Ansompeshi 9:1-57
9 Mukuhita kwampinji, Abimeleki+ mwana kaYerubayali weyala wayili kudi amana kwamama yindi muShekemi, nawa wayilejeli hamu nachisaka chejima chankaaka yindi weyala nindi:*
2 “Mwani ihulenu anlomboli* ejima amuShekemi nenu, ‘Chumanyi chikuyiwahila, kuyiyuula kudi anyana kaYerubayali+ awamayala ejima 70, tahindi kuyiyuula kudi iyala wumu? Nawa anukenu nenu yami ifwaha denu nawa mujimba wenu.’”*
3 Dichi amana kwamama yindi amuhosheleliku awa mazu kudi anlomboli ejima amuShekemi, nawa nyichima yawu yafwilileña kulondela Abimeleki, muloña ahosheli nawu: “Himanakwetu.”
4 Kuhiñahu, amwinkeli yikunku yasiliva 70 kufuma mutembeli yaBayali Beriti,*+ nawa Abimeleki wafweteli amayala abulili jakwila nawa ahamuka kulonda amutwaliku.
5 Kuhiñahu, wayili kwitala datata yindi kuOfira+ nawa wajahili amanakwindi,+ anyana kaYerubayali awamayala, amayala 70 nawa wayijahilili helola dimu hohu. Yotamu kabinda kaYerubayali diyi hohu wapulukili muloña waswamini.
6 Kufumahu, anlomboli amuShekemi ejima nieni Beti-milo ejima adipompesheli hamu nawa amuswanyikili Abimeleki hawanta,+ kwakwihi namutondu weneni, kuchishimi chadiña muShekemi.
7 Chamulejeliwu Yotamu iyi nsañu, hohenohu wayili nakwimana hewulu daMpidi yaGerizimi+ nawa wabidikili nezu datiyakana kudi wena nindi: “Ntiyililenu, enu anlomboli amuShekemi nawa Nzambi niyena dihakuyitiyililayi.
8 “Hampinji yimu, kwadiña nyitondu yayili nakuwayisha mwanta kulonda yayiyuuleña. Dichi alejeli mutondu wamuolivi nawu, ‘Tuyuuleña.’+
9 Ilaña owu mutondu wamuolivi wayilejeli nindi, ‘Komana nateli kushiya manji* ami azatishañawu kumulemesha nachu Nzambi niantu nakuya nakuyuula nyitondu yikwawu?’*
10 Kuhiñahu, nyitondu yalejeli mutondu wachikuyu nawu, ‘Inzaku wutuyuuleña.’
11 Ilaña mutondu wachikuyu wayilejeli nindi, ‘Komana nateli kushiya kutowala kwami ninyikaabu yami yayiwahi nakuya nakuyuula nyitondu yikwawu?’*
12 Kufumahu, nyitondu yalejeli muvinyu nawu, ‘Inzaku wutuyuuleña.’
13 Muvinyu wayakwili nindi, ‘Komana nateli kushiya vinyu yami yayiha yamuzañaleshaña Nzambi niantu nakuya nakuyuula nyitondu yikwawu?’*
14 Nkumininaku, nyitondu yejima yalejeli mutondu wanyiña nawu, ‘Inzaku wutuyuuleña.’+
15 Hohenohu iwu mutondu wanyiña walejeli nyitondu yikwawu nindi, ‘Neyi chalala munakunwayisha kwikala mwanta wukuyiyuulaña, inzenu muswami muwulelu wami. Ilaña neyi nehi, kesi kafumi mumutondu wanyiña nakwocha nyitondu yanyisida yakuLebanoni.’
16 “Komana muneli chuma chachiwahi nankashi nawa chakalemesha hakumwilisha Abimeleki kwikala mwanta+ tahindi? Komana munamwilili Yerubayali niamwitala dindi chuma chachiwahi? Nawa munamwilili chuma chamutelela tahindi?
17 Tata yami chayizuñililiku enu,+ washili wumi windi muwubanji kulonda ayamwini mumakasa awaMidiyani.+
18 Ilaña dalelu munemakeni amwitala datata yami nakujaha anyanindi awamayala, amayala 70, munayijahili helola dimu hohu.+ Kuhiñahu, munamwilishi Abimeleki mwana kanduñu yindi wamumbanda+ kwikala mwanta wakuyuula anlomboli amuShekemi muloña himanakwenu.
19 Chalala, neyi dalelu muneli chuma chachiwahi nankashi nawa chakalemesha kudi Yerubayali niamwitala dindi, muzañalelenu Abimeleki nawa niyena ayizañaleli enu.
20 Ilaña neyi nehi, kesi kafumi kudi Abimeleki nakwocha anlomboli amuShekemi niamuBeti-milo,+ nawa kesi kafumi mudi anlomboli amuShekemi niamuBeti-milo nakumwocha Abimeleki.”+
21 Kuhiñahu, Yotamu+ watemukili nakuya kuBeyeri nawa washakamini kwenoku muloña wamutiyileña manakwindi Abimeleki woma.
22 Abimeleki wayuulili* aIsarela hadi yaaka yisatu.
23 Kufumahu, Nzambi washili nkunyi* hakachi kaAbimeleki nawanlomboli amuShekemi, nawa amubalumukililimu Abimeleki.
24 Chadiña mwenimu kulonda kwiikali kutenda muloña wamadombu ayimwekesheleliwu anyana kaYerubayali awamayala 70, kulonda mashi awu ekali hadi manakwawu Abimeleki muloña wakuyijaha+ nihadi anlomboli amuShekemi muloña wakumukwashaku kujaha amanakwindi.
25 Dichi anlomboli amuShekemi atemesheli antu kuya nakumujikilila hewulu damapidi, nawa awa antu adiña nakubuwa yuma kudi muntu wejima wadiña nakuhita munjila kwakwihi nawena. Mukuhita kwampinji Abimeleki amulejelimu iyi nsañu.
26 Kuhiñahu, Gayali mwana kaEbedi hamu nawamanakwindi azambukilili kuShekemi,+ nawa anlomboli amuShekemi amukuhweleleli.
27 Ayili mwiha nawa apompesheli nyivinyu mumatempa awu anyivinyu, ayidatoleli, nawa ekalili nachawija. Kufumahu, ayili mwitala danzambi yawu,+ adiili, anwini nawa amushiñili Abimeleki.
28 Kuhiñahu, Gayali mwana kaEbedi welili nindi: “Indi Abimeleki diyinyi, nawa Shekemi diyinyi mwaka tumukalakeli? Hidiyi mwana kaYerubayaliku,+ nawa Zebuli hidiyi ñimeni yindiku? Kalakelenu amayala akaHamori, tata yaShekemi! Muloñadi wutukumuzatila Abimeleki?
29 Awa antu neyi yami nayilombolaña, mutenowu namufumishahu dehi Abimeleki.” Kuhiñahu, wamulejeli Abimeleki nindi: “Vulishaku amashidika eyi nawa widiki hanji kulonda wuzuñi nanami.”
30 Zebuli kalamba kamusumba chatiyiliyi mazu ahosheliyi Gayali mwana kaEbedi, wahilili nankashi.
31 Dichi watemesheli antemesha kudi Abimeleki mukuswamujoka* nakumuleja nindi: “Tiyaña! Gayali mwana kaEbedi hamu nawamanakwindi ichi adi dehi muShekemi, nawa anakudimbeka antu amumusumba kulonda akwimakeni.
32 Dichi winzi nawufuku, eyi niantu jeyi nawa muyijikilili mwiha.
33 Itena chidasela tuhu ntetemena, wakanyamuki ntetemena nankashi nakulukuka musumba; nawa neyi yena niantu jindi akenzi nakukwimakena, wakazati nañovu jeyi jejima kulonda wakamushindi.”*
34 Dichi Abimeleki niantu ejima adiñayi nawu anyamukili nawufuku nawa amujikililili Shekemi namazanvu awana.
35 Gayali mwana kaEbedi chayiliyi nakwimana hawiñililu wakuchiisu chamusumba, Abimeleki hamu nawantu jindi anyamukili nakufuma hajikilililiwu.
36 Gayali chamweniyi antu, wamulejeli Zebuli nindi: “Talaña! Kudi antu anakusuluka kufuma hewulu damapidi.” Ilaña Zebuli wamulejeli nindi: “Wunakumona nyevulu yamapidi neyi antu.”
37 Chimwahitili mpinji, Gayali wahosheli nindi: “Talaña! Antu anakukunkumuka kufuma hakachi kampata, nawa izanvu dimu dinakwinjila munjila yahitila kumutondu weneni waMeyonenimi.”
38 Zebuli wamwilili nindi: “Indi kudisamba kweyi kudihi kwakwila neyi, ‘Indi Abimeleki diyinyi mwaka tumukalakeli?’+ Komana awa hidiwu antu iwakaaniniku? Ichi dinu idikaku hanji wuzuñi nawu.”
39 Dichi Gayali wedikili hanji nakutwaminaku hambidi yawanlomboli amuShekemi nawa wazuñili naAbimeleki.
40 Abimeleki wamukumpishili, dichi Gayali wamutemukili nawa antu amavulu ayijahili kushika nikuwiñililu wakuchiisu chamusumba.
41 Abimeleki watwalekelihu kushakama muAruma, nawa Zebuli+ wamuhañili Gayali niamanakwindi muShekemi.
42 Ifuku dalondelelihu, antu edikili nakuya hanji yamusumba nawa Abimeleki amulejelimu iyi nsañu.
43 Dichi wasendeli antu nakuyanzañana mumazanvu asatu nawa ajikililili hanji yamusumba. Chamweniyi antu anakwidika mumusumba, wayilukukili nakuyitapa.
44 Abimeleki nimazanvu adiñayi nawu, ayili kumbidi nakwimana hawiñililu wakuchiisu chamusumba iku mazanvu ayedi anakulukuka antu ejima adiña hanji yamusumba nawa ayitapili.
45 Abimeleki wazuñili naniwu musumba hanodu ifuku dejima nawa wawimikili mushindu. Wajahili antu ejima adiñamu, kuhiñahu, wahumwini musumba+ nawa wakuwilimu muñwa.
46 Anlomboli ejima akukaposhi kakuShekemi chatiyiliwu chumichi, hohenohu ayili mukapeka kakola kamwitala daEliberiti.+
47 Abimeleki chamulejeliwu tuhu nawu anlomboli ejima akukaposhi kakuShekemi anadipompeshi hamu,
48 Abimeleki niantu ejima adiñayi nawu akandamini haMpidi yaZalimoni. Abimeleki wanoneli chizembi nakutema mutayi wamutondu nakuwusenda hachifwiji nawa walejeli antu adiñayi nawu nindi: “Chuma chimwamona ami inakwila, ninenu nyakalenu kwila mwomumu!”
49 Dichi antu ejima niwena atemeni nyitayi nakumulondela Abimeleki. Kuhiñahu, atentekeli oyu nyitayi kukapeka kakola nawa akwocheli nakesi. Dichi antu ejima akukaposhi kakuShekemi niwena afwili, kwakwihi nawantu awamayala niawambanda 1,000.
50 Kuhiñahu, Abimeleki wayili kuTebezi; wateekeli kulonda azuñi namusumba waTebezi nawa wawutambwili.
51 Hakachi kamusumba, hadiña kaposhi kakola nawa dimwatemukililiwu amayala ejima niambanda kushilahu nianlomboli amusumba ejima. Adenzelelelimu nawa akandamini hewulu dakaposhi.
52 Abimeleki wayili kukaposhi nawa wakilukukili. Washikili kuwiñililu wakaposhi kulonda akwochi nakesi.
53 Dichi mumbanda wumu wamuholweleli Abimeleki mpandishi hamutu nakuchika kawekesi kindi.+
54 Hohenohu wanyakeli kutambika nhembi yindi wamusendeleleñaku yitwa yanjita nakumuleja nindi: “Holaku mpoku yeyi yakabali wunjahi kulonda akabuli kuhosha hadi ami nawu, ‘Amujahili kudi muntu wamumbanda.’” Dichi nhembi yindi wamuhanwishili mpoku nzwa-a, afwa nikufwa.
55 Amayala aIsarela chamweniwu nawu Abimeleki nafwi, wejima wawu afuntili kumatala awu.
56 Dichi Nzambi wamufweteli Abimeleki hachuma chatama chakoñeliyi kudi tata yindi chajahiliyi amanakwindi 70.+
57 Nawa Nzambi wafuntishili kutama kwejima kwawamayala amuShekemi hanyitu yawu awenawu. Dichi ishiñu daYotamu+ mwana kaYerubayali+ denjili hadi wena.
Tumazu twaheshina
^ MuchiHeberu, “nachisaka chawantu amwitala datata yamama yindi.”
^ Hela hekwawu, “eni mpata.”
^ Hela “ntaña yenu wamashi wowamu.”
^ MuchiHeberu, “mwitala daBayali Beriti.”
^ Hela “nyikaabu.”
^ MuchiHeberu, “nakunyinkesha hewulu danyitondu yikwawu.”
^ MuchiHeberu, “nakunyinkesha hewulu danyitondu yikwawu.”
^ MuchiHeberu, “nakunyinkesha hewulu danyitondu yikwawu.”
^ Hela “wekalili kalamba.”
^ MuchiHeberu, “watemesheli spiritu yatama.”
^ Hela “mukubabala.”
^ Hela “wakamwili chuma chejima chakatwesha kwila chikasa cheyi.”
