Ansompeshi 6:1-40
6 Ilaña aIsarela elili cheñi yuma yatama kumesu aYehova,+ dichi Yehova wayihanini mumakasa awaMidiyani hadi yaaka 7.+
2 AMidiyani akabishileña aIsarela.+ Muloña wawaMidiyani, aIsarela atuñili maluña akuswamamu* mumapidi, mumayeñu nimumaluña akala kushikamu.+
3 Neyi aIsarela akuwa mbutu, ayilukukileña kudi aMidiyani, aAmaleki+ niakaMusela.+
4 Adipompesheleña hamu nakulukuka aIsarela nikukisañana mbutu yamwituña kushika nikuGaza, nawa aIsarela hiyayishilileñahu yakuda, hela mukoku hela ñombi wachizamba hela chimbuuluku.+
5 Muloña enjileña nayimuna yawu nimatenti awu. Enjileña amavulu neyi tuboola,+ wena niangameli awu hiyatwesheleña kuyichindaku,+ nawa neyi anenzi mwituña enjileña nakukisañana ituña.
6 Dichi aIsarela ekalili atuzweñi nankashi muloña wawaMidiyani; nawa aIsarela amwaabilili Yehova nawu ayikwashi.+
7 AIsarela chamwaabililiwu Yehova nawu ayikwashi muloña wawaMidiyani,+
8 Yehova wayitemesheleli aIsarela kaprofwetu wayilejeli nindi: “Yehova Nzambi yaIsarela nahoshi nindi, ‘Nayifumishili mwituña daEjipitu nikuyidisha mwitala dawuduñu.+
9 Dichi enu nayamwinini muchikasa chaEjipitu nikudi antu ejima ayikabishileña nawa nayitemwini kudi enu nawa nayinkeli enu ituña dawu.+
10 Nawa ami nayilejeli enu nami: “Yami Yehova Nzambi yenu.+ Bayi mutiya woma anzambi awaAmori adi mwituña mumunakushakamaku.”+ Ilaña enu mwañovwahililili wanyi.’” *+
11 Chimwahitili mpinji, kañelu kaYehova wenjili+ nakushakama mwishina damutondu weneni wadiña muOfira, waYowashi mwini Abiyezeri.+ Mwanindi weyala Gidiyoni+ wadiña nakuhula tidiku muwukamwinu wavinyu kulonda ayisweki kuchiina aMidiyani.
12 Kañelu kaYehova wamwekeni kudi yena nakumuleja nindi: “Yehova wudi naneyi,+ eyi mushidika wañovu.”
13 Hohenohu Gidiyoni wamwilili nindi: “Eyi mwanta wami, ñanakenuku, neyi Yehova wudi nanetu, hanu dinu muloñadi yuma yejimiyi chiyinakutumwekena?+ Indi nyidimu yindi yakuhayamisha yidi kudihi yatulejeliwu+ ankakulula jetu nawu, ‘Komana Yehova hatufumishili muEjipituku?’+ Ilaña ichi Yehova natushiyi+ chisayikila nawa natuhani mumakasa awaMidiyani.”
14 Yehova wamutalili nakumuleja nindi: “Yaña nañovu jiwukweti nawa wukwamwina aIsarela mumakasa awaMidiyani.+ Komana hiyami inakutemeshiku?”
15 Ilaña Gidiyoni wamwakwili nindi: “Eyi Yehova, ñanakenuku. Indi ami nukutwesha ñahi kwamwina aIsarela? Talaña! Mutaña* wami diwakuminamu mudi Manasi, nawa yami wabula kulema nankashi mwitala datata yami.”
16 Ilaña Yehova wamulejeli nindi: “Chineli ami nukwikala naneyi,+ aMidiyani wukuyitapa neyi kwiji wunakutapa muntu wumu.”
17 Kuhiñahu, yena wamwilili nindi: “Dichi neyi wunantiyi kuwaha, mmwekesheli chinjikijilu chikumwekesha nawu yeyi wunakuhosha nanami.
18 Mwani bayi wufuma hadinu iluñaku, sampu nichinukufunta nachawaana chami kulonda nikwinki.”+ Dichi yena wamulejeli nindi: “Nukwikala hohanu sampu wunafunti.”
19 Kufumahu, Gidiyoni weñilili mukachi nawa watelekeli mwana kampembi nikwocha mankendi akadi iluñi kuzatisha chipimu chaifa* chawuña walembuluka.+ Washili mbiji muchimpaaya* nimusoji* mundehu; kuhiñahu wamutwalilili nawa wayitentekeli mwishina damutondu weneni.
20 Hohenohu kañelu kaNzambi walala wamulejeli nindi: “Nonaku mbiji nimankendi akadi iluñi wuyitenteki hadina ilola deneni, nawa wichilihu musoji.”* Dichi welili mwenomu.
21 Kuhiñahu, kañelu kaYehova wolweli mukombu wadiña muchikasa chindi nakukunka insa yawu hambiji nihamankendi akadi iluñi, nawa kesi kabutukili mwilola nakwocha mbiji nimankendi akadi iluñi.+ Kufumahu, kañelu kaYehova wajimañeni kumesu aGidiyoni.
22 Gidiyoni dihelukiliyi nindi wadiña kañelu kaYehova.+
Hohenohu Gidiyoni wahosheli nindi: “Mama-a! Yehova Mwanta Wabadika, namoni kañelu kaneyi Yehova mesu-namesu.”+
23 Ilaña Yehova wamulejeli nindi: “Kuwunda kwiikali naneyi. Bayi wutiya womaku;+ wukufwa wanyi.”
24 Dichi Gidiyoni wamutuñilili Yehova kameña kwenoku, nawa akitenaña nawu Yehova Shalomi*+ kushika nikulelu. Kachidi muOfira wawaAbiyezeri.
25 Hawowenowu wufuku, Yehova wamulejeli nindi: “Sendaku mwana kañombi wachizamba watata yeyi, mwana kañombi wachizamba wamuchiyedi wudi nayaaka 7. Kuhiñahu, wuhumuni kameña kaBayali katata yeyi nawa wutemi chishimi chajila* chidi kwakwihi nakameña.+
26 Neyi wunamutuñili dehi Yehova Nzambi yeyi kameña namalola munyisululu hewulu danidi iluña dakiñewa, wunoni mwana kañombi wachizamba wamuchiyedi nawa wumulambuli ekali mulambu wakushita hanchawa jikufuma hachishimi chajila* chiwukutema.”
27 Dichi Gidiyoni wasendeli amayala 10 hadi ambuñindi nawa welili kwesekeja nachamulejeliwu kudi Yehova. Ilaña watiyili woma nankashi amwitala datata yindi niamayala amumusumba, dichi hatwesheli kwila chumichi namwaanaku, ilaña wachilili nawufuku.
28 Amayala amunowu musumba chahindukiliwu ntetemena nankashi, awanini kameña kaBayali anakihumuni nichishimi chajila* chadiña kwakwihi nichena anachitemi nawa mwana kañombi wachizamba wamuchiyedi anamulambwili hakameña katuñawu.
29 Dichi adihwili mulwawu nawu: “Hinyi wuneli chumichi?” Hanyima yakusandujola, ahosheli nawu: “Gidiyoni mwana kaYowashi diyi wuneli chumichi.”
30 Dichi amayala amumusumba amulejeli Yowashi nawu: “Mwidishi mwaneyi kulonda afwi, muloña nahumuni kameña kaBayali nikutema chishimi chajila* chadiña kwakwihi nakameña.”
31 Kuhiñahu, Yowashi+ wayilili ejima amwimakeneni nindi: “Enu munakumuhakwilaku Bayali tahindi? Munakukeña kumwamwina? Muntu wejima wukumuhakwilaku atela kumujaha ntetemena yinu.+ Neyi hinzambi, mulekenu adihakwili yomweni+ chineli muntu nahumuni kameña kindi.”
32 Nawa hadodenidi ifuku, wamutuumbili Gidiyoni nindi Yerubayali* nawa wahosheli nindi: “Mulekenu Bayali adihakwili yomweni chineli muntu nahumuni kameña kindi.”
33 AMidiyani+ ejima, aAmaleki+ niakaMusela abombeli hamu amashidika awu;+ nawa azambukili kaloña nakuya muChinekineki chaYezireyeli nawa ateekeleli kwenoku.
34 Kuhiñahu, spiritu yaYehova yenjili hadi* Gidiyoni+ nawa wavumishili nseñu,+ dichi aAbiyezeri+ adipompesheli hamu nakumukwasha.
35 Gidiyoni watemesheli antemesha kudi aManasi ejima nawa enjili nakumukwasha. Watemesheli cheñi antemesha kudi aAsheri, kudi aZebuluni nikudi aNafitali, niwena enjili nakumukinkilila.
36 Kufumahu, Gidiyoni wamwilili Nzambi walala nindi: “Neyi wunakwamwina aIsarela kuzatisha ami, neyi chiwunakani,+
37 inakusha mavuji amukoku hawuhulilu. Neyi wuumi wukwikala hohu hamavuji* amukoku ilaña heseki hejima hadi mavuji hakwikala homa, dihinukwiluka nami wukwamwina aIsarela kuzatisha ami, neyi chiwunakani.”
38 Nawa dichi chichamwekeni. Chanyamukiliyi ntetemena nankashi hefuku dalondelelihu, wakaamwini wuumi wawuvulu nankashi kumavuji amukoku nakwinzesha menji mucheña cheneni chakunama.
39 Hela chochu, Gidiyoni wamwilili Nzambi walala nindi: “Bayi wunzuwilaku, ilaña ñiiteji nilombi cheñi kakukumishaku. Mwani, ñiiteji neseki cheñi kwila chuma chakukumishaku nanawa mavuji amukoku. Mwani umishaku hohu mavuji amukoku ilaña heseki hejima hekali wuumi.”
40 Ichi dichuma chakoñeliyi Nzambi hawuna wufuku; mavuji amukoku hohu diwu omini, ilaña heseki hejima hadiña wuumi.
Tumazu twaheshina
^ Hela hekwawu, “maluña akuhembelamu ahamaseki.”
^ MuchiHeberu, “mwatiyililili mwizu dami wanyi.”
^ MuchiHeberu, “Ikombakaji.”
^ Kwakwihi namalita 22 (makwati 20 oma). Talenu Nsañu Jikwawu B14.
^ Hela “mubasiketi.”
^ Hela “muzoñu.”
^ Hela “muzoñu.”
^ Daya mukwila nawu, “Yehova hiKuwunda.”
^ Talenu Kulumbulula.
^ Talenu Kulumbulula.
^ Talenu Kulumbulula.
^ Talenu Kulumbulula.
^ Daya mukwila nawu, “Mulekenu Bayali Yadihakwili (Yalwishi).”
^ MuchiHeberu, “yamuvwikili.”
^ Dikwila nawu, mavuji anafumiwu tuhu nakutewulawu kumukoku.
