Ansompeshi 15:1-20
-
Kuditenda kwaSamusoni nawaFilisitinu (1-20)
15 Chimwahitili mpinji, mumafuku akwaañula tidiku, Samusoni wayili nakutala ñodindi nawa wasendeli mwana kampembi. Wahosheli nindi: “Inakukeña kuya mudi ñodami mukapeka kakukaama.”* Ilaña tata yamumbanda hamwitejeli kwiñilamuku.
2 Tata yamumbanda wahosheli nindi: “Natoñojokeli nami, ‘Chalala wunamuheli.’+ Dichi namuhanini kudi iyala wakushinjikijiliku.+ Komana mwanyikindi walubanji kumubadika yena wanyi? Dichi sendelakumu mwanyikindi.”
3 Ilaña, Samusoni wayilejeli nindi: “Chayinu mpinji, aFilisitinu bayi antena kutama muloña wakuyila chatamaku.”
4 Dichi Samusoni wayili nakukwata nyumbu 300. Kufumahu, wanoneli yimunyi yakesi, wabalumwini nyumbu yiyedi-yiyedi nakuyitalisha chanyikila nawa wakasili chimunyi chakesi hakachi kanyikila yiyedi-yiyedi.
5 Kuhiñahu, wakwatishili kesi kuyimunyi nakuumbaku oyu nyumbu nawa yayili mumaha mwadiña mbutu yemana yawaFilisitinu. Wocheli jejima kutachikila kuchiita kushika nikumbutu yemana, kushilahu nimatempa anyivinyu nianyiolivi.
6 AFilisitinu ehwili nawu: “Hinyi wuneli chumichi?” Ayilejeli nawu: “Samusoni muku wamwini Timini diyi, muloña wasendeli ñoda Samusoni nakumuhana kudi iyala wamushinjikijiliku.”+ Hohenohu aFilisitinu ayili nakumwocha+ nakesi owu mumbanda hamu natata yindi.
7 Kufumahu, Samusoni wayilejeli nindi: “Ichi neyi dichimuneli, nukuleka wanyi sampu naditendi nanenu.”+
8 Dichi wayitapili wumu-wumu nakujaha antu amavulu chikupu, kuhiñahu, wakunkumukili nakuya nakushakama mwiyeñu damwilola daEtami.
9 Chimwahitili mpinji, aFilisitinu enjili nakuteekela muYuda nawa adiña nakukimboka muLehi.+
10 Kuhiñahu, amayala akumuchidi waYuda ehwili nawu: “Muloñadi chimunenjili nakuzuña nanetu?” wena aakwili nawu: “Tunenzi nakumukwata* Samusoni, kulonda tumwili neyi chinatwiliyi.”
11 Dichi amayala 3,000 akumuchidi waYuda akunkumukilili mwiyeñu damwilola daEtami nakumwila Samusoni nawu: “Komana eyi wuneluki wanyi neyi aFilisitinu diwu anakutuyuula?+ Hanu dinu, muloñadi chiwunelili chumichi?” Yena wayakwili nindi: “Nayili neyi chañililiwu ninami.”
12 Ilaña wena amulejeli nawu: “Tunenzi nakukukwata* kulonda tukuhani kudi aFilisitinu.” Kufumahu, Samusoni wayilejeli nindi: “Sanyikenu kudi ami nenu enu mukuñila chuma chatama wanyi.”
13 Wena amulejeli nawu: “Inehi, tukukukasa hohu nakukuhana kudi wena, ilaña tukukujaha wanyi.”
Dichi amukasili nanyonji yayiha yiyedi nawa amufumishili mwilola.
14 Chashikiliyi kuLehi, aFilisitinu adikuwili nankashi hakumumona. Kuhiñahu, spiritu yaYehova yamwinkeli ñovu+ nawa nyonji yamukasiliwu kumakasa yekalili neyi wanda wehina wunahi nakesi, nawa mpompa jasopokeli kumakasa indi.+
15 Dichi wawanini ifwaha dituuta dachibaña chachimbuulu wachizamba; wolweli chikasa chindi nakudinona nawa wajahili nachu amayala 1,000.+
16 Kufumahu, Samusoni wahosheli nindi:
“Najahi ayilumbu nefwaha dachibaña chachimbuulu nakuyilumbika munyilumba!
Najahi amayala 1,000+ nefwaha dachibaña chachimbuulu.”
17 Chamanishiliyi kuhosha, wanatili odu ifwaha dachibaña kwakulehi nawa iluña denodu wadituumbili nindi Ramatilehi.*+
18 Kuhiñahu, watiyili mpwila nankashi, nawa wamwaabilili Yehova nindi: “Yeyi wunahani iwu wamwinu wasweja muchikasa chakambuñeyi. Ilaña ichi nifwi nampwila nikuholokela mumakasa awayidima?”
19 Hohenohu Nzambi walokweli mwiluña mwanekama muLehi, nawa mwedikili menji.+ Chanwiniyi, spiritu* yindi yafuntilimu nawa wakoleli cheñi. Dichaletesheli hakutuumba odu iluña nindi Enihakori,* didi muLehi kushika nikulelu.
20 Nawa wasompesheli aIsarela mumafuku awaFilisitinu hadi yaaka 20.+
Tumazu twaheshina
^ Hela “mukakapeka kamukachi.”
^ Hela “nakumukasa.”
^ Hela “nakukukasa.”
^ Daya mukwila nawu, “Iluña daHewulu Defwaha dakuChibaña.”
^ Hela “ñovu.”
^ Daya mukwila nawu, “Kaseloki Kanowu Wunakutambika.”
