Ansompeshi 2:1-23
2 Kufumahu, kañelu kaYehova+ wafumini kuGiligali+ nakuya kuBokimi nawa wahosheli nindi: “Nayifumishili muEjipitu nakuyitwala mwituña dinasanyikili kudi ankakulula jenu.+ Kubombelahu, nahosheli nami, ‘Hinakafumpa chitiyañenu chami chinatiyañeni nanenuku.+
2 Ilaña enu, bayi mutiyañana chitiyañenu nawantu ashakamaña munodu ituñaku,+ nawa mwatela kuhumona tumeña+ twawu.’ Ilaña enu himunovwahili izu damiku.+ Muloñadi chimunakoñeli chumichi?
3 Dichaletesheli nihoshi cheñi nami, ‘Hinakayitemuna akafumi kudi enuku,+ nawa wena akekala muhetu kudi enu nawa akayikokola+ kulonda mwakadifukuleña kudi anzambi jawu.’”+
4 Kañelu kaYehova chayilejeliyi aIsarela ejima awa mazu, antu atachikili kudila makumbu.
5 Dichi idi iluña adituumbili nawu Bokimi,* nawa amulambwili Yehova nyilambu kwenoku.
6 Yoshuwa chalejeliyi antu nindi ayi, kaIsarela wejima wayili kuwuswana windi nakushakama mwituña datambwiliwu kulonda diikali iheta dawu.+
7 Antu atwalekelihu kumukalakela Yehova mumafuku aYoshuwa ejima nimumafuku ejima awakulumpi atwalekelihu kuhanda chelili Yoshuwa nafwi dehi, nawa owu amweni yuma yamaneni yejima yamukoñeleliwu Isarela+ kudi Yehova.
8 Kuhiñahu, Yoshuwa kambuña aYehova, mwana kaNuni, wafwili nayaaka 110.+
9 Dichi amujiikili mwiluña dawuswana windi muTiminati Heresi,+ mwiluña damapidi daEfuremu, kukabeta kakuchimunswa kaMpidi yaGayashi.+
10 Idi ikiñu dejima adijiikili neyi chajiikiliwu ankakulula jawu.* Kufumahu, kwenjili ikiñu dikwawu dahiñili hadi wena dabulili kumwiluka Yehova hela yuma yamukoñeleliyi Isarela.
11 Dichi aIsarela elileña yuma yatama kumesu aYehova nawa akalakeleleña* aBayali.+
12 Kuhiñahu, amushiyili Yehova Nzambi yawankakulula jawu wayifumishili mwituña daEjipitu.+ Nawa atachikili kulondela anzambi acheñi, anzambi jawantu ayinyeñumukili,+ nawa adibukileña kudi wena nakumuhilisha Yehova.+
13 Amushiyili Yehova nawa atachikili kukalakela Bayali niyifwikija yaAshitoreti.+
14 Hohenohu, Yehova wayizuwilili aIsarela, dichi wayihanini kudi ayilumbu jawu ayipuupili yuma.+ Wayilandishili kumakasa awayilumbu jawu ayinyeñumukili+ nawa hiyatwesheli cheñi kuyimika mushindu ayilumbu jawuku.+
15 Kwejima kwayileñawu, Yehova wadiña nakuyifutalela, nakuyiletela yihuñu+ neyi chahosheliyi Yehova nawa neyi chasanyikiliyi Yehova kudi wena,+ nawa adiña muyihuñu yasweja.+
16 Dichi, Yehova wayitondeleleña ansompeshi owu adiña nakuyamwina kumakasa awakakuyipuupa.+
17 Ilaña wena akaanineña kutiyilila nikudi ansompeshi nawa elileña wuvumbi nawanzambi acheñi nikudibuka kudi wena. Asenukili swayi-swayi munjila mwendeleñawu ankakulula jawu, owu ovwahilileña nshimbi jaYehova.+ Ilaña wena hiyelili mwokuku.
18 Mpinji yejima neyi Yehova ayinka ansompeshi,+ Yehova wekalileña nanowu nsompeshi nawa wayamwinineña kumakasa awayilumbu jawu mumafuku ejima anowu nsompeshi; muloña Yehova wayitiyilileña wushona*+ nanochu chabileñawu nakukala kwayileteleleñawu kudi owu ayikabishileña+ ninowu ayileteleleña yihuñu.
19 Ilaña neyi nsompeshi afwa, adiña nakukoña cheñi yuma yatama nankashi kubadika ankakulula jawu nakulondela anzambi acheñi, kuyikalakela nikudibuka kudi wena.+ Hiyalekeli yaaku yawu nikuchinchika kwawuku.
20 Nkumininaku, Yehova wayizuwilili aIsarela+ nakuhosha nindi: “Chineli iwu muza wunafumpi chitiyañenu+ chami chinalejeli ankakulula jawu nawa anadikañi nanami,+
21 dichi ami hinakayitemwina muza hela wumu hanyuza yashiliyi Yoshuwa hafwiliyiku.+
22 Nakela mwenimu kulonda nakayeseki aIsarela nakamoni neyi chakwila akatwalekahu kwenda munjila yanami Yehova+ neyi chelili ankakulula jawu.”
23 Dichi Yehova wetejeli iyi nyuza kushala. Hayitemwinimu swayi-swayiku, nawa hayihanini muchikasa chaYoshuwaku.
Tumazu twaheshina
^ Daya mukwila nawu, “Akakudila.”
^ MuchiHeberu, “ayipompesheli neyi chapompesheliwu ankakulula jawu.”
^ Hela “adifukwileña kudi.”
^ Hela “waditoñesheleña.”
