Ansompeshi 20:1-48
-
Kuzuña njita nawaBenjamini (1-48)
20 Nkumininaku, aIsarela ejima kufuma kuDani+ nikuBeyerisheba ndo-o nikumpata yaGiliyadi,+ kushilahu niizaza dawantu dejima adipompesheli hamu kuMizipa+ mukunuñañana* kumesu aYehova.
2 Dichi akulumpi jawantu nawa anyichidi yejima yaIsarela emeni muchipompelu chawantu jaNzambi, dikwila nawu amashidika 400,000 akakwenda hamaseki adimanyekeli mpoku jatubali.+
3 Eni Benjamini atiyili nawu aIsarela anayi kuMizipa.
Kufumahu, aIsarela ehwili nawu: “Tuleji, ichi chuma chatama nankashi chamwekeni ñahi?”+
4 Hohenohu owu iyala kaLevi+ nfumwa anowu mumbanda ajahiliwu, waakwili nindi: “Ami nantombu* yami twashikili muGibeya+ waBenjamini kulonda tukaaminimu.
5 Nawa antu ashakamaña* muGibeya añimakeneni nakunyeñumuka itala nawufuku. Afwilileña kunjaha, ilaña akaamininimu ntombu yami chakumukanjikija nawa wafwili.+
6 Dichi nanoneli mujimba wantombu* yami nakuwuketola nawa natemesheli yimamu mumaluña ejima awuswana waIsarela,+ muloña akoñeli chuma chakutiyisha nsonyi nawa chawuzondu muIsarela.
7 Dichi enu antu ejima aIsarela, kwatenu mpuña+ nawa tulejenu mwakwilila.”
8 Kuhiñahu, antu ejima anyamukili mukunuñañana* nakuhosha nawu: “Hakachi ketu kwosi hela wumu wukuya kwitenti dindi hela kufunta kwitala dindiku.
9 Ichi dichitukwila namusumba waGibeya: Tukuya nakuzuña nawu nachinjikijilu.+
10 Tukusenda amayala 10 kufuma hadi amayala 100 munyichidi yaIsarela yejima, amayala 100 kufuma hadi amayala 1,000 niamayala 1,000 kufuma hadi amayala 10,000 apompesheleli amashidika yakuda kulonda ayi nakuzuña naGibeya waBenjamini muloña wachuma chawuzondu chakoñeliwu muIsarela.”
11 Dichi aIsarela ejima adipompesheli nakudinuña hamu* kulonda azuñi naniwu musumba.
12 Kufumahu, nyichidi yaIsarela yatemesheli amayala kuya kudi amayala anyichidi yaBenjamini nakuyila nawu: “Muloñadi mukachi kenu chimunamwekeni ichi chuma chatama nankashi?
13 Dichi twinkenu owu amayala amukunkulwayi adi muGibeya+ tuyijahi kulonda tufumishi chuma chatama muIsarela.”+ Ilaña aBenjamini akaanini kutiyilila amanakwawu aIsarela.
14 Kuhiñahu, aBenjamini adipompesheleli hamu kuGibeya kufuma munyisumba yawu kulonda ayi nakuzuña njita nawaIsarela.
15 Hanodu ifuku aBenjamini apompesheli amayala 26,000 kufuma munyisumba yawu adimanyekeli mpoku jatubali, kufumishaku amashidika elukisha kuzuña njita 700 akuGibeya.
16 Hadi awa amashidika, hadiña amashidika 700 elukisha kuzuña njita azatishileña makasa achimunswa. Muntu wejima hadi awa amayala wadiña weluka kunata malola chakwila nateli kwasa lusuki chakadi kulweza.
17 Kufumishaku aBenjamini, aIsarela apompesheliwu adiña amayala 400,000 adimanyekeli mpoku jatubali,+ nawa wejima wawu hamuntu-hamuntu adiña eluka chikupu kuzuña.
18 Anyamukili nakuya kuBeteli kulonda amwihuli Nzambi.+ Kufumahu, antu jaIsarela ehwili nawu: “Hinyi hakachi ketu wukutulombola hakuya nakuzuña njita nawaBenjamini?” Yehova wayakwili nindi: “Yuda diyi wukuyilombola.”
19 Kuhiñahu, aIsarela anyamukili ntetemena nawa ateekeleli kwakwihi naGibeya kulonda azuñi naniwu musumba.
20 Dichi awa aIsarela ayili nakuzuña njita nawaBenjamini; aditanjikili kulonda azuñi nawu njita kuGibeya.
21 Dichi aBenjamini afumini kuGibeya nawa hanodu ifuku atapili aIsarela awamayala 22,000.
22 Hela chochu, njita yawantu jaIsarela yahamukili nawa aditanjikili cheñi kulonda azuñili njita heluña dodimu dazuñililiwu hefuku datachi.
23 Kufumahu, aIsarela ayili nakumudilila Yehova kushika nimelela nawa amwihuli Yehova nawu: “Tuyi cheñi nakuzuña njita nawamanakwetu aBenjamini+ tahindi?” Hohenohu Yehova wayakwili nindi: “Yenu mwakazuñi nawu.”
24 Dichi hefuku damuchiyedi, aIsarela aswinini kwakwihi nawaBenjamini.
25 ABenjamini niwena afumini muGibeya hefuku damuchiyedi nakwinza nakudibulakana nawu nawa atapili aIsarela amakwawu 18,000,+ ejima wawu adiña adimanyeka mpoku jatubali.
26 Hohenohu aIsarela ejima ayili kuBeteli. Adilili nawa ashakamini kwenoku kumesu aYehova,+ hanodu ifuku ashakamini chakadi kuda+ kushika nimelela nawa alambwili nyilambu yakushita+ ninyilambu yakuwunda+ kumesu aYehova.
27 Hanyima yachumichi, aIsarela amwihwili Yehova+ muloña chimbañu chachitiyañenu chaNzambi walala chadiña kwenoku munowu mafuku.
28 Kuhiñahu, Finihasi+ mwana kaEleyazari, Eleyazari mwana kaAroni, diyi wakalakeleleña* kuchimbañu munowu mafuku. Ehwili nawu: “Tuyi cheñi nakuzuña njita nawamanakwetu, antu jaBenjamini tahindi nehi?”+ Yehova wayakwili nindi: “Yenuña muloña kumadiki nakayihana mumakasa enu.”
29 Kufumahu, aIsarela ashili antu akubelamina+ nakunyeñumwisha Gibeya yejima.
30 Hefuku damuchisatu, aIsarela ayili nakuzuña nawaBenjamini nawa aditanjikili kulonda azuñi nawaGibeya neyi cheliliwu hampinji jikwawu.+
31 Eni Benjamini ayili nakudibulakana namashidika, dichi ayitemwini mumusumba.+ Kuhiñahu, neyi chelileñawu hampinji jikwawu, atachikili kulukuka nikujaha amayala amakwawu adiña munyikwakwa yamaneni, mukwakwa wumu waya kuBeteli nimukwawu waya kuGibeya, ashili anajahi aIsarela 30 mwisaña.+
32 Dichi aBenjamini ahosheli nawu: “Tunakuyishinda neyi chitwayishindili hakusambila.”+ Ilaña aIsarela ahosheli nawu: “Tukutemuka nakuyitwala kwakulehi namusumba munyikwakwa yamaneni.”
33 Dichi aIsarela ejima anyamukili kufuma mumaluña mwadiñawu nawa ayili nakuditanjika kuBayali Tamari iku aIsarela abelaminini anakufuma mumaluña mwaswaminiwu kwakwihi naGibeya.
34 Dichi, amashidika 10,000 elukisha kuzuña njita kufuma hadi aIsarela ejima enjili kumbidi yaGibeya nawa njita yatoheli chikupu. Ilaña aBenjamini hiyelukili nawu makabi adi kwakwihiku.
35 Yehova wayimikili mushindu aBenjamini+ hamesu awaIsarela, nawa hanodu ifuku aIsarela atapili antu jaBenjamini 25,100, awa ejima adiña adimanyeka mpoku jatubali.+
36 Hela chochu, aBenjamini atoñojokeleña nawu akuyimika aIsarela mushindu chamutemukileñawu Benjamini,+ ilaña atemukileña muloña akuhweleleli mudi antu abelaminini musumba waGibeya.+
37 Owu abelaminini anyamukili swayi-swayi nakuya kuGibeya. Kuhiñahu, owu abelaminini ataandili nakutapa musumba wejima nampoku yakabali.
38 Dichi amashidika aIsarela atiyañeni nawamayala abelaminini musumba nawu cheñilawu mumusumba, atela kumwekesha chinjikijilu chakukakumuna wishi mumusumba.
39 AIsarela chatachikiliwu kutemuka kufuma kunjita, antu jaBenjamini atachikili kulukuka nawa ajahili aIsarela+ kwakwihi na 30, nakuhosha nawu: “Chinakumwekana hatooka to-o nawu tunakuyishinda cheñi neyi chitwayishindili munjita yinafumiku.”+
40 Ilaña chinjikijilu chatachikili kuya mwiwulu neyi chishimi chawishi kufuma mumusumba. Antu jaBenjamini chashetumukiliwu nakutala kunyima, amweni musumba wejima wunakukakumuka wishi mwiwulu.
41 Kufumahu, aIsarela abalumukili nakutachika kulukuka, nawa antu jaBenjamini atiyili woma nankashi muloña amweni nawu makabi anayiwani dehi.
42 Dichi atemukili kufuma kudi amayala aIsarela nakuya mwisaña, ilaña njita yayilondeleli; amayala afumineña munyisumba adibombeli hamu nawu nakuyitapa.
43 Akuchikili aBenjamini nawa ayikumpishili chakadi kuleka. Ayidatoleleli kumbidi yaGibeya kukabadi kakumusela.
44 Nkumininaku, amayala aBenjamini 18,000 afwili, awa ejima adiña akakuzuña njita añovu.+
45 Antu jaBenjamini abalumukili nakutemukila mwisaña kwilola daRimoni,+ nawa aIsarela ajahilihu amayala 5,000 munyikwakwa yamaneni, nawa atwalekelihu kuyikumpisha kushika nikuGidomi; ajahilihu cheñi amayala 2,000.
46 Eni Benjamini ejima afwili hanodu ifuku adiña amayala 25,000 adimanyekeli mpoku jatubali,+ awa ejima adiña akakuzuña njita añovu.
47 Ilaña amayala 600 atemukilili mwisaña kwilola daRimoni, nawa ashakamini kwilola daRimoni tukweji tuwana.
48 Nawa aIsarela afuntili nakuzuña nawaBenjamini nakutapa nampoku yakabali adiña mumusumba, kutachikila kudi antu ndo-o nikudi yimuna, dikwila nawu jejima jashalilimu. Nawa nyisumba yejima yadiña munjila mwahitileñawu ayocheli nakesi.
Tumazu twaheshina
^ MuchiHeberu, “neyi muntu wumu.”
^ Iwu himuntu wamumbanda ahanineñawu chawaana.
^ Hela hekwawu, “eni mpata.”
^ Iwu himuntu wamumbanda ahanineñawu chawaana.
^ MuchiHeberu, “neyi muntu wumu.”
^ MuchiHeberu, “neyi muntu wumu.”
^ MuchiHeberu, “wemeneña.”
