Kudi Fwilemoni 1:1-25
1 Ami Pawulu, kayili*+ kukoola Kristu Yesu, nidi hamu namanakwetu Timotewu,+ kudi eyi Fwilemoni mukwetu itwakeña mukakukalakala hamu nanetu,
2 nikudi muheletu Afwiya, nikudi mukwetu ishidika Akipusa,+ nikuchipompelu chidi mwitala deyi:+
3 Luwi lwasweja nikuwunda kwafumaña kudi Nzambi Tata yetu nikudi Mwanta Yesu Kristu kwiikali nanenu.
4 Namusakililaña Nzambi yami mpinji yejima chinakutenaña mukulomba kwami,+
5 nanochu chinatiyaña chikuhwelelu cheyi nikukeña kuwamukeña Mwanta Yesu niakakujila ejima.
6 Inakulomba nami chikuhwelelu chiwukweti chitwekala nachu ninetu nawa chikuleteshi wiluki yuma yejima yayiwahi yitukweti mudi Kristu.
7 Muloña nazañaleli chikupu nikukundejewa nankashi chinatiyili kukeña kuwukweti, muloña eyi manakwami wunakoleshi nyichima yawakakujila.
8 Muloña wachumichi, hela chakwila ami nidi nawuswa chikupu mudi Kristu wakukuleja eyi kulonda wukoñeña yuma yayiwahi,
9 chikuwaha ami kukulembelela muloña wakukeña kuwamwekeshaña, chineli ami Pawulu nashinakaji dehi nawa chayinu mpinji nidi kayili* kukoola Kristu Yesu.
10 Inakukulembelela hansañu yamwanami Onesimusa+ inekalili tata yindi+ kuspiritu hinadiña mukaleya.*
11 Hakusambila wadiña wamukunkulwayi kudi eyi, ilaña ichi nekali walema chikupu kudi eyi nikudi ami nawa.
12 Inakumufuntisha cheñi kudi eyi, yena diyi muchima wamami aweni.*
13 Nakeñi nami nishakami nindi kunu kulonda ahiñi hadi eyi, ankalakeleña hampinji yinankasiwu mukaleya kukoola nsañu yayiwahi.+
14 Ilaña ami hinnakukeña kwila chuma hela chimu chakadi eyi kwitejaku, kulonda mudimu wejima wawuwahi wuwukunzatila wubuli kwikala wakukukanjikija, ilaña wakufuma hamuchima weyi.+
15 Hekwawu ichi dichuma chaletesheli afumi kudi eyi hakapinji kantesha* kulonda wakamwiteji cheñi kushakama nindi haya nyaaka,
16 hakekala cheñi nduñuku,+ ilaña wakabadika hadi nduñu, himanakwetu wakeñewa,+ inakeña nankashi, sweje-e dinu eyi wamukeña chikupu muloña mwadikunda kumujimba nimudi Mwanta.
17 Dichi neyi wammonaña neyi nidi ibwambu deyi,* wakamutambwili chachiwahi neyi chiwunateli kuntambwila ninami.
18 Kubombelahu, neyi wakukoñelihu chuma chatama hela neyi wudi namukudi weyi, wakankalilimu ami.
19 Ami Pawulu, nasoneki iwu mukanda nachikasa chami nawa nakukani nami nakakufweta yuma yejima yakongweliyi Onesimusa kudi eyi. Kafwampi, nineyi wukweti mukudi kudi ami, mukudi weniwu wunabombelimu wumi weyi.
20 Chalala, manakwami, nkwashiku mudi Mwanta; koleshaku muchima wami mudi Kristu.
21 Nakuhweleli nami wakela mwejima mwinnakuleji, dichi nakusonekeli nanochu chinneluki nami wakela niyuma yinnabuli kushimuna.
22 Kubombela hayumiyi, nloñeshelenu nikapeka mwakushikena, muloña nakuhweleli nami nakulomba kwenu, akanfuntisha* cheñi kudi enu.+
23 Epafwarasa+ mukwetu mwatukasilawu mukaleya muloña wakudikunda naKristu Yesu, nakwimushi,
24 Maku, Arisitaka,+ Demasi+ niLuka,+ akwetu mutwakalakelaña niwena anakwimushi.
25 Luwi lwasweja lwaMwanta Yesu Kristu lwiikali nanenu muloña waspiritu yimwamwekeshaña.
Tumazu twaheshina
^ Muntu akasawu mukaleya.
^ Muntu akasawu mukaleya.
^ MuchiGiriki, “mumpompa.”
^ Hela “kukeña kwami.”
^ MuchiGiriki, “ora yimu.”
^ MuchiGiriki, “mutwanzañenaña.”
^ Hela “akañuumbaku.”
