Hagayi 2:1-23
2 Mukakweji kamu 7, hefuku damu 21 dakakweji, izu daYehova denjili kuhitila mudi kaprofwetu Hagayi,+ nawu,
2 “Mwani ihulaku Zerubabeli+ mwana kaSheyalitiyeli, nguvulu wamuYuda,+ niYoshuwa+ mwana kaYehozadaki,+ kapristu muneni, niantu anashali, neyi:
3 ‘Hinyi washalahu hakachi kenu wamweni idi itala* chidamwekeneña kulema hakusambila?+ Ichi munakudimona ñahi? Neyi mudesekeja, hidinakumwekana neyi damukunkulwayiku?’+
4 “Yehova nahoshi nindi, ‘Ichi dinu kolaku, eyi Zerubabeli, nineyi Yoshuwa mwana kaYehozadaki, kapristu muneni, kolaku.’
“Yehova nahoshi nindi, ‘Nawa ninenu antu ejima amwituña,+ kolenu nawa zatenu.’
“‘Muloña ami nidi nanenu,’+ dichinahoshiyi Yehova wamazaza.
5 ‘Anukenu chinayikanini hampinji yimwafumini muEjipitu,+ nawa spiritu yami yinatwalekihu kwikala hakachi kenu.*+ Bayi mutiya womaku.’”+
6 “Muloña Yehova wamazaza nahoshi nindi, ‘Cheñi, mukapinji kantesha hohu, nukukankisha mawulu, iseki, kaluñalwiji niiseki dooma.’+
7 “Yehova wamazaza nahoshi nindi, ‘Nawa nukukankisha nyuza yejima,+ niyuma yalema wuseya*+ yamunyuza yejima yikwinza. Dichi nukwinzesha idi itala nakulema.’
8 “Yehova wamazaza nahoshi nindi, ‘Siliva yami, niwuru yami.’
9 “Yehova wamazaza nahoshi nindi, ‘Kulema kwanidi itala kwakumbidi kwakabadika kwakusambila.’+
“Yehova wamazaza nahoshi nindi, ‘Nawa munidi iluña nakashamu kuwunda.’”+
10 Hefuku damu 24 dakakweji kamu 9, muchaaka chamuchiyedi chaDariyusi, izu daYehova denjili kudi kaprofwetu Hagayi,+ nawu:
11 “Yehova wamazaza nahoshi nindi, ‘Mwani, ihulaku atupristu hanshimbi neyi:+
12 “Neyi muntu wukusenda mbiji yajila muchakuvwala chindi, nawa chakuvwala chindi chikunka kumankendi hela kumusoji* hela kuvinyu hela kumanji hela kuyakuda yidi yejima, komana yikwikala yajila?”’”
Atupristu aakwili nawu: “Inehi!”
13 Kuhiñahu Hagayi wehwili nindi: “Neyi muntu wudi namajilu muloña wakukwata chibimbi akwata chuma chidi chejima haniyi yuma, komana chikwikala chamajilu?”+
Atupristu aakwili nawu: “Chikwikala chamajilu.”
14 Dichi Hagayi wahosheli nindi: “‘Dichidiwu awa antu, nawa dichidiyi iwu muza kumesu ami,’ dichinahoshiyi Yehova, ‘nawa dichidi nyidimu yejima yakumakasa awu; chuma chejima chahanañawu kwenoku chamajilu.’
15 “‘Ilaña ichi, mwani, shenu muchima* hachumichi kufuma dalelu kuya nikumbidi: Henohu ilola kanda adilunjiki helola dikwawu mutembeli yaYehova,+
16 chadiña ñahi hayina mpinji? Henjiliyi muntu kumulumba wambutu wakuhweleleña yipimu 20, ilaña wawanini 10 hohu; nihampinji yenjili muntu kwibuku nakutehuna yipimu 50 muwukamwinu wavinyu, ilaña wawanini 20 hohu;+
17 nayibabesheli enu, nyidimu yejima yakumakasa enu, nankanza yasweja, nakabuwa+ ninanvula yamalola, ilaña kwosi niwumu hakachi kenu wabalumukilili kudi amiku,’ dichinahoshiyi Yehova.
18 “‘Mwani, shenu muchima* hachumichi kufuma dalelu kuya nikumbidi, kufuma hefuku damu 24 dakakweji kamu 9, kufuma hefuku daaliliwu chikuku chatembeli yaYehova;+ shenu muchima hachumichi:
19 Komana munkalaña* muchidi mbutu?+ Mutondu wamuvinyu, wamukuyu, wamapomegiranati niwamuolivi, kanda yisoñi nyikaabu, tahindi yinasoñi dehi? Kufuma dalelu nukutemesha nkisu.’”+
20 Izu daYehova denjili kamuchiyedi kudi Hagayi hefuku damu 24 dakakweji,+ nawu:
21 “Muleji Zerubabeli, nguvulu wamuYuda neyi, ‘Inakukankisha mawulu niiseki.+
22 Nukuhinuna itanda damawanta nikukisañana ñovu yamawanta anyuza;+ nawa nukuhinuna ikalu danjita niakakwendelamu, nawa tuwalu niakakwendelahu akadimbuka, muntu-himuntu nampoku yakabali yamanakwindi.’”+
23 “‘Hanodu ifuku,’ dichinahoshiyi Yehova wamazaza, ‘nakakusenda eyi kambuñami Zerubabeli+ mwana kaSheyalitiyeli,’+ dichinahoshiyi Yehova, ‘nawa nakakubalumuna wakekali neyi kazeya kachilamiku, muloña yeyi innatondi,’ dichinahoshiyi Yehova wamazaza.”
Tumazu twaheshina
^ Hela “tembeli.”
^ Hela hekwawu, “nawa hampinji spiritu yami hiyemeni mukachi kenu.”
^ Hela “yayiwahi.”
^ Hela “muzoñu.”
^ Hela “toñojokenu chikupu.”
^ Hela “toñojokenu chikupu.”
^ Hela “mwibuku dambutu.”
