Ansompeshi 12:1-15
12 Kuhiñahu, amayala eni Efuremu ayitambikili nakuzambukila kuZafoni* nawa amwilili Yefwata nawu: “Muloñadi chiwabulilili kututambika kulonda tuyi neyi hiwazambukili nakuzuña nawaAmoni?+ Tunakwocha itala deyi iku wudi mukachi.”
2 Ilaña Yefwata wayilejeli nindi: “Ami hamu nawantu jami nadiña mukukala kweneni nawaAmoni. Nayitambikili enu nami munkwashi, ilaña enu himwenjili nakuñamwina mumakasa awuku.
3 Chinamweni nami mukuñamwina wanyi, nafuukwilihu kusha wumi wami muwubanji* nakuya nakuzuña nawaAmoni,+ nawa Yehova wayihanini kudi ami. Dichi munenjilidi dalelu nakuzuña nanami?”
4 Kuhiñahu, Yefwata wapompesheli amayala ejima amuGiliyadi,+ nawa azuñili nawaEfuremu; amayala amuGiliyadi emikili mushindu aEfuremu, owu ahosheli nawu: “Hela chakwila enu aGiliyadi munakushakama mumaluña aEfuremu niaManasi, mudi hohu matunduka atemukili kufuma mudi Efuremu.”
5 AGiliyadi atwamininiku hambidi yaweni Efuremu nakutambula nyaaba yaYodani;+ nawa neyi amayala eni Efuremu hiyakukeña kutemuka, ahosheleña nawu, “Ñiitejenu nizambuki”; dichi amayala amuGiliyadi ehwileña muntu wumu-wumu nawu, “Wudi mwini Efuremu tahindi?” Neyi yaakula nindi, “Inehi!”
6 wena akumwila nawu, “Mwani hoshaku neyi Shiboleti.” Ilaña yena wukuhosha nindi, “Siboleti,” muloña akañenyeña kutena odu izu choloka. Kuhiñahu, owu antu ayikwatileña nakuyijahila kunyaaba yaYodani. Dichi eni Efuremu afwili haniyi mpinji adiña 42,000.
7 Yefwata wasompesheli aIsarela hadi yaaka 6, kufumahu, Yefwata wakuGiliyadi wafwili nawa amujiikili mumusumba windi muGiliyadi.
8 Kufuma hadi yena, hahiñili Ibizani wafumini kuBetelemi wasompesheli aIsarela.+
9 Wadiña nawanyana awamayala 30 nianyana awambanda 30. Watemesheli anyanindi awambanda kuya nakusumbuka kudi amayala amumutaña wacheñi, nawa waleteli ambanda 30 kulonda ayisumbuli kudi anyanindi awamayala. Wasompesheli aIsarela yaaka 7.
10 Kufumahu, Ibizani wafwili nawa amujiikili muBetelemi.
11 Kufuma hadi yena, hahiñili Eloni mwini Zebuluni wasompesheli aIsarela; wasompesheli aIsarela yaaka 10.
12 Kufumahu, Eloni mwini Zebuluni wafwili nawa amujiikili muAyiyaloni mumpata yaZebuluni.
13 Kufuma hadi yena, hahiñili Abidoni mwana kaHileli wakuPiratoni wasompesheli aIsarela.
14 Wadiña nawanyana awamayala 40 niejikulu awamayala 30 endeleleña hayimbuulu 70. Wasompesheli aIsarela yaaka 8.
15 Kufumahu, Abidoni mwana kaHileli wakuPiratoni wafwili nawa amujiikili muPiratoni mumpata yaEfuremu mumpidi yawaAmaleki.+
Tumazu twaheshina
^ Hela hekwawu, “nakuzambukila kukabeta kakuchimunswa.”
^ Hela “nashili wumi wami muchikasa chami.”
