Hoseya 1:1-11
1 Izu daYehova denjili kudi Hoseya* mwana kaBeyeri mumafuku aUziya,+ Yotamu,+ Ahazi+ niHezekiya,+ anyanta amuYuda+ nimumafuku aYerebowami+ mwana kaYowashi,+ mwanta waIsarela.
2 Hampinji yatachikili Yehova kuhosha izu dindi kuhitila mudi Hoseya, Yehova wamulejeli Hoseya nindi: “Yaku, kasumbuli mumbanda chivumbi* nawa wuvwali anyana awuvumbi,* muloña wawuvumbi* ituña dinaleki chikupu kumulondela Yehova.”+
3 Dichi wayili nakusumbula Goma mwana kaDibilayimi, wemitili nawa wamuvweleleli mwana weyala.
4 Kuhiñahu, Yehova wamulejeli nindi: “Mutuumbi neyi Yezireyeli,* muloña katataka nibabeshi amwitala daYehu+ muloña wakupwekesha mashi aYezireyeli, nawa nakajiyisha wanta waamwitala daIsarela.+
5 Hanodu ifuku nakakotola wuta wamukunji waIsarela muChinekineki chaYezireyeli.”
6 Wemitili cheñi nawa wavweli mwana wamumbanda. Dichi Nzambi wamulejeli nindi: “Mutuumbi neyi Lo-ruhama,* muloña hinakayitiyilahu cheñi amwitala daIsarela luwiku,+ muloña chakadi nikujina, nakayitemuna.+
7 Ilaña amwitala daYuda+ nakayitiyila luwi, nawa nakayamwina nañovu yaYehova Nzambi yawu;+ hinakayamwina nawuta wamukunji hela nampoku yakabali hela nanjita hela natuwalu hela nawakakwendela hatuwaluku.”+
8 Hanyima yakumusumuna Lo-ruhama, wemitili cheñi nawa wavweli mwana weyala.
9 Kufumahu, Nzambi wamulejeli nindi: “Mutuumbi neyi Lo-amimi,* muloña mudi antu jami wanyi nawa ami hinakekala wenuku.
10 “Nawa kuvula kwawantu* jaIsarela kwakekala neyi wusekulula wakukaluñalwiji, wakukañanya nikupima hela kuchinda.+ Nawa kwiluña kwayilejeleliwu nawu, ‘Enu mudi antu jami wanyi,’+ dikwakayilejelawu nawu, ‘Anyana kaNzambi wamumi.’+
11 Nawa antu amuYuda niamuIsarela akapompa hamu mukunuñañana,+ akatonda nlomboli yawu wumu nawa akafuma mwituña, muloña ifuku daYezireyeli dakekala dabadika.+
Tumazu twaheshina
^ Hinsonekelu yejina daHoshayiya muwihi, daya mukwila nawu, “Kwamwinewa naYa; Ya Naamwini.”
^ Hela “nyakalwalu.”
^ Hela “awunyakalwalu.”
^ Hela “wunyakalwalu.”
^ Daya mukwila nawu, “Nzambi Wukukuwa Mbutu.”
^ Daya mukwila nawu, “Hiyanamutiyili Luwiku.”
^ Daya mukwila nawu, “Hiyantu Jamiku.”
^ MuchiHeberu, “anyana.”
