Isaya 22:1-25
22 Mazu awunsompeshi kutalisha haChinekineki chaChimwenu:*+
Yumanyi yinayileteshi wejima wenu mukandami hewulu damatala?
2 Mudi eyi mwadiña kudikuwa chikupu,Musumba wepumba, tawuni* yamuzañalu.
Antu jeyi atapiliwu hiyayitapili nampoku yakabaliku,Nawa hiyafwili munjitaku.+
3 Anyuuli jeyi akalisha ejima atemukili.+
Ayinatilili mukaleya chakadi kuzatisha wuta wamukunji.
Ejima awaniniwu ayinatilili mukaleya,+Hela chakwila atemukilili kwakulehi chikupu.
4 Dichinahosheleli nami: “Talishilenu mesu enu kwacheñi,Nawa nukudila chikupu.+
Bayi mukabakana nakunkundejaHakujilumuka kwamwana kawantu* jami wamumbandaku.+
5 Muloña hiifuku dakuluwankana, dakwimika mushindu nawa dakululuta,+Kufuma kudi Mwanta Wabadika, Yehova wamazaza,MuChinekineki chaChimwenu.
Kudi kuhumona mbañu+Nimakumbu kumpidi.
6 Elami+ nanoni ipakumuna danyivuIku wudi namakalu nituwalu,*Nawa Kiri+ nasololi* nkebu.
7 Yinekineki yeyi yayiwahi chikupuYakenzala namakalu anjita,Nawa tuwalu* twakemana kuchiisu,
8 Nawa chuma chakubuta* Yuda akachifumishahu.
“Hanodu ifuku, mwakakeñakeña yitwa yanjita yamwitala datenañawu nawu Itala Devunda,+
9 nawa mwakamona nyaji yayivulu yaMusumba waDavidi.+ Nawa mwakasenda menji amwijiya dakunkulu.+
10 Mwakachinda matala amuYerusalema, mwakahumuna matala kulonda mwakakoleshi nachu mpwembu.
11 Nawa mwakatuña mwakuhembela menji hakachi kampwembu jiyedi mwakuya menji amwijiya dadikulu, ilaña himwakatala kudi Nleñi Wabadika wayituñiliku, nawa himwakamona Owu wayituñili kushankuluku.
12 Hanodu ifuku Mwanta Wabadika, Yehova wamazaza,Wakaleja antu kudila makumbu nikudishona,+Kutewula nyitu nikuvwala yisasa.
13 Ilaña, kwakekala chidika nikuzañalala,Kujaha añombi nianyikoku,Kuda mbiji nikunwa vinyu.+
‘Tudenu nikunwa, muloña kumadiki twakafwa.’”+
14 Kufumahu, Yehova wamazaza wadisolweli kumatu ami: “‘Muloña ichi chiluwa akayanakenachu wanyi sampu antu jenu anafwi,’+ dimunahoshiyi Mwanta Wabadika, Yehova wamazaza.”
15 Ichi dichinahoshiyi Mwanta Wabadika, Yehova wamazaza nindi: “Iñilaku mudi iwu ñamba, kudi Shebina,+ mukakutala itala* damwanta, nawa wumwili neyi,
16 ‘Chumanyi chiwunakukeña kunu, nawa hinyi iwunalondi kunu, mwaka wudipokweli ijamu kunu?’ Nakudipokwela ijamu hachinañanaña; nakudikelubwila mwilola iluña* dakunookelamu.
17 ‘Tiyaña! Eyi iyala, Yehova wakakunata heseki chatama, nawa wakakukwata chakukutadañesha.
18 Chakadi nikujina, wakakuvuñeka chikupu nawa wakakunata neyi ngunja mwituña deneni. Dimuwakafwila, nawa dimwakekala makalu eyi alema, chumichi chakaleta kasawuntu mwitala dankaaka yeyi.
19 Nawa nakakufumisha hachifulu cheyi nakukuhaña hamudimu weyi.
20 “‘Hanodu ifuku nakatambika kambuñami Eliyakimi+ mwana kaHilikiya,
21 nawa nakamuvwika munkukumba weyi nikumukasa chikupu muya weyi wehina nakumunyeñumwisha,+ nakamwinka niwuswa* weyi muchikasa chindi. Nawa wakekala tata yawantu ashakamaña muYerusalema niamwitala daYuda.
22 Nawa nakasha nsapi* yakwitala daDavidi+ hachifwiji chindi. Wakenzununa, kwosi wakenzelaku; nawa wakenzela, kwosi wakenzununaku.
23 Nakamupopa neyi mpopu mwiluña dahaya nyaaka, nawa wakekala itanda dalema kwitala datata yindi.
24 Nawa hadi yena akakudikahu kulema kwejima kwetala datata yindi, dikwila nawu, ejikulu nianyana,* yipwepu yanyanya yejima, yeña yakunama yanjiñumuki ninsaba jamaneni jejima.
25 “Yehova wamazaza nahoshi nindi, ‘Hanodu ifuku, mpopu yapopeliwu mwiluña dahaya nyaaka akayifumisha,+ akayitema nawa yakaholoka, nawa yuma yejima yakudikiliku yakaholoka nakukisika, muloña Yehova yomweni diyi wunahoshi.’”
Tumazu twaheshina
^ Chakadi nikujina, anakutena Yerusalema.
^ Hela “mbaka.”
^ Iyi hinhoshelu yankinji, hadaha yakumwekeshelamu luwi niwushona.
^ Hela “akakwendela hatuwalu.”
^ Hela “naloñeshi.”
^ Hela “akakwendela hatuwalu.”
^ Hela “chuma chakuyikiña.”
^ Hela “chipañu.”
^ MuchiHeberu, “mwakushakama.”
^ Hela “wanta.”
^ Hela “kii.”
^ Hela “nyitombu.”
