Ansompeshi 21:1-25
-
ABenjamini anayamwini hamu neyi mutaña (1-25)
21 Dichi aIsarela asanyikili iku kusanyika muMizipa+ nawu: “Kwosi muntu hela wumu hakachi ketu wakahana mwanindi wamumbanda kudi iyala mwini Benjamini nindi ekali ñodindiku.”+
2 Nkumininaku, antu enjili kuBeteli+ nawa ashakamini kwenoku kumesu aNzambi walala kushika nimelela, nakudila nikutwa makumbu chikupu.
3 Nawa ahosheleña nawu: “Eyi Yehova Nzambi yaIsarela, muloñadi chumichi chichinamwekeni muIsarela? Muloñadi muchidi wumu chiwukubulenahu dalelu muIsarela?”
4 Dichi hefuku dalondelelihu, antu ahindukili ntetemena nankashi nawa atuñili kameña kwenoku kulonda alambwilihu nyilambu yakushita ninyilambu yakuwunda.+
5 Kuhiñahu, antu jaIsarela elili nawu: “Muchidinyi hakachi kanyichidi yejima yaIsarela wabula kwinza nakupompa kumesu aYehova?” muloña asanyikili chikupu nawu, yowu wakabula kwinza kuMizipa kudi Yehova chiña tuhu akamujahi.
6 Dichi antu jaIsarela aneñeli hachuma chamumwekeneni manakwawu Benjamini. Ahosheli nawu: “Dalelu, muchidi wumu anawuketuliku muIsarela.
7 Tukwila ñahi hakwila nawu aBenjamini anashali tuyikeñeli ambanda chineli tunasanyiki mwijina daYehova+ kubula kuhana anyanetu awambanda kwikala añodi jawu?”+
8 Ehwili nawu: “Muchidinyi hakachi kanyichidi yaIsarela wabula kwinza kudi Yehova kuMizipa?”+ Dichi awanini nawu kwosi hela wumu wafumini kuYabeshi Giliyadi nakwinza muchilombu mwapompeleliwu antuku.
9 Antu chayichindiliwu, awanini nawu kuYabeshi Giliyadi hikwafuminihu muntu hela wumuku.
10 Dichi izaza dawantu datemesheli kwenoku amayala 12,000 añovu chikupu. Ayilejeli nawu: “Yenu mwakatapi nampoku yakabali antu ashakamaña muYabeshi Giliyadi, kushilahu ambanda nianyana.+
11 Ichi dichimwatela kwila: Iyala wejima wakaamahu dehi namumbanda nimumbanda wejima wakaamahu dehi neyala, mwatela kumujaha.”
12 Hakachi kawantu ashakamineña muYabeshi Giliyadi, awaninihu ayañadima 400 adiña ajiki, abulili kukaamahu neyala. Dichi ayitwalili kuchilombu kuShilo,+ yekala mwituña daKenani.
13 Kufumahu, izaza dawantu dejima datemesheli mazu kudi eni Benjamini kwilola daRimoni+ nawa ayilejeli mazu akuwunda.
14 Dichi hanoyu mpinji aBenjamini afuntili. Ayinkeli ambanda owu apulwishiliwu hadi ambanda akuYabeshi Giliyadi,+ hela chochu, hiyawanininiku.
15 Dichi antu aneñeli hachuma chamumwekeneni Benjamini+ muloña Yehova wamwaambwili nakumufumisha hanyichidi yaIsarela.
16 Akulumpi ezaza dawantu ehwili nawu: “Tukwila ñahi hakwila nawu awa amayala anashalihu tuyikeñeli ambanda, chineli ambanda ejima ayijilumwini mudi aBenjamini?”
17 Aakwili nawu: “Eni Benjamini anapuluki atela kutwalekahu kwikala nawuswana kulonda muchidi wakabuli kujiya muIsarela.
18 Ilaña etu hiyatwiteja kuyinka anyanetu awambanda kwikala añodi jawuku, muloña antu jaIsarela anasanyiki nawu: ‘Washiñewa yowu muntu wakasumbwisha mwanindi wamumbanda kudi aBenjamini.’”+
19 Kuhiñahu, ahosheli nawu: “Tiyenu! Hachaaka-hachaaka kwekalaña chawija chaYehova muShilo,+ yekalila kukabeta kakuchimunswa kaBeteli nikumusela wanjila yeneni yafuma kuBeteli nakuya kuShekemi nikukabeta kakuchidiilu kaLebona.”
20 Dichi alejeli antu jaBenjamini nawu: “Yenu mwakajikilili mwitempa danyivinyu.
21 Nawa neyi mumona ayañadima* amuShilo edika nakuhañana iku anakunyeñumuka, muntu-himuntu akafumi mwitempa danyivinyu mwakaswamayi akenzi nakukwatahu chañadima wumu wamuShilo nakumwilisha ekali ñodindi. Kufumahu, mwakabalumuki nakufunta kwituña dawaBenjamini.
22 Nawa neyi atata jawu hela amanakwawu enza nakutwaabila, twakayileja netu, ‘Tutiyilenuku luwi hakukwasha awa amayala, muloña ambanda itwakwatili kunjita+ adiña antesha, dichi wejima wawu hamuntu-hamuntu hiyawanininiku. Nawa kwila muyinka ambanda akusumbula chakubula kwikala namuloñaku.’”+
23 Dichi antu jaBenjamini elili mwenomu, wejima wawu muntu-himuntu wasendeli mumbanda hadi ambanda ahañeneña. Kufumahu, afuntili kuwuswana wawu nawa atuñulwili nyisumba+ yawu nakushakamamu.
24 Hayoyenoyu mpinji, aIsarela apalañeni nakufuma kwenoku, muntu-himuntu wayili kumuchidi windi nikuchisaka chindi, nawa afumini kwenoku, muntu-himuntu wayili kuwuswana windi.
25 Munowu mafuku, muIsarela+ himwadiña mwantaku. Muntu-himuntu welileña chuma chamweneñayi nindi chaloña.*
