Ezera 7:1-28
7 Hanyima yayumiyi, mumpinji yachiyuulu chaMwanta Atazakisheshi+ wakuPeresi, Ezera*+ wafuntili. Wadiña mwana kaSeraya,+ Seraya mwana kaAzariya, Azariya mwana kaHilikiya,+
2 Hilikiya mwana kaShalumi, Shalumi mwana kaZadoki, Zadoki mwana kaAhitubi,
3 Ahitubi mwana kaAmariya, Amariya mwana kaAzariya,+ Azariya mwana kaMerayoti,
4 Merayoti mwana kaZerahiya, Zerahiya mwana kaUzi, Uzi mwana kaBuki,
5 Buki mwana kaAbishuwa, Abishuwa mwana kaFinihasi,+ Finihasi mwana kaEleyazari,+ Eleyazari mwana kaAroni+ kapristu muneni.
6 Yeniwu Ezera wafumini kuBabiloni. Wadiña mukakukopolola* welukili chikupu* Nshimbi jaMosi,+ jahaniniyi Yehova Nzambi yaIsarela. Mwanta wamwinkeli yuma yejima yalombeliyi, muloña chikasa chaYehova Nzambi yindi chadiña hadi yena.
7 AIsarela amakwawu, atupristu, aLevi,+ añimbi,+ akakuhemba kuchiisu+ niambuña ahatembeli,*+ akandukili nakuya kuYerusalema muchaaka chamu 7 chachiyuulu chaMwanta Atazakisheshi.
8 Nawa Ezera wenjili kuYerusalema mukakweji kamuchitanu, muchaaka chamu 7 chachiyuulu chamwanta.
9 Wanyamukili kuBabiloni hefuku datachi dakakweji katachi nawa washikili muYerusalema hefuku datachi dakakweji kamuchitanu, muloña chikasa chachiwahi chaNzambi yindi chadiña hadi yena.+
10 Ezera waloñesheli muchima windi* kulonda akeñakeñi Nshimbi jaYehova nikujizatisha+ nikudizisha kuleja kwayu niwunsompeshi muIsarela.+
11 Iyi diyi nsañu yadiña mumukanda wahaniniyi Mwanta Atazakisheshi kudi kapristu Ezera nawa mukakukopolola,* wadiza* chikupu kuleja kwaYehova ninshimbi jindi jayinkeliyi aIsarela:
12 * “Ami Atazakisheshi+ mwanta wawanyanta, kudi eyi kapristu Ezera, mukakukopolola* Nshimbi jaNzambi yamawulu: Kuwunda kwakweni kwiikali naneyi. Nawa ichi
13 nahani lushimbi nami muntu wejima hadi antu jaIsarela niatupristu awu niaLevi mwahita wanta wami wunakukeña kuya hamu naneyi kuYerusalema, watela kuya.+
14 Muloña ami mwanta hamu niantu jami 7 akakunleja maana tunakutumi kulonda wuyi nakutala neyi Nshimbi jaNzambi yeyi jiwukweti,* anakujilondela muYuda nimuYerusalema,
15 nikutwala siliva niwuru yinnahani ami mwanta mukudikeñela hamu nawantu jami akakunleja maana kudi Nzambi yaIsarela, washakamaña muYerusalema.
16 Wusendi nisiliva niwuru yejima yiwunakutambula* mwahita kabeta kejima kaBabiloni, hamu nichawaana chahanañawu antu niatupristu mukudikeñela kwitala daNzambi yawu didi muYerusalema.+
17 Nawa munawa mali wakanyakali kulandamu ayizamba awañombi,+ ayizamba anyikoku,+ anyana kanyikoku,+ hamu ninyilambu yawu yambutu+ ninyilambu yawu yavinyu,+ nawa wakalambuli yumiyi hakameña kakwitala daNzambi yeyi muYerusalema.
18 “Nawa yuma yejima yiwakamona neyi yidi chiwahi kuyila kudi eyi niamanakweyi, mwatela kuyila kuzatisha siliva niwuru yakashalahu, kwesekeja nankeñelu yaNzambi yenu.
19 Nawa yuma yejima yakakwinkawu yakuzata nachu mudimu wakwitala daNzambi yeyi, wakayitwali kumesu aNzambi kuYerusalema.+
20 Nawa yuma yikwawu yejima yiwatela kuhana yakakeñekaña kwitala daNzambi yeyi, wakahani yumoyu kufuma muchisweku chawanta chayuma yalema.+
21 “Ami Mwanta Atazakisheshi, nahani lushimbi kudi ejima akakuhemba yuma yalema mwiluña daMwishinadi daKaloña* nami, yuma yejima yikuyilombayi kapristu Ezera,+ mukakukopolola* Nshimbi jaNzambi yamawulu, mwatela kwila mwenomu swayi-swayi,
22 kushika kuntalenta* jasiliva 100, yipimu yansaba* 100 yatidiku, nyilondu* yavinyu 100,+ nyilondu yamanji 100+ nimuñwa+ wakukañanya kupima.
23 Dichi yuma yejima yinashimuniyi Nzambi yamawulu yinakundami kwitala daNzambi yamawulu,+ ayizati neyena kulonda kuzuwa kubuli kwinza mwahita wanta wamwanta nihadi anyanindi.+
24 Nawa nayileji cheñi nami, atupristu niaLevi, akakwimba yisanji,+ akakuhemba kuchiisu, ambuña ahatembeli*+ niakakukalakela hanidi itala daNzambi, bayi muyifwetesha musonku wudi wejima hela mulambu+ hela musonku wahamukwakwaku.
25 “Nawa eyi Ezera, kwesekeja namaana iwukweti afuma kudi Nzambi,* tondaku ayilolu amuchota niansompeshi akusompesha antu ejima adi mwiluña daMwishinadi daKaloña, ejima eluka nshimbi jaNzambi yeyi. Nawa muntu wejima wabula kwiluka iji nshimbi, watela kumudizishaju.+
26 Muntu wejima wabulaña kulondela Nshimbi jaNzambi yeyi nilushimbi lwamwanta atela kumusompesha chakadi kulaba, kulonda eluki neyi chakwila watelela kufwa, kumuhaña, kumufwetesha hela kumukasa.”
27 Yehova Nzambi yawankakulula jetu ashimekewi, wunashi mumuchima wamwanta chuma chakuwahisha itala daYehova muYerusalema!+
28 Nawa yena nammwekesheli kukeña kwakashinshi kumesu amwanta+ nikumesu awakakumuleja maana+ nikumesu awayilolu ejima amwanta añovu. Dichi nahamukili* muloña chikasa chaYehova Nzambi yami chadiña hadi ami, nawa mukachi kawaIsarela natondelimu amayala akulombola* akukanduka hamu nanami kuYerusalema.
Tumazu twaheshina
^ Daya mukwila nawu, “Nkwashi.”
^ Hela “nsoneki.”
^ Hela “wadiña mukakukopolola welukisha chikupu.”
^ Hela “aNetini.” MuchiHeberu, “ahanawu.”
^ Hela “wafuukwilihu mumuchima windi.”
^ Hela “nsoneki.”
^ Hela “mukakukopolola mazu.”
^ Mazu adi haEzr 7:12 nakushika ku 7:26 asambilili kuyisoneka mwidimi dachiAramayiki.
^ Hela “nsoneki.”
^ MuchiAramayiki, “muchikasa cheyi.”
^ MuchiAramayiki, “kuwana.”
^ Hela “daMwishinadi daYufurati.”
^ Hela “nsoneki.”
^ Chipimu chimu chansaba chesekeni namalita 220 (makwati 200 oma). Talenu Nsañu Jikwawu B14.
^ Mulondu wumu wesekeni namalita 22 (magaloni 5.81). Talenu Nsañu Jikwawu B14.
^ Ntalenta yimu yesekeni na 34.2 kg. Talenu Nsañu Jikwawu B14.
^ Hela “aNetini.” MuchiHeberu, “ahanawu.”
^ MuchiAramayiki, “kwesekeja namaana aNzambi yeyi adi muchikasa cheyi.”
^ Hela “nadikolesheli ami aweni.”
^ MuchiHeberu, “nyitu.”
