Ezekeli 29:1-21
29 Muchaaka chamu 10, mukakweji kamu 10, hefuku damu 12 dakakweji, izu daYehova denjili kudi ami nawu:
2 “Eyi mwana kamuntu, talishaku chamesu eyi kudi Fwaru mwanta wakuEjipitu, nawa wuprofweti yuma yikamumwekena niyikamwekena Ejipitu yejima.+
3 Awa diwu mazu iwukuhosha neyi: ‘Yehova Mwanta Wabadika nahoshi nindi:
“Ichi inakumwimakena Fwaru mwanta wakuEjipitu,+Luchuma lwamukaluñalwiji lwakaamaña mutuloña twanyanya twaNile weyi,*+Owu wunahoshi nindi, ‘Kaloña Nile wami.
Namuleñeli nami wami ami aweni.’+
4 Ilaña nakasha mayumba munyibaña yeyi nawa nakalamatisha inshi jaNile weyi kumakalu eyi.
Nakakufumisha muNile weyi hamu nanshi jamuNile yakalamata kumakalu eyi.
5 Nakakunatila muchinkalampata hamu nanshi jamuNile weyi.
Wakaholokela hampata, nawa hiyakakupompesha hela kukukuñwijaku.+
Nakakuhana kudi anyama azuwa amwisaña ahamaseki nikudi atuda amuluzwizu+ kulonda akakudii.
6 Dichi antu amuEjipitu ejima akeluka nawu yami Yehova,Muloña wukwashu wakwashileñawu amwitala daIsarela wadiña neyi itahu dooma.*+
7 Chakwatiliwu kuchikasa cheyi, eyi wachikekeli,Nawa wachiñumwini mafwiji awu.
Chakundameneniwu hadi eyi, eyi wakotokeli,Nawa waletesheli nyendu* yawu kuzaala hakwenda.”+
8 “‘Dichi, Yehova Mwanta Wabadika nahoshi nindi: “Ichi inakukuletela mpoku yakabali,+ nawa mudi eyi nukujahamu antu nianyama.
9 Ituña daEjipitu dakashala kwamahembi nawa dakakisika.+ Dihu hakelukawu nawu yami Yehova, muloña eyi wunahoshi neyi,* ‘Kaloña Nile wami; ami aweni yami namuleñeli.’+
10 Dichi nakwimakeni eyi niNile weyi, nakakisañana nikuumisha ituña daEjipitu, dakashala kwamahembi,+ kutachikila kuMigidoli+ kushika nikuSiyene+ ndo-o nikuñinza yaEtiyopiya.
11 Kwosi muntu hela chimuna wakadatamu mwenduku,+ nawa hadi yaaka 40 kwosi wakashakamamuku.
12 Ituña daEjipitu nakadibalumuna mahembi chikupu kubadika matuña amakwawu, nawa nyisumba yadu nakayibalumuna mahembi kubadika nyisumba yikwawu hadi yaaka 40;+ nawa nakapalañeshela aEjipitu munyuza nikuyimwañila mumatuña.”+
13 “‘Muloña Yehova Mwanta Wabadika nahoshi nindi: “Neyi yaaka 40 yinahiti dehi, nakapompesha aEjipitu kufuma mudi antu ashiyashana mwapalañeneniwu.+
14 Nakafumisha aEjipitu muwunkoli nakuyifuntisha kwituña daPatirosi,+ kwituña kwafuminiwu, nawa kweniku akekala wanta wabula kulema.
15 Wanta wakuEjipitu wakekala wakehelamu chikupu kubadika mawanta amakwawu nawa hiwakekala nawuswa cheñi hadi nyuza yikwawuku,+ nakayikehesha nankashi chakwila hiyakatwesha kwimika mushindu nyuza yikwawuku.+
16 Hakekalahu cheñi mwakukinka manuñu amwitala daIsarelaku,+ ilaña wakayanukishaña hohu chiluwa chawu cheliliwu chakulomba wukwashu kudi aEjipitu. Nawa dihu hakelukawu nawu yami Yehova Mwanta Wabadika.”’”
17 Dichi muchaaka chamu 27, mukakweji katachi, hefuku datachi dakakweji, izu daYehova denjili kudi ami nawu:
18 “Eyi mwana kamuntu, Mwanta Nebukaneza*+ wakuBabiloni wayinkeli amashidika indi mudimu wakola wakulukuka Tira.+ Nyitu yejima yaseyekeli mabala, nawa mafwiji ejima ayokokeli. Ilaña yena niamashidika indi hiyatambwilihu wufwetu wudi wejima hamudimu wazatiliyi wakulukuka Tiraku.
19 “Dichi, Yehova Mwanta Wabadika nahoshi nindi, ‘Inakuhana ituña daEjipitu kudi Mwanta Nebukaneza* wakuBabiloni,+ nawa yena wukusenda maheta adimu nikupuupa yuma yidimu. Nawa yumiyi diyikwikala wufwetu wamashidika indi.’
20 “Yehova Mwanta Wabadika nahoshi nindi, ‘Chineli nazati mudimu wakumulukuka,* nukumufweta ituña daEjipitu nanochu chinankalakeliwu.’+
21 “Hanodu ifuku nakamenesha luseñu kudi amwitala daIsarela,*+ nawa nakakwinka wuswa wakuhosha hakachi kawu. Dihu hakelukawu nawu yami Yehova.”
Tumazu twaheshina
^ Kufuma haniyi vasi nakuya kwishina, “Nile” nakwimenaku kaloña ninyifwolu yindi yamenji yakutukumwina nachu.
^ MuchiHeberu, “iteti.”
^ MuchiHeberu, “nkuma.”
^ MuchiHeberu, “nahoshi nindi.”
^ MuchiHeberu, “Nebukareza,” hinsonekelu yaambukaku.
^ MuchiHeberu, “Nebukareza,” hinsonekelu yaambukaku.
^ Dikwila nawu, kumulukuka Tira.
^ Hela “nakayinka amwitala daIsarela ñovu.”
