Isaya 32:1-20
32 Tiyenu! Mwanta+ wakayuula mukuloña,+Nawa atulamba akahakula mwawuñanji.
2 Nawa wejima wawu akekala neyi iluña mwakuswama mpepela,Iluña mwakwiyama nvula yeneni,Neyi tuloña twamenji mwituña dakadi menji,+Neyi wulelu welola deneni mumpata yoominina.
3 Kufumahu, mesu awantu anakumona hiyakayibutaku,Nawa matu awantu anakutiya akatiyililaña.
4 Nyichima yawantu alusukilaña yuma, yikatoñojoka chikupu hakwiluka,Nawa idimi dakukumaña dakahosha chiwahi nawa chatiyakana.+
5 Muntu wabula maana hiyakamutena cheñi nawu muntu wachisambuku,Nawa muntu wabula kushinshika hiyakamutena nawu muntu walemaku;
6 Muloña muntu wabula maana wakahosha jabula maana,Nawa muchima windi wakamuleja kwila yuma yafwana,+Kulonda aleti kasekesha* nikuhosha yuma yatama hadi Yehova,Kulonda amukiishi yakuda muntu wunafwi nzala*Nikumukiisha yakunwa muntu wunatiyi mpwila.
7 Yuma yafwilaña kwila muntu wabula kushinshika yatama;+Waletaña yilwilu yansonyiKulonda akisañani namakudi muntu akabishañawu,+Hela chakwila kazweñi nahoshi mwaloña.
8 Ilaña muntu wachisambu wukweti muchima wakuhana,Nawa mukumwekesha chisambu wafwilaña kutwalekahu.
9 “Enu ambanda mwabulaña kwakama, nyamukenu mutiyilili kwizu dami!
Enu anyana awambanda+ mwashakama kumatu kwamwena, tiyililenu kuyuma yinukuhosha!
10 Muchaaka chimu namafuku, enu mwashakama kumatu kwamwena mwakazaala,Muloña kwosi nyikaabu yimwakapompesha hanyima yakumana kwachilaaka chakwaañulaku.+
11 Enu ambanda mwabulaña kwakama, chiinenu!
Enu mwashakama kumatu kwamwena, zaalenu!
Vuulenu mushali nzekesi,Nawa vwalenu yisasa mumbunda jenu.+
12 Etenu hantulu jenu hakwimba mukeñaHamuloña wamaha amawahi nimuvinyu wasoñaña.
13 Muloña iseki dawantu jami akadibuta kudi nyiña niyikwata;Yakabuta matala ejima mwazañalelañawu,Eña, musumba wamuzañalu.+
14 Muloña kaposhi kakola anakishiyi chisayikila;Musumba wepumba anawushiyi.+
Ofeli+ nikaposhi kakutalila jinashali kwamahembi ahaya nyaaka,Mwakudiluñishila ayimbuulu amwisaña,Maluña mwakudiila nyikanka yayimuna,+
15 Sampu spiritu anayihuñunwini hadi etu kufuma mwiwulu,+Nawa isaña dinekali itempa danyikaabu,Nawa itempa danyikaabu anakudimona neyi isaña.+
16 Kuhiñahu, wuñanji wakashakama mwisaña,Nawa kuloña kwakashakama mwitempa danyikaabu.+
17 Chuma chakafuma mukuloña kwalala hikuwunda,+Nawa nyikaabu yakuloña kwalala yakekala kumwena nikukiñewa kwahaya nyaaka.+
18 Antu jami akashakama mumaluña awunda,Mumaluña akiñewa akushakamamu nimumaluña amwena akunookela.+
19 Ilaña nvula yamalola yikachañula ivunda,Nawa musumba akawuhumuna nakuwushiya kwala-a!
20 Adi namuzañalu antu atumbaña mbutu kwejima kudi menji,Akasununaña ñombi wachizamba nichimbuulu.”+
Tumazu twaheshina
^ Hela “kwila yuma munjila yabula kalemesha.”
^ Hela “wumi wamuntu wunafwi nzala.”
