Ansompeshi 10:1-18
10 Kufuma hadi Abimeleki, hahiñili Tola mwana kaPuwa, Puwa mwana kaDodo, iyala mukaIsakari, wanyamukili kulonda ayamwini aIsarela.+ Washakamineña mwiluña damapidi daEfuremu.
2 Wasompesheli aIsarela hadi yaaka 23. Kufumahu, wafwili nawa amujiikili muShamiri.
3 Kufuma hadi yena, hahiñili Yayiri wakuGiliyadi nawa wasompesheli aIsarela hadi yaaka 22.
4 Wadiña nawanyana awamayala 30 endeleleña hayimbuulu 30, nawa adiña nanyisumba 30, oyu yatenañawu nikulelu nawu Havoti Yayiri;+ yekala mumpata yaGiliyadi.
5 Kufumahu, Yayiri wafwili nawa amujiikili muKamoni.
6 AIsarela akoñeli cheñi yuma yatama kumesu aYehova,+ nawa atachikili kukalakela aBayali,+ yifwikija yaAshitoreti, anzambi aArami,* anzambi aSidoni, anzambi aMowabi,+ anzambi awaAmoni+ nianzambi awaFilisitinu.+ Amushiyili Yehova nawa hiyamukalakeleliku.
7 Kuhiñahu, Yehova wayizuwilili aIsarela nawa wayilandishili mumakasa awaFilisitinu niawaAmoni.+
8 Dichi aIsarela ayichikili nikuyikabisha chikupu munichi chaaka. Ayikabishileña aIsarela ejima ashakamineña kukabadi kaYodani mumpata yadiña yawaAmori muGiliyadi hadi yaaka 18.
9 AAmoni niwena azambukileña Yodani nakuzuña nawaYuda, aBenjamini niamwitala daEfuremu; dichi aIsarela akabakeni chikupu.
10 Kufumahu, aIsarela amwaabilili Yehova nawu ayikwashi,+ nakuhosha nawu: “Tunakuvulumuni, muloña tunakushiyi eyi Nzambi yetu nakukalakela aBayali.”+
11 Ilaña Yehova wayilejeli aIsarela nindi: “Komana hinayamwinini muEjipitu+ nikudi aAmori,+ aAmoni, aFilisitinu,+
12 aSidoni, aAmaleki nikudi aMidiyani hayikabishileñawuku? Chimwabileleli kudi ami, nayamwinini mumakasa awu.
13 Ilaña enu mwanshiyili nakukalakela anzambi acheñi.+ Dichikuletesha nibuli kuyamwina cheñi.+
14 Yenu mubileli kudi anzambi imunatondi kulonda ayikwashi.+ Lekenu ayamwini himunakuhita muyihuñu.”+
15 Ilaña aIsarela amwilili Yehova nawu: “Tunavulumuni. Twili chuma chejima chiwunamoni neyi chachiwahi. Mwani tunalembi, kuminaku dakutwamwina dalelu.”
16 Dichi afumishili anzambi akutwamba* mukachi kawu nakumukalakela Yehova,+ chakwila hayitejeli aIsarela kutwalekahu kukabakana cheñiku.*+
17 Mukuhita kwampinji, aAmoni+ adipompesheli hamu nawa atuñilili chilombu chawu muGiliyadi. Dichi aIsarela niwena adipompesheli hamu nawa atuñilili chilombu chawu muMizipa.
18 Antu niatulamba twaGiliyadi adihwili mulwawu nawu: “Hinyi wukututwaminina hakuzuña nawaAmoni?+ Muntu yenowu ekali mwanta wawantu ejima ashakamaña muGiliyadi.”
Tumazu twaheshina
^ Hela “aSiriya.”
^ MuchiHeberu, “anzambi akwacheñi.”
^ Hela “nawa wumi windi wakañenyi kudiwunjika muloña wakukabakana kwawaIsarela.”
