Danyeli 2:1-49
-
Mwanta Nebukaneza naloti chilota chinamwakamishi (1-4)
-
Kwosi mukamaana wunatweshi kushimuna chilota (5-13)
-
Danyeli nalombi wukwashu kudi Nzambi (14-18)
-
Nzambi ashimekewi hakusolola kajindilu (19-23)
-
Danyeli namuleji mwanta chilota (24-35)
-
Kulumbulula chilota (36-45)
-
Ilola dawanta dakajilumuna nkishi (44, 45)
-
-
Danyeli anamulemeshi kudi mwanta (46-49)
2 Muchaaka chamuchiyedi chachiyuulu chindi, Nebukaneza waloteli yilota yayivulu, nawa wakameneni nankashi+ chakwila wakañenyi nikukaama.
2 Dichi mwanta wahanini lushimbi lwakutambika atutepa, akakutaha, akakupanda niaKalideya* kulonda amuleji mwanta yilota yindi. Dichi eñilili mukachi nawa emeni kumesu amwanta.+
3 Kuhiñahu mwanta wayilejeli nindi: “Nalota chilota, nawa nakameni muloña inakukeña kwiluka munalota.”
4 AKalideya amwakwili mwanta mwidimi dachiAramayiki* nawu:+ “Eyi mwanta, twalekakuhu kuhanda haya nyaaka. Tuleji etu ambuñeyi chilota, nawa tukukuleja muchinalumbulukili.”
5 Mwanta wayakwili aKalideya nindi: “Awa diwu mazu ami akukumishaku: Neyi mukunleja chilota chami wanyi nawa neyi mukubula kunlumbulwila muchinatalishi, nukuyiketola nawa matala enu akwikala nyisalanyi* yawantu ejima.
6 Ilaña neyi mukunleja chilota chami nimuchinalumbulukili, nukuyinka yawaana, wufwetu nikalemesha kakeni.+ Dichi nlejenu chilota nimuchinalumbulukili.”
7 Amwakwili kamuchiyedi nawu: “Eyi mwanta tuleji etu ambuñeyi chilota, nawa tukukuleja muchinalumbulukili.”
8 Mwanta waakwili nindi: “Neluki chikupu nami munakushintajalilamu hohu, muloña muneluki mazu ami akukumishaku.
9 Neyi mukunleja chilota chami wanyi, kudi hohu chuma chimu chinukuyila wejima wenu. Ilaña munatiyañani kulonda mundimbi nawa munleji yuma yakutwamba nakumona nenu nukuhimpa yitoñojoka yami. Dichi nlejenu chilota, nawa nukwiluka nami munateli kulumbulula muchinatalishi.”
10 AKalideya amwakwili mwanta nawu: “Kwosi muntu hela wumu hamaseki* wunateli kwila chuma chinalombiyi mwantaku, muloña kwosi mwanta wabadika hela nguvulu wehulahu dehi chuma chamuchidiwu kudi katepa hela mukakutaha hela mwini Kalideyaku.
11 Chuma chinakulombayi mwanta chakala, nawa hikudi muntu wunateli kumuleja mwanta chumichiku, chiña anzambi hohu, abulaña kushakama nawantu afwaña.”*
12 Hohenohu mwanta wazuwili nankashi nawa wahanini lushimbi lwakujilumuna akamaana ejima amuBabiloni.+
13 Chelili nahani dehi lushimbi nawa chadiñawu kwakwihi nakuyijaha akamaana, Danyeli niakwawu adiñayi nawu niwena ayikeñakeñeli kulonda ayijahi.
14 Hanoyu mpinji Danyeli wahosheli mukuswamujoka nawa mukubabala naAriyoki mukulumpi wawanhembi jamwanta, wayileña nakujaha akamaana amuBabiloni.
15 Wamwihwili Ariyoki chilolu chamwanta nindi: “Mwanta nahaninidi lushimbi lwatama ñana?” Kufumahu Ariyoki wamulejelimu Danyeli chadiña nsañu.+
16 Dichi Danyeli weñilili mukachi nawa wamulombeli mwanta amwinki mpinji kulonda amulumbulwili mwanta chilota chindi.
17 Kufumahu, Danyeli wayili kwitala dindi nawa wayilejelimu akwawu adiñayi nawu, aHananiya, Mishayeli niAzariya iyi nsañu.
18 Wayilejeli nindi alombi kudi Nzambi wamwiwulu ayitiyili luwi hanaka kajindilu, kulonda Danyeli niakwawu abuli kuyikisañena hamu nawakamaana amuBabiloni.
19 Kuhiñahu Danyeli amusolweleli aka kajindilu muchimwenu nawufuku.+ Dichi Danyeli wamushimekeli Nzambi wamwiwulu.
20 Danyeli wahosheli nindi:
“Ijina daNzambi adishimiki haya nyaaka nanyaaka,*Muloña maana niñovu jindi hohu nkawindi.+
21 Wahimpaña mpinji niyilaaka,+Wafumishañahu anyanta nakushahu anyanta,+Wahanaña maana kudi akamaana nikwiluka kudi akweti kashinshi.+
22 Wasololaña yuma yakunama niyuma yakujinda,+Weluka yuma yidi mumwidima,+Nawa kudi yena kwekala chejeji.+
23 Nakusakilili nikukushimeka, eyi Nzambi yawankakulula jami,Muloña wunanyinki maana niñovu.
Nawa wunanleji yuma yitwakulomba;Wunatuleji yuma yinakumwakamisha mwanta.”+
24 Danyeli weñilili mwadiña Ariyoki, owu watondeliwu kudi mwanta kuya nakujilumuna akamaana amuBabiloni,+ nawa wamulejeli nindi: “Bayi wujaha mukamaana wudi wejima wamuBabiloniku. Ntwali kudi mwanta nawa nukumuleja munalumbulukili chilota chindi.”
25 Ariyoki wamutwalili swayi-swayi Danyeli kudi mwanta nawa wamulejeli nindi: “Nawani iyala hakachi kawankoli akuYuda+ wunateli kumulumbulwila mwanta chilota.”
26 Mwanta wamwihwili Danyeli, wejina daBeleteshaza nindi:+ “Mwamweni wunateli kunleja chilota chinamona nikuchilumbulula?”+
27 Danyeli wamwakwili mwanta nindi: “Kwosi akamaana, akakutaha, atutepa, hela akakuhoña natutumbwa anateli kumuleja mwanta kajindilu kanakukeña kwilukayiku.+
28 Ilaña kudi Nzambi wamumawulu Mukakusolola tujindilu,+ nawa namuleji Mwanta Nebukaneza yuma yakamwekana mumafuku akukuminina. Ichi dichilota chiwalota, nawa iyi diyi yimwenu yenza kumutu weyi hampinji yiwakaama hakadidi keyi:
29 “Hakwila eyi mwanta, hiwadiña hakadidi keyi yitoñojoka yeyi yabalumukila kuyuma yakamwekana kumbidi, nawa Mukakusolola tujindilu nakuleji yuma yakamwekana.
30 Ilaña ami, aka kajindilu akinsolwela bayi neyi muloña nikweti maana kubadika antu ejima amomiku; ilaña nawu nikulumbulwili eyi mwanta kulonda wiluki yitoñojoka yidi mumuchima weyi.+
31 “Eyi mwanta, chiwadiña nakutala, wamona nkishi* weneni. Owu nkishi, wadiña weneni nawa wakejima nankashi, wemana kumbidi yeyi, nawa mmwekenu yindi yatiyishileña woma.
32 Mutu wanowu nkishi wadiña wawuru yayiwahi,+ ntulu nimakasa indi adiña asiliva,+ ivumu nimakata indi adiña awuneñu,+
33 nyendu yindi yadiña yachikuñu+ nawa madatilu indi adiña aha chikuñu, aha ndambu.+
34 Watwalekahu kutala ninochu chiwamona ilola anadiketuli, bayi namakasaku, denza nakweta nkishi kumadatilu achikuñu nindambu nawa dayichika.+
35 Hayoyenoyu mpinji chikuñu, ndambu, wuneñu, siliva niwuru jachikikila hamu jejima nawa jashala neyi muzuñu waheluña dakuhulila mumpinji yanooña. Nawa mpepela yajilelula chakwila kwosi kantotu hela kamu kashalahuku. Ilaña ilola dachika nkishi dekala mpidi yeneni, nawa yawanina iseki dejima.
36 “Ichi dichadiña chilota, ichi dinu tukumuleja mwanta muchinalumbulukili.
37 Eyi mwanta, mwanta wawanyanta anenkiwu kudi Nzambi wamwiwulu wanta,+ wuswa, ñovu nikulema,
38 nawa anenkiwu antu kwejima kwashakamawu muchikasa chindi, kushilahu nianyama amwisaña niatuda amuluzwizu, nawa anatondiwu kwikala nyuuli wayuma yejimiyi,+ eyi aweni yeyi mutu wawuru.+
39 “Ilaña kufuma hadi eyi hakekala wanta wukwawu,+ wakehelamu hadi weyi; kuhiñahu hakekala wanta wukwawu, wamuchisatu, wawuneñu, wakayuula iseki dejima.+
40 “Hakwila wanta wamuchiwana, wakekala wakola neyi chikuñu.+ Muloña neyi chikuñu chichachikaña nikukisañana yuma yikwawu, mwamweni, neyi chikuñu chachikaña, wakajilumuna nikuchika awa mawanta ejima.+
41 “Nawa neyi chiwamona madatilu ninyinu yandambu yakañemi nachikuñu, wanta wakadaambula, ilaña kukola kwantesha kwachikuñu kwakekala mwomu, neyi chiwamona chikuñu chakubombashana nandambu.
42 Nawa neyi chadiña nyinu yachikuñu nindambu, wanta niwena dichiwakekala aha wakola aha nehi.
43 Neyi chiwamona chikuñu chakubombashana nandambu, niwena akadibomba nawantu;* ilaña hiyakadilamata wumu namukwawuku, neyi ndambu nachikuñu chijabulaña kudibomba.
44 “Mumafuku anowu anyanta, Nzambi wamwiwulu wakashaku wanta+ wakabula kujilumunawu.+ Nawa iwu wanta hiyakawuhana kudi antu acheñiku.+ Wakajilumuna nikujiyisha awa mawanta ejima,+ nawa wena nkawawu diwu wakatwalekahu haya nyaaka,+
45 neyi chiwamona ilola anadiketuli kumpidi, bayi namakasaku, nawa dachika chikuñu, wuneñu, ndambu, siliva niwuru.+ Nzambi Wabadika namuleji mwanta yuma yakamwekana kumbidi.+ Ichi chilota chalala, nawa muchinalumbulukili mwalala.”
46 Kufumahu, Mwanta Nebukaneza wadinatili chamesu heseki kumesu aDanyeli nawa wamulemesheli nankashi. Nawa wahanini lushimbi nawu amwinki chawaana niinsensi.
47 Mwanta wamulejeli Danyeli nindi: “Mwamweni Nzambi yeyi hiNzambi yawanzambi, Nkaaka yawanyanta nawa hiMukakusolola tujindilu, muloña wunatweshi kusolola aka kajindilu.”+
48 Dichi mwanta wamwinkeli Danyeli chifulu chahewulu nawa wamwinkeli yawaana yayivulu yayiwahi, wamutondeli kwikala nyuuli wakabeta kejima kaBabiloni+ nawa mukulumpi wawatupitawu hadi akamaana ejima amuBabiloni.
49 Nawa kwesekeja nakulomba kwaDanyeli, mwanta watondeli Shadiraki, Mishaki niAbedinego+ kwikala akulumpi akabeta kaBabiloni, ilaña Danyeli wakalakeleleña muchota chamwanta.
Tumazu twaheshina
^ Dikwila nawu, izanvu dawantu akuluka yitembi mukuhoña nimukuhoña natutumbwa.
^ Kufuma haDan 2:4b nakushika ha 7:28 ayisonekeli muchiAramayiki.
^ Hela hekwawu, “kwakunatila majilu; kwakulumbika tuji.”
^ Hela “iseki dooma.”
^ MuchiAramayiki, “nanyijimba.”
^ Hela “kufuma kunyaaka nakuya kunyaaka.”
^ Hela “chifwikija.”
^ Hela “anyana kawantu,” dikwila nawu, antu hohu.
