.”
^ MuchiHeberu, “mpata yinanyinkiwu.”
^ Hela hekwawu, “wasakilili mumakasa indi iku wudi hachimbuulu.”
^ Hela “Negebi.”
^ Daya mukwila nawu, “Mabeseni (Yeña yaManeni yaKunama) aMenji.”
^ Daya mukwila nawu, “Yuma Yatelela Kukisewa.”
^ Hela “nayikwakwa yayikuñu.” MuchiHeberu, “namakalu ayikuñu.”
^ MuchiHeberu, “twakakumwekeshela kukeña kwakashinshi.”
^ Hela “jimbaka.”
