Ezekeli 27:1-36
-
Mukeña wakwimbila watu wakuTira wunakujiya (1-36)
27 Izu daYehova denjili cheñi kudi ami nawu:
2 “Hakwila eyi mwana kamuntu, mwimbili Tira+ mukeña,*
3 nawa wumuleji Tira neyi,‘Eyi washakamaña kuyiisu yakaluñalwiji,Mukakulanda nakulandulula wawantu amavulu ashakamaña hayituutu yayivulu,Yehova Mwanta Wabadika nahoshi nindi:
“Eyi Tira, wunahoshi eyi aweni neyi, ‘Nidi walubanji nankashi.’+
4 Maluña eyi adi hakachi kakaluñalwiji,Nawa akakukutuña diwu analeteshi wumwekani lubanji nankashi.
5 Akusoñeleli mapulanga ejima anyitondu yanyinjunga yakuSeniri,+Nawa asendeli mutondu wamusida kuLebanoni kulonda akusoñelimu mutondu wakwimika muwatu.
6 Akusoñeleli yilapu yanyikula yakuBashani,Nawa ntoñi yeyi yakumbidi yadiña yamutondu wasayipresi kwalamikiliwu mazewu anzovu afumini kuyituutu yaKitimi.+
7 Ihina deyi dawulombu washiyashana dafumini kuEjipitu didadiña dakwendesha watu weyi,Nawa mahina eyi akubuta hewulu dawatu adiña awanda wabulu niwawusombu, afumini kuyituutu yaElisha.+
8 Antu amuSidoni niamuArivadi+ diwu adiña akakuvuwa eyi.
Eyi Tira, antu elukisha kwendesha maatu diwu adiña akakwendesha watu.+
9 Amayala akulukila* niakuGebali+ elukisha kwendesha maatu diwu alamikileña munyaji yeyi.+
Mbopolu jejima jahakaluñalwiji niantu azatilileñamu enjileña kudi eyi nakuselujola.
10 Amayala akuPeresi, kuLudi nikuPati+ adiña hakachi kamashidika eyi, antu jeyi anjita.
Akudikili nkebu jawu nimatepa awu mudi eyi, nawa akukojejeli kwikala walubanji.
11 Amayala amuArivadi adiña hakachi kamashidika eyi ayimikili hampwembu jeyi kwi-i ndo-o,Nawa ayilobu ejima ahembeleña tuposhi tweyi.
Akudikili nkebu janjiñumuki kumpwembu jeyi kwi-i ndo-oNawa aletesheli wumwekaneña lubanji nankashi.
12 “‘“Tashishi+ waselujoleli naneyi muloña eyi wadiña namaheta amavulu.+ Aleteleña siliva, yikuñu, wufoyu ninsumbu kulonda ahimpi nayuma yeyi.+
13 Yavani, Tubali+ niMisheki+ aselujoleli naneyi, aleteleña anduñu+ niyuma yawuneñu kulonda ahimpi nayuma yeyi yakuselujola.
14 Amwitala daTogama+ aleteleña tuwalu, tuwalu twanjita niyingongavalu kulonda ahimpi nayuma yeyi.
15 Antu amuDedani+ aselujoleli naneyi; weñijili akakulanda nakulandulula hayituutu yayivulu. Akulambwileña mazewu anzovu+ ninyitondu yatupwipu.
16 Edomi waselujoleli naneyi muloña wayuma yayivulu yiwadiña nayu. Akwinkeleña malola atakwozi, wanda wawusombu, yakuvwala yakubaza chiwahi yawulombu washiyashana, mahina amawahi, malola akorali niarubi kulonda ahimpi nayuma yeyi.
17 “‘“Yuda niituña daIsarela aselujoleli naneyi, akwinkeleña tidiku yakuMiniti,+ yakuda yayiwahi, wuchi,+ manji nibalisamu+ kulonda ahimpi nayuma yeyi.+
18 “‘“Damakasa+ waselujoleli naneyi muloña wayuma yayivulu yiwadiña nayu nimaheta eyi ejima, waselujoleleña vinyu yakuHeliboni niwanda wakuZahari.*
19 Vedani naYavani akuUzali ahanini yikuñu yakuchila dehi, kasiya* nikalamasi* kulonda ahimpi nayuma yeyi.
20 Dedani+ waselujoleli naneyi mahina akushakamahu* akusha hanyima yatunyama.
21 Weñijili eni Arabi nianlomboli ejima amuKedari+ mudimu, adiña nakulanda nikulandisha anyana kanyikoku, anyikoku ayizamba niampembi.+
22 Akakulanda nakulandulula akuSheba nikuRama+ aselujoleli naneyi; akwinkeleña yuma yejima yashiyashana yamavumba amawahi nankashi, malola alema wuseya niwuru kulonda ahimpi nayuma yeyi.+
23 Harani,+ Kane, Edeni,+ akakulanda nakulandulula akuSheba,+ akuAshishuri+ nikuKilimadi aselujoleli naneyi.
24 Adiña nakuselujolela yuma yalubanji hayisankanu yeyi, tuhuma twakutuña nayuma yawulombu wabulu, yakuvwala yakubaza chiwahi yawulombu washiyashana nimahina akudatahu* awulombu washiyashana, jejima jakukasa nawa jakukolesha nanyonji.
25 Mbopolu jakuTashishi+ dijasendeleña yuma yeyi yakuselujola,Chakwila wenzeli nawa walemeni nankashi hakachi kakaluñalwiji.
26 Akakukuvuwa anakuleti hakaluñalwiji kamankanda añovu;Mpepela yakumusela yinakukisañeni hakachi kakaluñalwiji.
27 Maheta eyi, yuma yeyi, yuma yeyi yakuselujola, azatilaña mudi eyi niakakukwendesha,Owu anakulameka munyaji yeyi, anakuselujola yuma yeyi,+ kushilahu niamayala ejima anjita+Dikwila nawu izaza* dejima didi mudi eyi,Ejima wawu akajiyila hakachi kakaluñalwiji ifuku diwakakisika.+
28 Neyi akakukwendesha akaluka nyitetu, yikumu yakaluñalwiji yakakanka.
29 Akakuvuwa maatu ejima, akakuzatila mumaatu niamayala eluka chakwenda hakaluñalwijiAkafuma mumbopolu jawu nakwimana kumpata.
30 Akakudila chikupu namazu ahewulu+Iku anakudifukwila lunkuñu hanyitu yawu nikwalañana mumawuti.
31 Akaditewula tuwewula* nikuvwala yisasa;Akakudila nankashi namakumbu aweni.
32 Chakadilañawu akemba mukeña nawa akakwimbila nawu:
‘Hinyi wudi neyi Tira, wunamweneni hakachi kakaluñalwiji?+
33 Yuma yeyi chiyenjili kufuma hakaluñalwiji, wekutishili antu amavulu ashiyashana.+
Maheta eyi amavulu niyuma yeyi yakuselujola yahetesheli anyanta ahamaseki.+
34 Dichi anakukisañeni mukaluñalwiji, mumanyiñi,+Nawa yuma yeyi yakuselujola niantu jeyi anajiyili hamu naneyi.+
35 Antu ejima ashakamaña muyituutu akakuhayama,+Nawa anyanta jawu akazaala nakuhayama chikupu,+ akadihomba kumesu awu.
36 Akakulanda nakulandulula adi mukachi kanyuza akahayama nakwimba muloji muloña wachuma chikakumwekena.
Kukuma kweyi kwakekala kwakukasumwisha nawa kwatama,Nawa wakaleka kwikalaku haya nyaaka.’”’”+
Tumazu twaheshina
^ Hela “kamina kakudila nachu.”
^ MuchiHeberu, “akulumpi.”
^ Hela “niwanda wukweti wulombu wachiluluka niwutookoloka.”
^ Himutondu wadifwana namutondu wasinamoni.
^ Iteti devumba dadiwahi.
^ Hela “yakuvwala yakupikula.”
^ Hela “makapeti.”
^ MuchiHeberu, “chipompelu.”
^ Hela “nkuubu.”
