Ezekeli 31:1-18
-
Kudimbuka kwaEjipitu, mutondu wamusida wawulehi (1-18)
31 Muchaaka chamu 11, mukakweji kamuchisatu, hefuku datachi dakakweji, izu daYehova denjili cheñi kudi ami nawu:
2 “Eyi mwana kamuntu, wumuleji Fwaru mwanta wakuEjipitu nimazaza indi neyi,+‘Hinyi wabadika neyi eyi?
3 Kwadiña mwini Asiriya, mutondu wamusida muLebanoni,Wadiña nanyitayi yalubanji neyi ivunda dadijika nawa wadiña wawulehi;Insa yindi yashikili mumavu.
4 Menji amavulu amutohesheli, tuseloki tunakusefuka menji kwishina twamukojejeli kuleha nankashi.
Kwamutumbiliwu kwanyeñumukili tuloña twanyanya;Menji atu atukumwinineña nyitondu yejima yamwisaña.
5 Dichaletesheli wulehi kubadika nyitondu yikwawu yejima yamwisaña.
Nyitayi yindi yavulili nawa yaleheliMuloña wamenji amavulu adiña mutuloña twindi twanyanya.
6 Tuda twejima twamuluzwizu twatuñilili yisakala kunyitayi yindi,Anyama ejima amwisaña asemeneneña mwishina danyitayi yindi,Nawa nyuza yamaneni yejima yashakamineña muwulelu windi.
7 Wekalili walubanji chikupu nawa nyitayi yindi yaleheli nankashi,Muloña nyiji yindi yeñilili mumenji amavulu.
8 Kwosi mutondu wukwawu wamusida mwitempa daNzambi+ wesekeni nindiku.
Kwosi mutondu wamunjunga wadiña nanyitayi neyi yindiku,Nawa kwosi nyilendi yesekeni nanyitayi yindiku.
Kwosi mutondu wukwawu mwitempa daNzambi wamubadikili lubanjiku.
9 Namubalumwini ekali walubanji, namafu amavulu,Nawa nyitondu yejima yamuEdeni, itempa daNzambi walala, yamutiyilileña ichima.’
10 “Dichi, Yehova Mwanta Wabadika nahoshi nindi: ‘Chineli waleheli nankashi, washikijili insa yindi mumavu, nawa muchima windi wadivwimbili muloña wakuleha kwindi,
11 nakamuhana kudi nyuuli wañovu wayuulaña nyuza.+ Chakadi nikujina, yena wakamubabesha, nawa ami nakamukaana muloña wakutama kwindi.
12 Nawa añiinza, antu asweja kuzuwa chikupu munyuza, akamutema nawa akamushiya hamapidi, mafu indi akaholokela muyinekineki yejima, nawa nyitayi yindi yakakotokela mutuloña twanyanya twejima twamwituña.+ Antu ejima ahamaseki akafuma muwulelu windi nawa akamushiya.
13 Tuda twejima twamuluzwizu twakashakama hañowa yindi, nawa anyama ejima amwisaña akashakama hanyitayi yindi.+
14 Chakekala mwenimu kulonda kwakabuli kwikala mutondu hela wumu wudi kumenji wakakula nankashi hela wakashikija insa yindi mumavu, nawa kulonda kwakabuli kwikala mutondu atukumwinañawu chiwahi wakaleha nakushika kudi wena. Muloña awa ejima akayihana kudi kufwa, kwituña dakwishina deseki hamu nanowu anakuya mwibuku.’*
15 “Yehova Mwanta Wabadika nahoshi nindi: ‘Hefuku dakayayi Mwijamu,* nakadilisha antu. Dichi, nakajika menji amavulu asefukaña kwishina nawa nakashinka tuloña twanyanya twaletaña menji kulonda menji amavulu akaleki kuhita. Nakeyilisha Lebanoni muloña wamutondu wamusida, nawa nyitondu yejima yamwisaña yakooma.
16 Chikatiyakana lushindu lwakuchañuka kwindi, nakazaalisha nyuza hampinji yinakamukunkumwina Mwijamu* hamu nanowu ejima anakuya mwibuku,* nawa nyitondu yejima yamuEdeni,+ yasweja lubanji nikuwaha muLebanoni, yejima yatukumwinañawu chiwahi, yakakundejewa kwituña dakwishina deseki.
17 Anakunkumuki nindi Mwijamu,* kudi owu ajahawu nampoku yakabali,+ hamu nanowu amukwashileñaku* ashakamineña muwulelu windi mukachi kanyuza.’+
18 “‘Nyitondwinyi yamuEdeni yadiña yalema nawa yatoha neyi eyi?+ Ilaña chakadi nikujina, akakutwala hamu nanyitondu yamuEdeni kwituña dakwishina deseki. Wakakaama hamu nanowu abula kwalama, hamu nanowu ajahawu nampoku yakabali. Ichi dichakamumwekena Fwaru nimazaza indi ejima,’ dichinahoshiyi Yehova Mwanta Wabadika.”
Tumazu twaheshina
^ Hela “mwijamu.”
^ Hela “Shelu,” dikwila nawu, ijamu dawantu ejima. Talenu Kulumbulula.
^ Hela “Shelu,” dikwila nawu, ijamu dawantu ejima. Talenu Kulumbulula.
^ Hela “mwijamu.”
^ Hela “Shelu,” dikwila nawu, ijamu dawantu ejima. Talenu Kulumbulula.
^ MuchiHeberu, “chikasa.”
