Isaya 3:1-26
3 Muloña tiyenu! Mwanta walala, Yehova wamazaza,Nakufumisha muYerusalema nimuYuda wukwashu washiyashana niyuma yakuhandilamu,Wukwashu wejima wayakuda* nimenji,+
2 Iyala wañovu nichilombu,Nsompeshi nikaprofwetu,+ mukakuhoña nimukulumpi,
3 Mukulumpi wawantu 50,+ muntu alemeshawu nimukakulejana maana,Katepa nkuluñaña nimukakufwomona wakulukila.+
4 Nakelisha atwansi awamayala kwikala ayilolu jawu,Nawa akayiyuula kudi antu abula maana.
5 Antu akadikabishaña wumu namukwawu,Muntu-himuntu wakakabishaña mukwawu.+
Kansi wakakatisha mukulumpi,Muntu abula kulemeshawu wakadikaña namuntu alemeshawu.+
6 Muntu-himuntu wakasenda manakwindi mwitala datata yindi nakumuleja nindi:
“Eyi wukweti kahuma, dichi ikalaku mukulumpi wetu.
Wutaleña haniwu mulumba wayuma yinakisañaniwu.”
7 Ilaña hanodu ifuku yena wakadikaña nindi:
“Ami nukwikala mukakuuka yilonda yenu wanyi;Hinukwetihu yakuda hela yakuvwala mwitala damiku.
Bayi muñilisha niikali mukulumpi wawantuku.”
8 Muloña Yerusalema nahukani,Nawa Yuda nadimbuki,Muloña anadikañi naYehova mumazu nimuyilwilu;Adikañaña hamesu akulema kwindi.*+
9 Mmwekenu yakumesu awu yayifwishaña namuloña,Nawa atiyakeshaña nshidi jawu neyi Sodoma;+Hiyesekaña nikusweka nshidi jawuku.
Oyihuñu yakamonawu,* muloña anakudiletela aweni kukala!
10 Yilejenu antu aloña nenu yuma yikayiwahila;Akayifweta hayuma yelañawu.*+
11 Oyihuñu yakamona muntu watama!
Kukala kukamuholokela,Muloña yuma yinakoñi makasa indi, diyakamukoñawu niyena!
12 Ilaña antu jami, akulumpi jawu anyidimu akalisha chikupu,Nawa ayiyuulaña kudi ambanda.
Enu antu jami, anlomboli jenu ayikojejaña kululuta,Nawa aluwañeshaña njila jenu.+
13 Yehova nakudiloñesha kufwisha antu nanyiloña;Nakwimana kulonda asompeshi antu.
14 Yehova wukusompa nawakulumpi niayilolu jawantu jindi.
“Munochi itempa danyivinyu,Nawa yuma yimuneyili atuzweñi yidi mumatala enu.+
15 Munachikilidi antu jami ñanaNikukabisha nankashi atuzweñi?”+ dimunahoshiyi Yehova wamazaza, Mwanta Wabadika.
16 Yehova nahoshi nindi: “Muloña anyana kaZiyona awambanda adivwimba,Endaña iku anenuni nyitu yawu,*Akenkamaña namesu awu, endaña nakuhañesha mbunda jawu,Iku anakuvumisha maleñi adi mutupokosu twawu,
17 Yehova niyena waketa nyitu yawanyana kaZiyona awambanda nayitumbatumba,Nawa Yehova wakashiya mahama awu hatooka.+
18 Hanodu ifuku Yehova wakafumisha yuma yayimwekeshaña lubanji: yikomu yawu,Yuma yakukasa kumutu niyuma yakudikudeka kumutu yanjiñumuki,+
19 Tuzeya twakumatu, makaayi nikadihina kakubuta kumesu,
20 Yitambala, maleñi amutupokosu nitumahina twakuvwala hantulu,*Yikasha mwakuhembela manji evumba dadiwahi niyitumbu.
21 Tuzeya twakunyinu nituzeya twakumazulu,
22 Nyinkukumba yakuvwala hachawija, yakuvwala yahewulu, tuhuma nitumapakumuna,
23 Yimbajilu+ yakumakasa niyakuvwala yamahina,*Yitambala nitumahina twakubuta kumesu.
24 Chatela kwiikali manji abalisamu,+ kwakekala ivumba dayuma yinatoki;Chatela kwiikali mushipi, kwakekala mwonji;Chatela mumutu mwiikali nsuki yalubanji, mwakekala ibala;+Chatela kwiikali chakuvwala chawuseya, kwakekala yisasa+Nawa chatela hamujimba hekali lubanji, hakekala chibata.
25 Antu jeyi akafwa kumpoku yakabali,Nawa antu jeyi añovu akafwa kunjita.+
26 Mawiñililu indi akadila nikudishona,+Nawa wakashakama heseki iku nakudila.”+
Tumazu twaheshina
^ MuchiHeberu, “mankendi.”
^ MuchiHeberu, “mumesu indi alema.”
^ Hela “yakamona wumi wawu.”
^ MuchiHeberu, “akada nyikaabu yayuma yelañawu.”
^ MuchiHeberu, “iku anololi nshiñu (mudiwu).”
^ Hela “nyiya yehina.”
^ Hela “yakuvwala yamukachi.”
