Isaya 19:1-25
19 Mazu akumusompesha Ejipitu:+
Tiyenu! Yehova nakwendela hamavu atemuka nawa nakwinza muEjipitu.
Anzambi amukunkulwayi amuEjipitu akamuzaala,+Nawa muchima waEjipitu wakasuñunuka.
2 “Nakasañumuna aEjipitu kulonda akemakeni akwawu aEjipitu,Nawa akazuña mulwawu,Muntu-himuntu wakazuña namanakwindi ninantuñi nindi,Musumba namusumba, wanta nawanta.
3 Nawa nyichima yawaEjipitu yakaluwankana chikupu,Nawa nakaluwañesha mukafuukulawu.+
Akabalumukila kudi anzambi amukunkulwayi,Kudi akakufwomona, akakuhoña nawandemoni nikudi akakushimuna yuma yakamwekana kumbidi.+
4 Nakamuhana Ejipitu kudi nkaaka yindi wakala,Nawa akamuyuulaña kudi mwanta watama,”+ dimunahoshiyi Mwanta walala, Yehova wamazaza.
5 Menji akaluñalwiji akooma,Nawa kaloña kakooma, kakooma chawu.+
6 Nawa tuloña twakanunka;Nyifwolu yaNile wamuEjipitu yikakeha menji nawa yakooma.
Mateti nimatahu amalehi akatoka.+
7 Nyitondu yakuKaloña Nile, kunsañilu yaNile,Nimpata yejima mwatumbawu mbutu kumukulishu waNile,+ yakooma.+
Akayilelula, nawa hiyakekalaku cheñiku.
8 Nawa ayibinda anshi akadishona,Niantu alowaña inshi muNile akadila makumbu,Nawa antu alalumwinaña tuleñi twawu hamenji akakeha.
9 Antu atuñaña mahina afalakisi*+Niakakutuña mahina atooka nachakusowashana nachu, akayitiyisha nsonyi.
10 Akakusowashana indi akayichika;Antu ejima eñijawu mudimu akadishona.*
11 Ayilolu amuZowani+ asupa.
Akakumuleja Fwaru maana asweja maana alejanaña maana atama.+
Hanu dinu mukumulejeladi Fwaru nenu:
“Ami nafuma muchisaka chawakamaana,Nidi wamuchisaka chawanyanta akushankulu”?
12 Hanu dinu, antu jeyi akamaana adi kudihi?+
Yili akuleji neyi aneluki munamufuukwiliwu Ejipitu kudi Yehova wamazaza.
13 Ayilolu amuZowani anakoñi mwawusupi;Ayilolu amuNofi*+ anayidimbi;Anyanta anyichidi yindi anamuluwañeshi Ejipitu.
14 Yehova namuhuñunwini spiritu yakuluwañesha;+Nawa anamuluwañeshi Ejipitu muyuma yejima yelañayi,Neyi muntu wunasheti wunakudivuba mumasanjila indi.
15 Nawa Ejipitu hakekalahu namudimu wakuzata,Hela wamutu hela wamukila, wamutombu hela wamatahu amalehiku.*
16 Hanodu ifuku, Ejipitu wakekala neyi ambanda, wakazaala nikufwa mutentu muloña wachikasa chaYehova wamazaza chakutiyisha woma chikamwolwelayi.+
17 Ituña daYuda dakekala chuma chakumutiyisha Ejipitu woma. Akafwa mutentu chaditenawu idi ituña, muloña wachuma chinayifuukwiliwu kuyila kudi Yehova wamazaza.+
18 Hanodu ifuku, mwituña daEjipitu mwakekala nyisumba yitanu yikahoshaña idimi damuKenani+ nikusanyika nawu akwikalaña ashinshika kudi Yehova wamazaza. Musumba wumu akawutena nawu Musumba Wakujilumuna.
19 Hanodu ifuku, Yehova akamutuñila kameña hakachi ketuña daEjipitu nawa akamwimikila Yehova chishimi kuñinza yadu.
20 Chakekala chinjikijilu nawa wunsahu kudi Yehova wamazaza mwituña daEjipitu; muloña akamwaabila Yehova muloña wawantu anakuyikabisha, nawa wakayitemeshela chamwinu, wabadika, yenowu diyi wakayamwina.
21 Dichi Yehova wakadimwekesha kudi aEjipitu chekalayi, nawa aEjipitu akamwiluka Yehova hanodu ifuku, akamulambula nyilambu nikumwinka yawaana nawa akasanyika kudi Yehova nikwila munasanyikiwu.
22 Yehova wakamweta Ejipitu,+ wakamweta nikumuuka; dichi akafunta kudi Yehova, wakatiya kulemba kwawu nawa wakayuuka.
23 Hanodu ifuku, kwakekala mukwakwa weneni+ wukafuma muEjipitu nakuya kuAsiriya. Dichi Asiriya wakaya muEjipitu, Ejipitu niyena wakaya muAsiriya, nawa Ejipitu wakamukalakela Nzambi hamu naAsiriya.
24 Hanodu ifuku, Isarela wakekala wamuchisatu hadi Ejipitu naAsiriya,+ wakekala nkisu hakachi keseki,
25 muloña Yehova wamazaza wakayikiswila, nindi: “Antu jami ekali akiswilewa, Ejipitu, nimudimu wamakasa ami, Asiriya niwuswana wami, Isarela.”+
Tumazu twaheshina
^ Himutondu watumbileñawu kufuma kushankulu. Wanda wawu awuzatishileña kutuña yakuvwala.
^ Hela “wumi wawu wakadishona.”
^ Hela “Memfisi.”
^ Hela hekwawu, “mutayi wamukoma hela iteti.”
