Ansompeshi 7:1-25
7 Kufumahu, Yerubayali, dikwila nawu Gidiyoni,+ hamu nawantu ejima adiñayi nawu anyamukili ntetemena nankashi nakuteekela kuKaseloki kaHarodi, henohu chilombu chawaMidiyani chidi kukabeta kakuchimunswa kachilombu chaGidiyoni kukapidi kaMore muchana chachinekineki.
2 Dichi Yehova wamulejeli Gidiyoni nindi: “Antu iwudi nawu anasweji kuvula hakwila nawu niyinki aMidiyani mumakasa awu.+ Neyi nehi, aIsarela anenzi atachiki kudivwimba kudi ami nakuhosha nawu, ‘Makasa etu diwu anatupulwishi.’+
3 Ichi dinu, mwani bidikaku kudi antu neyi: ‘Muntu wejima wunatiyi woma nawa wunakuzaala, yafunti kwitala.’”+ Dichi Gidiyoni wayesekeli. Kufumahu, antu 22,000 afuntili kumatala, nawa hashalili hohu 10,000.
4 Hela chochu, Yehova wamulejeli Gidiyoni nindi: “Antu achidi amavulu nankashi. Yitwali kumenji kulonda nikwesekeliwu kwenoku. Neyi nikuleja nami, ‘Iwu wukuya naneyi,’ chalala wukuya hamu naneyi, ilaña neyi nikuleja nami, ‘Iwu wukuya naneyi wanyi,’ chalala hakuya hamu naneyiku.”
5 Dichi watwalili antu kumenji.
Kuhiñahu, Yehova wamulejeli Gidiyoni nindi: “Waambuli antu ejima akukabula menji nedimi neyi chakabulañayi kawa, wuyaambuli hadi owu akufukama hakunwa menji.”
6 Kuvula kwawantu aswipwileña menji namakasa nakusha hakanwa, adiña amayala 300. Antu ejima anashali afukamini hakunwa menji.
7 Dichi Yehova wamulejeli Gidiyoni nindi: “Nukuyamwina kuzatisha awa amayala 300 aswipulaña menji namakasa hakunwa, nawa nukuyihana aMidiyani muchikasa cheyi.+ Ilaña antu ejima anashali afunti kumatala.”
8 Chelili anatambuli dehi yakuda ninseñu kudi antu, walejeli amayala aIsarela amakwawu ejima kufunta kumatala, ilaña washalili hohu nawamayala 300. Kufuma hadiñayi, chilombu chawaMidiyani chadiña mwishina muchana chachinekineki.+
9 Hawowenowu wufuku, Yehova wamulejeli nindi: “Nyamukaku, yaku wulukuki chilombu, muloña nachihani muchikasa cheyi.+
10 Ilaña neyi wunakutiya woma kuchilukuka, kunkumukaku wuyi kuchilombu hamu naPura nhembi yeyi.
11 Wutiyilili kunsañu yikuhanjikañawu, kufumahu, wukwikala nawulobu wakulukuka* chilombu.” Hohenohu, yena niPura nhembi yindi akunkumukili nakuya kunsa yachilombu chamashidika.
12 Dichi aMidiyani, aAmaleki niakaMusela+ ejima ataandili muchana chachinekineki chejima neyi mukanka watuboola, nawa angameli awu avulili nankashi chakukañanya kuyichinda,+ avulili neyi wusekulula kuchikumu chakaluñalwiji.
13 Kufumahu, Gidiyoni wenjili, nawa kwadiña iyala wumu wadiña nakuleja mukwawu chilota chaloteliyi nindi: “Ichi dichinalota. Nalota dinkendi dabali danjiñumuki dinakukunkumukila muchilombu chawaMidiyani. Dashika kwitenti nawa dahumaku nañovu chakwila itenti dakunduka.+ Chalala, dakuvumika itenti, nawa itenti dakaama heseki kwala-a.”
14 Hohenohu mukwawu wahosheli nindi: “Chumichi namoni himpoku yakabali yaGidiyoni+ iyala kaIsarela, mwana kaYowashi. Nzambi nahani aMidiyani nichilombu chawu chejima muchikasa chindi.”+
15 Gidiyoni chatiyiliyi tuhu owu iyala chalumbulwiliyi chilota nimuchatalishili,+ wadibukili heseki nakudifukula. Kuhiñahu, wafuntili kuchilombu chawaIsarela nakuhosha nindi: “Nyamukenu, muloña Yehova nayinki chilombu chawaMidiyani mumakasa enu.”
16 Dichi, waambwili awa amayala 300 mumazanvu asatu nawa wejima wawu wayinkeli nseñu+ ninsaba jamaneni mwadiña yimunyi.
17 Kuhiñahu, wayilejeli nindi: “Muntaleña nawa mwileña mwejima munukwilaña. Chinashika kunsa yachilombu, mwatela kwila mwomunukwila.
18 Neyi nivumisha nseñu hamu nanowu ejima inidi nawu, ninenu mwatela kuvumisha nseñu muchilombu chejima nakubidika nenu, ‘YaYehova nawa yaGidiyoni!’”
19 Gidiyoni hamu nawamayala 100 adiñayi nawu ashikili kunsa yachilombu hakutachika kwachilu chahakachi kawufuku,* hanyima tuhu yakuhimpa anhembi. Avumishili nseñu+ nikufumpa nsaba jamaneni jamenji jadiña mumakasa awu.+
20 Dichi owu mazanvu asatu avumishili nseñu nikufumpa oju nsaba jamaneni. Akwatili yimunyi mumakasa awu achimunswa nakuvumisha nseñu jadiña mumakasa awu achidiilu nawa abidikili nawu: “Mpoku yakabali yaYehova nawa yaGidiyoni!”
21 Muntu-himuntu watwalekelihu kwimana heluña hadiñayi kunyeñumuka chilombu chejima, nawa amashidika ejima atemukileña iku anakubilela.+
22 Owu amayala 300 atwalekelihu kuvumisha nseñu, nawa Yehova welishili muntu-himuntu muchilombu chejima+ kutapa mukwawu nampoku yakabali; nawa amashidika atemukili nakuya kuBetishita nakushika kuZerera ndo-o nikunsa yaAbeli Mehola+ kwakwihi naTabati.
23 Kuhiñahu, amayala aIsarela adipompesheli hamu kufuma kudi aNafitali, aAsheri nikudi aManasi+ ejima, nawa akumpishili aMidiyani.
24 Gidiyoni watemesheli antemesha kuya mwiluña dejima damapidi daEfuremu nakuyileja nindi: “Kunkumukenu muyi nakulukuka aMidiyani nawa muyijikilili kunyaaba yaYodani nikutusulu twindi kushika nikuBetibara.” Dichi amayala ejima aEfuremu ayipompesheli hamu, nawa ajikilili kunyaaba yaYodani kushika nikuBetibara.
25 Akwatili niatulamba awaMidiyani ayedi, aOrebi naZeyebi; Orebi amujahilili helola daOrebi+ nawa Zeyebi amujahilili kuwukamwinu wavinyu waZeyebi. Atwalekelihu kuyikumpisha aMidiyani+ nawa aleteli mutu waOrebi niwaZeyebi kudi Gidiyoni mwiluña daYodani.
Tumazu twaheshina
^ MuchiHeberu, “makasa eyi akusweja kukola kulonda wulukuki.”
^ Kutachika kwakwihi na 10 koloku yawufuku kushika kwakwihi na 2 koloku yakumacha.
