Ansompeshi 14:1-20
14 Kuhiñahu, Samusoni wakunkumukilili kuTimina, nawa muTimina wamweni mumbanda kaFilisitinu.*
2 Dichi wayili nakuleja tata yindi nimama yindi nindi: “MuTimina mudi mumbanda kaFilisitinu wunantiyishi kuwaha kumuchima, nawa inakukeña muyi nakunsendelayi kulonda ekali ñodami.”
3 Ilaña tata yindi nimama yindi amwilili nawu: “Komana kwila wukeña mumbanda hakachi kawantaña jeyi hela hakachi kawantu jetu ejima nehi?+ Komana wunakukeña kuya nakusumbula mumbanda hakachi kawaFilisitinu ayidima?” Ilaña Samusoni wamulejeli tata yindi nindi: “Yaña wakanleteliyi, muloña diyi hohu wunanteleli.”*
4 Tata yindi nimama yindi elukili wanyi nawu chumichi chafumini kudi Yehova, muloña Nzambi wakeñeleña njila yakuzuñilamu nawaFilisitinu, chineli aFilisitinu diwu ayuulileña aIsarela haniyi mpinji.+
5 Dichi Samusoni wakunkumukili nakuya hamu natata yindi nimama yindi kuTimina. Chashikiliyi mumatempa anyivinyu amuTimina, cheliliyi nindi atali! wamweni mutupa* nakwinza iku nakumubulumina.
6 Hohenohu spiritu yaYehova yamwinkeli ñovu,+ nawa wamuhabwili hayedi neyi chahabulañayi muntu mwana kampembi hayedi namakasa indi. Ilaña halejelimu tata yindi hela mama yindi chuma chakoñeliyiku.
7 Kufumahu, wakunkumukilili kuTimina nakuhosha nanowu mumbanda, nawa Samusoni wachidiña wamukeña+ iwu mumbanda.
8 Chimwahitili mpinji, hafuntileñayi Samusoni kuTimina nakusenda mumbanda kulonda amutwali kumukala windi,+ wasenukili munjila kulonda atali mutupa wafwili, wawanini mumujimba wamutupa munasoki dehi ilembu dampuka nawa mudi niwuchi.
9 Dichi walooleleli wuchi muchikasa chindi nawa wawudiilileña munjila. Chayiwaniniyi atata yindi namama yindi, wayinkelihu kulonda adii. Hayilejeli nindi iwu wuchi nawulooli* mumujimba wamutupa wafwaku.
10 Tata yindi wakunkumukili nakuya kudi owu mumbanda, nawa Samusoni welili chidika kwenoku, muloña dichuma chelileñawu anyikwenzi.
11 Chamumweniwu, amuleteleli amayala 30 akakumushinjikijaku kalemba kulonda ashakami nindi.
12 Kuhiñahu, Samusoni wayilejeli nindi: “Mwani ñiitejenu niyitili chishimu. Neyi mumafuku 7 achinu chidika mukuchilumbulula nakunleja muchinatalishi, dikwila nawu nakayinka yakuvwala yamukachi 30 yehina niyakuvwala yikwawu 30.
13 Ilaña neyi mukukañanya kuchinlumbulwila, yenu mwakanyinka yakuvwala yamukachi 30 yehina niyakuvwala yikwawu 30.” Wena ahosheli nawu: “Tutili chishimu cheyi; tunakukeña kuchitiya.”
14 Dichi wayitilili nindi:
“Muchidanyi mwafumini yakuda,Nawa muchuma chañovu mwafumini chuma chatowala.”+
Akañenyi kulumbulula mwatalishili ochu chishimu hadi mafuku asatu.
15 Hefuku damuchiwana, amulejeli ñoda Samusoni nawu: “Mudimbeki nfumweyi+ atuleji munatalishi ichi chishimu. Neyi nehi, tukukwocha nakesi hamu niamwitala datata yeyi. Komana mwatutambika kunu kulonda mututambuli maheta etu tahindi?”
16 Dichi ñoda Samusoni wamudililili nindi: “Namoni wanhela; wankeña wanyi.+ Antu jami wayitila chishimu, ilaña wunanleji wanyi muchinatalishi.” Hohenohu Samusoni wamulejeli nindi: “Muloñadi, atata niamama niwena nayilejichu wanyi! Muloñadi chinukukulejelachu?”
17 Ilaña watwalekelihu kumudilila hadi mafuku ejima 7 achidika. Nkumininaku, hefuku damu 7 wamulejelimu, muloña wamukanjikijileña. Kufumahu, iwu mumbanda wayili nakuleja antu jindi mwatalishili ochu chishimu.+
18 Dichi hefuku damu 7 henohu itena kanda dihumi,* amayala amumusumba amwilili nawu:
“Chumanyi chatowala kubadika wuchi,Nawa chumanyi chikweti ñovu kubadika mutupa?”+
Yena wayakwili nindi:
“Neyi mwabula kudima namwana kañombi wamukaji+ wami,Mwadi kutwesha kulumbulula chishimu chami wanyi.”
19 Dichi spiritu yaYehova yamwinkeli ñovu,+ wakunkumukili nakuya kuAshikeloni+ nakutapa antu jawu 30 awamayala nawa wasendeli yakuvwala yawu nawa yakuvwala yikwawu wenkeli owu antu alumbulwili chishimu.+ Wahilili hafuntileñayi kwitala datata yindi.
20 Nkumininaku ñoda Samusoni+ amuhanini kudi iyala wumu hadi amayala akakumushinjikijaku kalemba owu amutwaliliku.+
Tumazu twaheshina
^ MuchiHeberu, “mumbanda wahadi anyana awambanda aFilisitinu.”
^ MuchiHeberu, “diyi innamoni kuloña mumesu ami.”
^ Hela “mwenzi wamutupa weyala.”
^ Hela “kuhola.”
^ Hela hekwawu, “henohu kanda eñili mukapeka kamukachi.”
