Ansompeshi 11:1-40
11 Dichi Yefwata+ wakuGiliyadi wadiña mushidika wañovu; wadiña mwana kachivumbi nawa Giliyadi diyi wadiña tata yaYefwata.
2 Hela chochu, ñoda Giliyadi niyena wamuvweleleli anyana awamayala. Anyana kañodindi awamayala chakuliliwu, amuhañili Yefwata nakumuleja nawu: “Hiwakekalahu nawuswana mwitala datata yetuku, muloña eyi wudi mwana kamumbanda wacheñi.”
3 Dichi Yefwata watemukili nakuya nakushakama mumpata yaTobi. Nawa amayala abulili jakwila adibombeli hamu naYefwata nakutachika kumulondela.
4 Chimwahitili mpinji, aAmoni azuñili nawaIsarela.+
5 Eni Amoni chazuñiliwu nawaIsarela, hohenohu akulumpi amuGiliyadi ayili nakumuleta Yefwata kufuma kumpata yaTobi.
6 Amwilili Yefwata nawu: “Inzaku wiikali mukulumpi wetu wamashidika kulonda tutweshi kuzuña nawaAmoni.”
7 Ilaña Yefwata walejeli akulumpi amuGiliyadi nindi: “Komana enu hiyenu mwanheleli chakwila mwanhañili nimwitala datata yamiku?+ Hanu dinu, muloñadi chimunakwinjila kudi ami hayinu mpinji yimunakuhita mukukala?”
8 Hohenohu akulumpi amuGiliyadi amulejeli Yefwata nawu: “Dichitunafuntili kudi eyi. Neyi wuyi hamu nanetu nakuzuña nawaAmoni, wakekala nlomboli yetu wakuyuula antu ejima ashakamaña muGiliyadi.”+
9 Dichi Yefwata wayilejeli akulumpi amuGiliyadi nindi: “Neyi mukunfuntisha kulonda nakazuñi nawaAmoni nawa neyi Yehova añimikilawu mushindu, dihu dinu hinakekala nlomboli yenu!”
10 Akulumpi amuGiliyadi amulejeli Yefwata nawu: “Yehova ekali chinsahu hakachi ketu* neyi twakabuli kwila muwunahoshi.”
11 Dichi Yefwata wayili hamu nawakulumpi amuGiliyadi, nawa antu amwilishili kwikala nlomboli yawu nawa mukulumpi wamashidika. Yefwata wahitulukili cheñi mumazu indi ejima kumesu aYehova muMizipa.+
12 Yefwata watemesheli antemesha kudi mwanta wawaAmoni+ nindi: “Chumanyi chinnakwili* mwaka winzi nakulukuka ituña dami?”
13 Dichi mwanta wawaAmoni walejeli antemesha jaYefwata nindi: “Muloña aIsarela atambwili mpata yami hafuminiwu muEjipitu,+ kutachikila kuArinoni+ kushika nikuYaboki ndo-o nikuYodani.+ Dichi nfuntishilenu mukuwunda.”
14 Ilaña Yefwata watemesheli cheñi antemesha kudi mwanta wawaAmoni
15 nakumuleja nawu:
“Yefwata nahoshi nindi: ‘AIsarela hiyatambwili mpata yawaMowabi+ nimpata yawaAmoniku,+
16 muloña chedikiliwu kufuma muEjipitu, aIsarela ahitili mwisaña nakuya kuKaluñalwiji kaChinana+ nakushika kuKadeshi.+
17 Kuhiñahu, aIsarela atemesheli antemesha kuya kudi mwanta wakuEdomi+ nakumuleja nawu: “Mwani twiiteji tuhiti mwituña deyi,” ilaña mwanta wakuEdomi wakaanini. Atemesheli cheñi mazu kudi mwanta wakuMowabi,+ ilaña niyena wakaanini. Dichi aIsarela atwalekelihu kushakama muKadeshi.+
18 Chahitileñawu mwisaña, apandakeni ituña daEdomi+ niituña daMowabi. Ayili kukabadi kakumusela ketuña daMowabi+ nawa ateekeleli kuArinoni; hiyaswinini kwakwihi nañinza yaMowabiku,+ muloña Arinoni diyadiña ñinza yaMowabi.
19 “‘Kufumahu, aIsarela atemesheli antemesha kudi Sihoni mwanta wawaAmori, mwanta wakuHeshiboni, nawa aIsarela amulejeli nawu: “Mwani twiiteji tuhiti mwituña deyi kulonda tuyi kwiluña detu.”+
20 Ilaña Sihoni wayikuhweleleli aIsarela wanyi hakwila ayiteji kuhita mwiluña dindi. Dichi Sihoni wapompesheli antu jindi ejima nakuteekela muYahazi nawa wazuñili nawaIsarela.+
21 Hohenohu, Yehova Nzambi yaIsarela wamuhanini Sihoni niantu jindi ejima mumakasa awaIsarela, chakwila ayishindili nawa aIsarela atambwili ituña dejima dawaAmori, dikwila nawu antu ashakamineña munodu ituña.+
22 Dichi, atambwili iluña dejima dawaAmori kufuma kuArinoni kushika kuYaboki nawa kufuma mwisaña kushika kuYodani.+
23 “‘Yehova Nzambi yaIsarela diyi wayitemwini aAmori kudi antu jindi aIsarela.+ Komana eyi wunakukeña kuyitemunamu tahindi?
24 Hiwukweti yuma yejima yakwinkañayi nzambi yeyi Kemoshi+ nindi wiikali nayuku? Dichi, muntu wejima anatemuniyi Yehova Nzambi yetu kudi etu, diyi itukutemuna.+
25 Eyi wunamubadiki Balaki+ mwana kaZipori mwanta wakuMowabi tahindi? Komana yena wesekeli kulwisha nawaIsarela hela kweseka kuzuña nawu tahindi?
26 Hashakaminiwu aIsarela yaaka 300 muHeshiboni nimumatawuni* anyeñumukiliku,+ muAroyeri nimumatawuni* anyeñumukiliku nimunyisumba yejima yekala kwakwihi nayikumu yaArinoni, muloñadi chiwabulilili kweseka kuyitambula hayina mpinji?+
27 Hinnakuvulumuniku, ilaña wunatamishi hakunlukuka. Yehova Nsompeshi+ asompi dalelu hakachi kawantu jaIsarela nawantu jaAmoni.’”
28 Ilaña mwanta wawaAmoni watiyilili wanyi mazu amutemesheleliwu kudi Yefwata.
29 Spiritu yaYehova yenjili hadi Yefwata,+ nawa wahitili kuGiliyadi nikuManasi nakuya kuMizipi yamuGiliyadi.+ Kufuma kuMizipi yamuGiliyadi watwalekelihu kuya kudi aAmoni.
30 Kuhiñahu, Yefwata wasanyikili+ kudi Yehova nindi: “Neyi wunyinka aAmoni muchikasa chami,
31 muntu wejima wakedika muchiisu chakwitala dami nakunkinkilila chinakafunta mukuwunda kufuma kudi aAmoni, wakekala waYehova,+ nawa yenowu nakamulambula kwikala mulambu wakushita.”+
32 Dichi Yefwata wayili nakuzuña nawaAmoni, nawa Yehova wayihanini muchikasa chindi.
33 Wayitapili chikupu kutachikila kuAroyeri kushika nikuMiniti, nyisumba 20, ndo-o nikuAbeli Keramimi. Dichi aAmoni ayimikili mushindu hamesu awaIsarela.
34 Nkumininaku, Yefwata wafuntili kumukala windi muMizipa,+ nawa cheliliyi nindi atali! wamweni mwanindi wamumbanda nakwidika hanji nakwinza nakumukinkilila iku nakwimba ñoma yanyanya* nawa nakuhañana! Diyi mwana adiñayi nindi hohu. Hadiñahu namwana mukwawu weyala hela wamumbandaku.
35 Chamumweniyi, watabwili yakuvwala yindi nakuhosha nindi: “Yo-o mama mwanami wamumbanda! Wunambaluli muchima,* muloña wunekali muntu innahañi. Chineli namwasamina dehi Yehova mukanwa kami, hinukutwesha kuhimpaku.”+
36 Ilaña mwanindi wamulejeli nindi: “Tata, neyi wunamwasamini dehi Yehova mukanwa keyi, ñiili kwesekeja nachiwunakani,+ chineli Yehova nakutendeli dehi ayilumbu jeyi aAmoni.”
37 Wamulejeli cheñi tata yindi nindi: “Nukulombiku chumichi: Ñiiteji niyi kwakankawami hadi tukweji tuyedi kumapidi nakadililiku wujiki* wami hamu nawakwetu awambanda.”*
38 Hohenohu wamulejeli nindi: “Yaña!” Dichi wamwitejeli kuya hadi tukweji tuyedi, nawa wayili kumapidi hamu nawakwawu nakudila wujiki windi.
39 Hakumana kwatukweji tuyedi, wafuntili kudi tata yindi. Kufumahu, Yefwata welili mwasanyikiliyi hadi yena.+ Hakaaminihu neyalaku. Nawa chumichi chekalili chaaku* muIsarela:
40 Hachaaka-hachaaka, ayañadima amuIsarela ayileña nakuhameka mwana kaYefwata wakuGiliyadi hadi mafuku awana muchaaka.
Tumazu twaheshina
^ MuchiHeberu, “mukakutiya.”
^ MuchiHeberu, “Chumanyi kudi ami nikudi eyi?”
^ Hela “jimbaka.”
^ Hela “jimbaka.”
^ Iyi hiñoma yanyanya kwakudekawu tuyikuñu nawa neyi ayinyinkesha yavumaña neyi manchakayi.
^ MuchiHeberu, “Wunanfuntishi mwishina.”
^ Iwu hiwujiki wakubula kukaama neyala.
^ Hela “nakadililiku hamu nawamabwambu jami muloña nakasumbuka wanyi.”
^ Hela “lushimbi.”
